Ntawv Nkauj 96
96
Vajtswv Yog Tus Vajntxwv Loj Tshajplaws
(1 Xwmtxheej Vajntxwv 16:23-33)
1Ciali hu ib zaj nkauj tshiab rau tus TSWV!
Tagnrho lub ntiajteb no ciali hunkauj rau tus TSWV!
2Ciali hunkauj rau tus TSWV thiab qhuas Nws!
Niajhnub qhia txoj xov zoo txog qhov uas Nws tau cawm peb dim.
3Qhia Nws tus tshwjchim rau txhua haivneeg,
qhia Nws tes haujlwm uas zoo kawg nkaus rau txhua tus tibneeg.
4Vim tus TSWV yog tus loj tshajplaws thiab tsimnyog txhawb-nqa tshajplaws;
tsimnyog hwm Nws heev dua hwm tej nyuag vajtswv huv tibsi.
5Txhua haivneeg tej nyuag vajtswv puavleej yog mlom xwb,
tiamsis tus TSWV yog tus uas tsim lub ntuj.
6Tshwjchim thiab koobmeej nyob puagncig Nws;
hwjchim thiab tej kev zoonkauj nyob puvnkaus hauv Nws lub Tuamtsev.
7Txhua tus tibneeg hauv lub qabntuj no ciali qhuas tus TSWV;
qhuas Nws tus tshwjchim thiab lub hwjchim.
8Qhuas tus TSWV lub npe uas muaj koobmeej;
nqa tej khoom fij thiab tuaj rau hauv Nws lub Tuamtsev.
9Qhau cev tabmeeg tus Dawbhuv thaum Nws tshwm los;#96:9: thaum Nws tshwm los; lossis hnav tsoostsho pehawm.
tagnrho lub ntiajteb ciali tsheehnyo ntawm Nws xubntiag!
10Ciali hais rau txhua haivneeg tias, “Tus TSWV yog Vajntxwv!
Lub ntiajteb yeej nyob ruaj nrees thiab tsis uazog li;
Nws yuav txiavtxim ncajncees rau txhua haivneeg.”
11Ntiajteb thiab lub ntuj, ciali zoosiab!
Hiavtxwv thiab txhua yam tsiaj uas nyob hauv hiavtxwv ciali qw ntshoonrooj;
12cia tej tiajnrag, thiab txhua tsavyam hauv tej tiajnrag zoosiab!
Tej ntoo hauv havzoov yuav qw zoosiab
13thaum tus TSWV los kav lub ntiajteb no.
Nws yuav kav tibneeg ntiajteb los ntawm txoj kev ncajncees thiab qhov tseeb.
Currently Selected:
Ntawv Nkauj 96: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
