Tshwmsim 9

1Thaum tus timtswv ceebtsheej thib tsib tshuab nws lub rajxyu, kuv pom ib lub hnubqub uas twb poob saum ntuj los rau hauv ntiajteb lawm; lub hnubqub ntawd tau txais ib tug yuamsij uas qhib lub qhov tob-tob#9:1: lub qhov tob-tob: Yog qhov chaw nyob hauv nruab tivtxwv uas cov dab raug kaw mus txog thaum lawv raug txiavtxim zaum kawg.. 2Lub hnubqub ntawd txawm mus qhib lub qhov tob-tob, ua rau muaj pa ncho tawm hauv lub qhov ntawd tuaj ib yam li tej pataws ncho hauv ib lub cubtawg uas loj-loj. Tej pa ntawd txawm ua rau lub hnub thiab saum nruabntug tsaus nti. #Chiv 19:28

3Muaj ib co kooj ya tawm hauv cov pa ncho ntawd los rau hauv ntiajteb; cov kooj ntawd tau txais lub hwjchim uas yog muaj taug ib yam li raubris teb. #Khiav 10:12-15 4Tiamsis cov kooj ntawd tau raug txwv tsis pub txov tej nyom, tej xyoob ntoo, lossis tej qoobloo, tsuas yog pub lawv txov cov neeg uas tsis muaj Vajtswv lub homthawj nias rau ntawm lawv hauvpliaj xwb. #Exek 9:4 5Thiab txwv tsis pub cov kooj tua cov neeg ntawd, tiamsis tsuas pub tsimtxom cov neeg ntawd li tsib lub hlis xwb. Tej kev mob uas lawv raug tsimtxom ntawd mob ib yam li raubris teb plev. 6Tsib lub hlis uas lawv raug tsimtxom ntawd, lawv yuav nrhiav kev tuag, tiamsis nrhiav tsis tau; lawv xav tuag kawg nkaus, tiamsis kev tuag yuav khiav tawm ntawm lawv mus. #Yauj 3:21; Yelemi 8:3

7Cov kooj ntawd zoo ib yam li tej nees uas luag twb muab eeb nog rau lawm yuav caij mus ntaus rog; muaj ib qho zooli lub mom kub nyob saum cov kooj ntawd taubhau, thiab lawv lub ntsejmuag zooli neeg lub. #Yau 2:4 8Cov kooj ntawd tej plaubhau zooli plaubhau pojniam, thiab lawv tej kaushniav zooli kaus tsov ntxhuav. #Yau 1:6 9Txhua tus kooj puavleej muaj tej daim zooli hlau thaiv ntawm lawv hauvsiab, thiab lawv tej tis nrov zooli tej suab tsheb nees uas dhia ua npoj mus rau tom tshavrog. #Yau 2:5 10Cov kooj ntawd muaj kotw uas txawj plev ib yam li raubris teb, thiab tus kotw ntawd muaj taug tsimtxom neeg txog tsib lub hlis. 11Cov kooj ntawd muaj ib tug vajntxwv uas yog tus timtswv ceebtsheej uas saib lub qhov tob-tob ua tus kav lawv. Nws lub npe ntawm lus Henplais hu ua Anpadoos; thiab lus Kilis hu ua Apauliyoos (txhais hais tias “Tus Uas Ua Kom Puastsuaj”).

12Thawjzaug kev puastsuaj twb dhau lawm, tiamsis tseem tshuav ob zaug kev puastsuaj ntxiv thiab.

13Thaum tus timtswv ceebtsheej thib rau tshuab nws lub rajxyu; kuv hnov ib lub suab hais ntawm plaub cegkaum ntawm lub thaj kub uas nyob ntawm Vajtswv hauvntej tuaj. #Khiav 30:1-3 14Lub suab ntawd hais rau tus timtswv ceebtsheej thib rau uas nqa lub rajxyu hais tias, “Ciali muab plaub tug timtswv ceebtsheej uas raug khi rau nram ntug dej loj Yufatis tso!” 15Ces plaub tug timtswv ntawd txawm raug muab tso tawm; lawv yog cov timtswv uas tau raug muab ceev thiab npaj cia rau lub sijhawm tamsim no, rau hnubno, rau lub hlis no, thiab lub xyoo no, kom mus tua neeg ntiajteb kom tuag tag ib feem peb. 16Kuv hnov tias cov tubrog uas caij nees yog muaj 200,000,000 leej.

17Nyob rau hauv qhov uas kuv ua yogtoog ntawd, kuv pom cov nees thiab cov neeg uas caij nees zooli no: cov neeg ntawd, lawv ib leeg muaj ib daim hlau thaiv hauvsiab uas muaj xim liab cuag li nplaimtaws, xim xiav muaj ntsis tsaus li xafais, thiab xim daj li leejfaj. Cov nees ntawd lub taubhau zoo ib yam li tsov ntxhuav lub, muaj nplaimtaws, pataws, thiab leejfaj tawm hauv cov nees ntawd lub qhovncauj los. 18Cov nplaimtaws, pataws, thiab leejfaj uas tawm hauv cov nees ntawd lub qhovncauj los, ua rau neeg ntiajteb tuag tag ib feem peb. 19Tej taug ntawd yog nyob hauv cov nees ntawd lub qhovncauj thiab nyob tom tus kotw. Cov kotw zooli tus nab uas muaj taubhau, thiab lawv siv cov kotw ntawd los ua rau neeg raug mob.

20Cov neeg uas seem tuag los ntawm tej subtawg subntsha ntawd lawv yeej tsis kam hloov siab tso tej uas lawv ua los ntawm lawv txhais tes tseg li. Lawv tseem pe dab, pe tej mlom kub, mlom nyiaj, mlom tooj, mlom pobzeb thiab mlom ntoo; tej mlom ntawd yeej tsis pomkev, tsis hnov lus, lossis mus taus kev. #Nnkauj 115:4-7; 135:15-17; Dani 5:23 21Thiab lawv yeej tsis tso txoj kev sibntaus sibtua, ua khawvkoob, ua nkauj ua nraug, lossis ua tubsab tubnyiag tseg li.

Currently Selected:

Tshwmsim 9: MWW2022

Highlight

Copy

Compare