Ntawv Nkauj 91
91
Vajtswv Yog Tus Tivthaiv Peb
1Tus uas mus cawmsiav rau ntawm tus TSWV,
thiab tus uas nyob hauv tus uas muaj Hwjchim Loj Kawg Nkaus txoj kev tivthaiv,
2mas thiaj hais tau rau tus TSWV tias,
“Koj yog kuv lub chaw cawmsiav thiab yog tus tsomkwm kuv.
Koj yog kuv tus Vajtswv; uas kuv tsosiab rau.”
3Nws yuav tsis pub koj mag txhua yam voj hlua,
thiab txhua yam kab mob phem.
4Nws yuav nthuav Nws ob phab tis los roos koj;
Nws yuav tsomkwm koj, mas koj yuav nyob tsosiab plhuav,
Nws txoj kev ncajncees yuav tsomkwm thiab tivthaiv koj.
5Hmontuj los koj yuav tsis ntshai ib yam dabtsi
thiab nruabhnub los koj yuav tsis ntshai tej xub hneevnti uas luag tua tuaj,
6lossis tej kab mob uas los raug sawvdaws thaum hmontuj,
lossis tej kev puastsuaj uas tuaj raug sawvdaws thaum tavsu.
7Qas txheeb leej tuag nyob ntawm koj ib sab,
qas vam leej tuag puagncig koj,
los yeej yuav tsis muaj xwm dabtsi los raug koj li.
8Koj yuav saib thiab pom tias
luag rautxim rau cov neeg siabphem licas.
9Koj muab tus TSWV ua koj#91:9: Nqe no sau hais tias koj; phau lus Henplais hais tias kuv. lub chaw cawmsiav,
koj muab tus uas muaj Hwjchim Tshajplaws ua tus tsomkwm koj,
10yogli ntawd yuav tsis muaj kev phem los raug koj,
thiab kev puastsuaj yuav tsis los ze koj vaj koj tsev.
11Vajtswv yuav txib Nws cov timtswv ceebtsheej los tsomkwm koj,
lawv yuav tivthaiv koj txhua qhov uas koj mus. #Math 4:6; Lukas 4:10
12Lawv ob txhais tes yuav hwj koj,
kom koj ob txhais kotaw tsis txhob ntsawm pobzeb. #Math 4:6; Lukas 4:11
13Koj yuav tsuj tsov ntxhuav thiab nab raj kubsai,
koj yuav tsuj tsov ntxhuav uas nyaum thiab tej nab uas muaj taug. #Lukas 10:19
14Vajtswv hais tias, “Kuv yuav cawm cov neeg uas hlub Kuv
thiab yuav tivthaiv cov uas lees paub tias Kuv yog tus TSWV.
15Thaum lawv thov txog Kuv, Kuv yuav teb lawv;
thaum lawv raug kev nyuajsiab, Kuv yuav nrog lawv nyob;
Kuv yuav cawm lawv thiab ua rau lawv tau ntsejmuag.
16Kuv yuav pub lawv muaj sia ntev;
thiab Kuv yuav cawm kom lawv dim.”
Currently Selected:
Ntawv Nkauj 91: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
