Ntawv Nkauj 89
89
Zaj Nkauj Hu Thaum Tau Kev Ntxhovsiab#89:0: Lus Henplais lub ntsiablus: Ethas uas yog neeg Exelas zaj pajlug.
1Tus TSWV, kuv yuav niajhnub hunkauj qhuas Koj txoj kev hlub uas ruaj-khov;
kuv yuav qhia Koj txoj kev ncajncees ib tiam rau ib tiam.
2Kuv paub tias Koj txoj kev hlub yeej yuav muaj nyob mus ibtxhis,
thiab Koj txoj kev ncajncees yeej nyob ruaj nrees ib yam li lub ntuj.
3Koj tau hais tias, “Kuv tau coglus nrog tus neeg uas Kuv xaiv lawm;
Kuv tau coglus rau Kuv tus tubtxib Daviv hais tias,
4‘Koj cajces yuav tau ua vajntxwv mus li;
Kuv yuav ceev koj lub zwmtxwv kom muaj nyob mus ibtxhis.’ ” #2Xamu 7:12-16; 1Xwm 17:11-14; Nnkauj 132:11; Teshl 2:30
5Qaumntuj hunkauj qhuas tej txujci tseemceeb uas Koj ua;
tus TSWV, cov timtswv ceebtsheej yuav hunkauj qhuas Koj txoj kev ncajncees.
6Tus TSWV, nyob saum ntuj yeej tsis muaj leejtwg zoo li Koj;
cov timtswv ceebtsheej tsis muaj ib tug yuav zoo npaum li Koj.
7Koj yog tus uas txaus ntshai heev nyob rau ntawm cov timtswv ceebtsheej lub rooj sablaj;
lawv txhua tus sawv thiab hwm Koj.
8Tus TSWV uas yog Vajtswv tus muaj Hwjchim Loj Kawg Nkaus, tsis muaj leejtwg muaj hwjchim npaum li Koj;
tus TSWV, Koj txoj kev ncajncees yeej nyob puagncig Koj.
9Koj kav tej hiavtxwv uas muajzog;
Koj ua rau tej nthwv dej uas ntas ntawd nyob tusyees.
10Koj muab tus zaj Lahaj#89:10: Lahaj: Zaj dabneeg txog tus zaj hauv hiavtxwv, piv txog kev tsimtxom thiab kev phem. hauv hiavtxwv tsoo thiab muab tua tuag;
Koj kovyeej Koj cov yeebncuab los ntawm Koj tus zogloj zognchav.
11Lub ntuj thiab lub ntiajteb yog Koj tug;
Koj tsim lub ntiajteb thiab tsim txhua yam uas nyob hauv lub ntiajteb.
12Koj tsim qaumteb thiab qabteb;
lub Roob Tanpaus thiab lub Roob Hawmoos hunkauj zoosiab qhuas Koj.
13Koj muaj hwjchim loj kawg nkaus!
Koj sab tes xis muajzog heev!
14Koj tswj lub tebchaws los ntawm txoj kev ua zoo thiab ncajncees;
txoj kev hlub thiab qhov tseeb yeej muaj nyob rau hauv txhua yam uas Koj ua.
15Cov neeg uas hunkauj qhuas Koj, cov uas ua neej nyob rau ntawm Koj lub qhovmuag,
mas lawv muaj kev zoosiab heev!
16Vim muaj Koj lawv thiaj zoosiab tashnub;
thiab lawv qhuas Koj txoj kev ua siabdawb siabzoo.
17Koj pab peb muajyeej loj kawg li;
vim Koj txoj kev hlub, Koj thiaj ua rau peb kovyeej.
18Tus TSWV, Koj xaiv tus uas tivthaiv peb;
Koj yog cov Yixalayees tus Vajtswv Dawbhuv, uas pub peb tus vajntxwv rau peb.
Vajtswv Tej Lus Cogtseg Rau Daviv
19Tau ntev los lawm zaj yogtoog uas Koj tau hais rau Koj tus tubtxib uas ncajncees tias,
“Kuv tau pab ib tug tubrog uas nto npe heev;
Kuv tau muab lub zwmtxwv cob rau tus uas Kuv xaiv ntawm cov pejxeem los.
20Kuv tau muab roj uas dawbhuv hliv rau saum Kuv tus tubtxib Daviv taubhau
thiab tsa nws ua vajntxwv. #1Xamu 13:14; Teshl 13:22; 1Xamu 16:12
21Kuv lub zog yuav nyob rau hauv nws mus li,
Kuv lub hwjchim yuav ua rau nws muajzog heev.
22Nws cov yeebncuab yuav kov tsis yeej nws;
thiab cov neeg siabphem yuav kov tsis yeej nws.
23Kuv yuav tsuj ntiag nws cov yeebncuab
thiab tua txhua tus uas ntxub nws.
24Kuv yuav hlub nws thiab ua ncajncees rau nws;
Kuv yuav ua kom nws muajyeej tas mus li.
25Kuv yuav nthuav nws lub tebchaws kom dav
txij ntua ntawm Hiavtxwv Meditelanees mus txog ntua tus Dej Yufatis.
26Nws yuav hais rau kuv tias,
‘Koj yog kuv Txiv thiab yog kuv tus Vajtswv;
Koj yog lub Pobzeb uas yog kuv txoj kev cawmdim.’
27Kuv yuav tsa nws ua Kuv tus tub hlob,
ua tus Vajntxwv uas muaj hwjchim loj dua lwmtus vajntxwv huv tibsi. #Khiav 1:5
28Kuv yuav hlub nws mus li,
thiab tej uas kuv tau nrog nws sib coglus yuav nyob mus ibtxhis.
29Nws lub zwmtxwv yuav nyob ruaj-khov ib yam li lub ntuj;
thiab nws cajces yuav ua vajntxwv mus li.
30“Tiamsis yog nws cajces tsis hwm Kuv tej kevcai,
thiab tsis ua lub neej rawsli Kuv tej lus xaaj,
31yog lawv hla Kuv tej lus qhia,
thiab tsis khaws Kuv tej lus xaaj,
32mas Kuv yuav rautxim hnyav rau lawv vim lawv tej kev txhaum;
Kuv yuav ua kom lawv txomnyem vim tej kev txhaum uas lawv ua.
33Tiamsis Kuv yuav tsis tso txoj kev hlub Daviv tseg
lossis yuav ciali tsis ua rawsli tej uas Kuv tau coglus tseg rau nws lawm.
34Kuv yuav tsis rhuav Kuv tej lus cogtseg rau nws
lossis yuav tsis thim ib lolus uas kuv tau cogtseg rau nws rovqab.
35“Kuv tuav Kuv lub npe uas dawbhuv coglus tibzaug xwb kav mus tas ibtxhis:
Kuv yuav tsis dag Daviv hlo li.
36Nws cajces yuav ua vajntxwv mus li,
thiab Kuv yuav tsomkwm nws lub tebchaws ib yam li lub hnub uas tseem tawm tuaj tsis tseg li.
37Nws lub tebchaws yuav nyob ruaj-khov ib yam li lub hli,
ua tus timkhawv ncajncees nyob saum nruabntug.”
Quajntsuag Rau Tus Vajntxwv Uas Swb Lawm
38Tiamsis Koj chim heev rau tus vajntxwv uas Koj tau xaiv tseg;
Koj tau muab nws tsotseg thiab tsis quavntsej txog nws li.
39Koj tau rhuav Koj tej lus cogtseg rau Koj tus tubtxib,
thiab muab nws lub mom pov rau hauv av.
40Koj muab nws lub nroog tej ntsayeej rhuav puas tas
thiab cia tej chaw fajxwm pob puas mus.
41Cov neeg uas dua kev, nyiag nws tej khoom tas;
nws tej neeg zejzog puavleej luag nws plig.
42Koj pub nws cov yeebncuab kovyeej nws lawm;
Koj ua rau lawv txhua tus zoosiab heev.
43Koj ua rau nws tej cuabyeej uarog siv tsis tau,
thiab Koj tsis pab nws nyob rau hauv tshavrog.
44Koj tau tshem nws tus cwj#89:44: Nqe no sau hais tias tus cwj; phau lus Henplais hais tias txoj kev dawbhuv. tawm ntawm nws mus lawm
thiab muab nws lub zwmtxwv tsoo vau rau hauv av lawm.
45Koj ua rau nws laus uantej uas txog nws lub sijhawm,
thiab ua rau nws poob ntsejmuag kawg li.
Thov Vajtswv Cawm
46Tus TSWV, Koj txawm yuav khiav nraim mus ibtxhis li lov?
Koj txoj kev chim yuav kub li hluavtaws mus txog thaum twg?
47Ncontsoov tias kuv txojsia luv npaum licas;
Ncontsoov tias Koj tsim peb noobneej kom txawj tuag!
48Leejtwg thiaj yuav nyob ibtxhis es tsis txawj tuag?
Yuav ua licas peb noobneej thiajli khiav dim lub qhovntxa?
49Tus TSWV, Koj txoj kev hlub uas ruaj-khov thaum ub dua qhovtwg lawm?
Tej lus uas Koj cogtseg rau Daviv nyob qhovtwg lawm?
50Thov tsis txhob hnovqab tias kuv, uas yog Koj tus tubtxib, raug luag thuam,
kuv tau tiv cov tibneeg uas tsis paub Koj tej lus foom phem.#89:50: Nqe no sau hais tias tej lus foom phem; phau lus Henplais hais tias coob heev.
51Au tus TSWV, Koj cov yeebncuab tau txobthuam tus vajntxwv uas Koj xaiv!
Nws mus txog qhovtwg los luag thuam nws txog qhov ntawd.
52Thov qhuas tus TSWV mus ibtxhis li!
Amees! Amees!
Currently Selected:
Ntawv Nkauj 89: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
