Tshwmsim 4

Kev Pehawm Saum Ntuj Ceebtsheej

1Tomqab ntawd kuv rov pom dua ib zaj yogtoog thiab kuv pom roojntug ceebtsheej qhib lug cia.

Lub suab uas nrov li lub rajxyu uas kuv hnov thawjzaug ntawd txawm hais rau kuv tias, “Koj ciali tuaj saum no, kuv yuav muab tej uas yav tomntej no yuav muaj tshwm los rau koj saib.” 2Tamsim ntawd Vaj Ntsujplig txawm los kav tagnrho kuv. Kuv pom ib lub zwmtxwv nyob saum ntuj ceebtsheej thiab muaj ib tug nyob saum lub zwmtxwv ntawd. #Exek 1:26-28; 10:1 3Tus uas nyob ntawm lub zwmtxwv ntawd nws lub ntsejmuag ci ib yam li cov qe zeb muajnqis uas hu ua ntsexapaws thiab kanelis, thiab muaj ib tug duab nag vij lub zwmtxwv uas zooli tej qe zeb muajnqis uas hu ua emelaus.

4Muaj neesnkaum-plaub lub zwmtxwv nyob puagncig lub zwmtxwv ntawd, thiab muaj neesnkaum-plaub tug txwjlaug uas hnav ristsho dawb thiab ntoo mom kub nyob saum cov zwmtxwv ntawd. 5Muaj xob laim liab vog, xob quaj thiab muaj suab nrov ntxhe ntws ntawm lub zwmtxwv tuaj. Muaj xya tes tsau uas cig lamlug ntawm lub zwmtxwv hauvntej. Xya tes tsau ntawd yog Vajtswv xya tus ntsujplig. #Khiav 19:16; Tshwm 8:5; 11:19; 16:18; Exek 1:13; Tshwm 1:4; Xekhali 4:2 6Nyob ntawm lub zwmtxwv hauvntej muaj ib qho zooli hiavtxwv uas ci li iav pomkev tshab plaws.

Nyob kiag hauv plawv ntawd, muaj plaub tug uas ciajsia sawv vij lub zwmtxwv; plaub tug ntawd muaj qhovmuag thoobplaws sab xubntiag thiab sab tom nrobqaum huv tibsi. #Exek 1:22 7Thawj-thawj tus zoo ib yam li tus tsov ntxhuav; tus thib ob zoo ib yam li tus txiv nyuj; tus thib peb muaj lub ntsejmuag zooli neeg lub, thiab tus thib plaub zoo ib yam li tus dav uas tabtom ya. #Exek 1:5-10; 10:14 8Plaub tug uas ciajsia ntawd ib tug twg muaj rau phab tis uas muaj qhovmuag thoobplaws sabhauv thiab sabnraud. Lawv hunkauj tashnub tashmo hais tias, #Exek 1:18; 10:12; Yaxaya 6:2, 3

“Dawbhuv, dawbhuv, dawbhuv, yog tus Tswv uas yog Vajtswv tus uas muaj Hwjchim Loj Kawg Nkaus,

yog tus uas nyob thaum ub los lawm, muaj nyob nimno, thiab tseem yuav los tomntej no.”

9Txhua zaus uas plaub tug uas ciajsia ntawd hunkauj rau tus uas muaj sia nyob mus ibtxhis uas nyob saum lub zwmtxwv qhuas txog Nws tej tshwjchim tej koobmeej thiab ua Nws tsaug, 10mas neesnkaum-plaub tug txwjlaug ntawd yeej txhoscaug ntua pehawm tus uas muaj sia nyob mus ibtxhis uas nyob saum lub zwmtxwv, thiab lawv hle lawv tej mom kub tso rau ntawm lub zwmtxwv hauvntej thiab hais tias,

11“Vajtswv uas yog peb tus Tswv! Koj yog tus uas tsimnyog

tau txais tshwjchim, txais koobmeej, thiab txais hwjchim.

Rauqhov Koj yog tus uas tsim txhua yam,

thiab Koj tsim tej ntawd kom muaj rawsli Koj lub siab nyiam.”

Currently Selected:

Tshwmsim 4: MWW2022

Highlight

Copy

Compare