Ntawv Nkauj 90
90
PHAU 4
(Ntawv Nkauj 90—106)
Yog Vajtswv Thiab Noobneej Tug #90:0: Lus Henplais lub ntsiablus: Mauxes, uas yog Vajtswv tus neeg, tej lus thov.
1Tus TSWV, Koj yeej ibtxwm yog peb lub chaw nyob.
2Uantej Koj tsim tej tojroob hauvpes
lossis tsim lub ntiajteb no,
Koj yeej ibtxwm muaj nyob los lawm,
thiab Koj yuav yog Vajtswv mus ibtxhis li.
3Koj hais kom peb rov mus ua av,
Koj muab peb hloov rov mus ua av dua.
4Rau Koj, mas ibtxhiab xyoo tsuas ntev li ib hnub xwb;
zoo li naghmo, uas dhau mus lawm,
lossis zoo li ob-peb nyuag txoosteev thaum tsausntuj xwb. #2Pet 3:8
5Koj xaus peb lub neej zoo li ib zaj npausuav
uas tibpliag xwb twb ploj tas lawm.
Peb zoo li tej nrojtsuag uas nthaw kaus thaum sawvntxov,
6uas lojhlob thiab tawgpaj,
tiamsis thaum tsausntuj ces ciali qhuav thiab tuag lawm.
7Koj txoj kev chim ua rau peb raug puastsuaj tas;
Koj txoj kev npautaws ua rau peb ntshai kawg li.
8Koj muab peb tej kev txhaum tso rau ntawm Koj xubntiag,
tej kev txhaum uas peb ua nraim nkoos los Koj yeej pom huv tibsi.
9Vim Koj chim Koj thiaj muab peb txojsia xaus mus;
peb thiaj xaus zoo li xyu ib suab.
10Peb tsuas ua neej nyob txog xyacaum xyoo xwb,
yog peb khov, peb tsuas nyob txog yimcaum xyoo;
txawm nyob ntev li ntawd los tsuas yog kev txomnyem thiab nyuajsiab lawm xwb,
peb ua neej nyob tsis ntev, ces peb twb ploj mus lawm.
11Leejtwg thiaj paub tias Koj txoj kev chim ntawd heev npaum licas?
Leejtwg thiaj paub tias thaum Koj npautaws lawm, txaus ntshai npaum licas?
12Thov qhia peb tias peb txojsia luv npaum licas,
kom peb thiaj paub ua neeg ntse.
13Tus TSWV 'e, Koj tseem yuav chim ntev licas ntxiv thiab?
thov Koj hlub Koj cov tubtxib thiab!
14Thov kom peb niaj tagkis tau txais Koj txoj kev hlub uas ruaj-khov kom puvnpo peb lub siab,
kom peb thiaj hunkauj zoosiab tas peb simneej.
15Thov Koj pub kom peb muaj kev zoosiab ntau npaum li tej kev nyuajsiab
uas Koj tso los raug peb tau ntau xyoo.
16Thov pub rau peb, uas yog Koj cov tubtxib, pom Koj tej haujlwm tseemceeb;
thiab thov cia peb cov xeebntxwv pom Koj tus tshwjchim uas ci ntsa-iab.
17Tus TSWV uas yog peb tus Vajtswv, thov Koj txoj koobhmoov nyob nrog peb.
Thov pab kom txhua yam uas peb ua, tsuas muaj vammeej xwb.
Yog lau, thov pab kom txhua yam uas peb ua, tsuas muaj vammeej xwb!
Currently Selected:
Ntawv Nkauj 90: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
