Tshwmsim 5

Thooj Ntawv Kauv Thiab Tus Menyuam Yaj

1Kuv pom tus uas nyob saum lub zwmtxwv, Nws txhais tes xis tuav rawv ib thooj ntawv kauv; thooj ntawv ntawd muaj lus sau rau sabhauv thiab sabnraud huv tibsi, thiab muaj xya lub homthawj nias rau. #Exek 2:9-10; Yaxaya 29:11 2Kuv pom ib tug timtswv ceebtsheej uas muaj hwjchim loj kawg nkaus, nws hais nrov-nrov hais tias, “Leejtwg thiaj tsimnyog muab tej homthawj tev thiab muab thooj ntawv kauv no los nthuav saib?” 3Tiamsis tsis muaj ib tug uas yuav muaj cuabkav muab thooj ntawv kauv ntawd los nthuav saib, tsis hais cov nyob saum ntuj ceebtsheej lossis hauv ntiajteb no lossis hauv nruab tivtxwv#5:3: nruab tivtxwv: Qhov chaw uas cov neeg tuag nyob (saib 1:18)..

4Kuv txawm quaj dhev, rauqhov yeej nrhiav tsis tau ib tug uas yuav tsimnyog muab thooj ntawv kauv ntawd los nthuav saib. 5Thaum ntawd ib tug txwjlaug txawm hais rau kuv tias, “Koj tsis txhob quaj. Koj saib seb, xeem Yudas tus tsov ntxhuav uas yog Daviv cajces, Nws twb kovyeej lawm; yogli ntawd, Nws yog tus muaj cuabkav tev xya lub homthawj thiab nthuav thooj ntawv kauv ntawd.” #Chiv 49:9; Yaxaya 11:1, 10

6Ces kuv txawm pom ib tug Menyuam Yaj, zoo yam li twb raug muab tua lawm, sawv hauv nruabnrab ntawm lub zwmtxwv; plaub tug uas ciajsia thiab cov txwjlaug puavleej sawv vij tus Menyuam Yaj. Tus Menyuam Yaj ntawd muaj xya tus kub thiab muaj xya lub qhovmuag, uas yog Vajtswv xya tus ntsujplig uas tau raug xa tawm mus thoob ntiajteb no. #Yaxaya 53:7; Xekhali 4:10 7Tus Menyuam Yaj mus muab thooj ntawv kauv ntawm tus uas nyob saum lub zwmtxwv sab tes xis. 8Thaum Nws mus muab tau thooj ntawv kauv ntawd lawm, ces plaub tug uas ciajsia thiab neesnkaum-plaub tug txwjlaug txawm qhau cev hlo rau ntawm tus Menyuam Yaj lub xubntiag. Lawv ib leeg tuav rawv ib lub nkauj nogncas thiab tuav rawv ib lub tais kub uas ntim hmoov tshuaj tswqab puvnkaus, uas yog Vajtswv cov neeg tej lus thov. #Nnkauj 141:2 9Lawv hu ib zaj nkauj tshiab hais tias:

“Koj yog tus uas tsimnyog muab thooj ntawv kauv ntawd

thiab muab tej homthawj tev.

Rauqhov Koj twb raug tua lawm, thiab los ntawm Koj cov ntshav, Koj tau txhiv neeg coj los rau Vajtswv,

tsis hais haiv twg, yam lus twg, haivneeg twg, lossis lub tebchaws twg. #Nnkauj 33:3; 98:1; Yaxaya 42:10

10Koj muab lawv tsa ua ib haivneeg uas yog ua cov povthawj hlob ua peb tus Vajtswv tes haujlwm.

Thiab lawv yuav kav lub ntiajteb no.” #Khiav 19:6; Tshwm 1:6

11Kuv rovqab ntsia dua, kuv hnov cov timtswv ceebtsheej lub suab uas yog qas txhiab qas plhom lub suab. Lawv sawv vij lub zwmtxwv, vij plaub tug uas ciajsia, thiab cov txwjlaug. #Dani 7:10 12Lawv hunkauj nrov-nrov hais tias:

“Tus Menyuam Yaj uas raug muab tua lawm, Nws yog tus uas tsimnyog

tau txais hwjchim, kev npluanuj, tswvyim, thiab lub zog,

tau txais koobmeej, tshwjchim, thiab kev qhuas!”

13Kuv hnov ibpuas tsavyam uas muaj sia, tsis hais tej uas nyob saum ntuj, nyob hauv ntiajteb, nyob hauv nruab tivtxwv, thiab nyob hauv hiavtxwv, lawv hunkauj hais tias:

“Thov kom tus uas nyob saum lub zwmtxwv thiab tus Menyuam Yaj

tau koobmeej, tau tshwjchim thiab tau hwjchim

mus ibtxhiab ibtxhis li!”

14Plaub tug uas ciajsia teb tias, “Amees!” ces cov txwjlaug txawm txhoscaug ntua pehawm Vajtswv thiab tus Menyuam Yaj.

Currently Selected:

Tshwmsim 5: MWW2022

Highlight

Copy

Compare