Ntawv Nkauj 88
88
Quaj Thov Kev Pab#88:0: Lus Henplais lub ntsiablus: Cuab Kauhas zaj nkauj. Yog ib zaj pajlug los ntawm Hamas uas yog neeg Exelas.
1Tus TSWV uas yog Vajtswv, kuv tus Cawmseej, nruabhnub kuv quaj rau Koj,
thiab hmontuj kuv los cuag Koj.
2Thov mloog kuv tej lus thov;
thov mloog kuv lub suab quaj uas thov kev pab!
3Muaj ntau yam kev ntxhovsiab los raug kuv
ua rau kuv yuavluag tuag.
4Kuv zoo li tus neeg uas twb yuav tuag;
vim kuv tsis muaj ib lub zog li lawm.#88:4: vim kuv tsis muaj ib lub zog li lawm lossis vim tsis muaj kev pab rau kuv.
5Kuv raug muab tso nrog cov neeg uas tuag lawm;
kuv zoo li cov neeg uas luag muab tua tso hauv qhovntxa,
uas yog cov neeg Koj yeej tsis nco txog
thiab Koj yeej tsis pab li lawm.
6Koj muab kuv pov rau hauv lub qhovntxa uas tob-tob,
uas yog lub qhov uas tsaus thiab tob tshajplaws.
7Koj txoj kev chim tsuam kuv hnyav heev,
thiab nphau los npog kuv ib yam li tej nthwv dej hiavtxwv ntas.
8Koj ua rau kuv cov phoojywg khiav tag tso kuv tseg;
Koj ua rau kuv txaus lawv ntxub kawg li.
Zoo yam nkaus li kuv raug muab kaw thiab yeej tawm tsis tau li;
9kuv ob lub qhovmuag ciali pomkev tsis tseeb vim txoj kev quaj.
Tus TSWV 'e, kuv niajhnub hu txog Koj
thiab tsa tes thov Koj.
10Koj puas ua tej txujci tseemceeb rau cov neeg tuag?
Lawv puas sawv los thiab qhuas Koj?
11Cov uas nyob hauv lub qhovntxa puas piav txog Koj txoj kev hlub
lossis piav txog Koj txoj kev ncajncees rau ntawm qhov chaw uas muaj kev puastsuaj?
12Puas pom Koj tej txujci tseemceeb nyob hauv lub chaw uas tsausntuj nti ntawd
lossis Koj txoj kev zoo nyob hauv lub tebchaws uas twb muab txhua yam hnovqab tas lawm?
13Tus TSWV 'e, kuv thov Koj pab;
kuv niaj tagkis thov Koj.
14Tus TSWV, vim licas Koj thiaj tsis lees paub kuv?
Vim licas Koj thiaj fee plhu ntawm kuv mus?
15Txij thaum kuv tseem hluas los, kuv yeej raug kev txomnyem thiab twb yuavluag tuag;
kuv sab kawg li,#88:15: Nqe no sau hais tias kuv sab kawg li; paub tsis meej tias lolus Henplais yog txhais licas tiag txog qhov no. vim Koj txoj kev rautxim hnyav heev.
16Koj txoj kev chim tsuam nkaus kuv;
Koj txoj kev npautaws ua rau kuv puastsuaj tas.
17Ib hnub nkaus, tej ntawd vij puagncig kuv li dej nyab;
tej ntawd sau nthwv txhua phab los voob nkaus kuv.
18Koj ua rau kuv tus phoojywg uas zoo tshajplaws muab kuv tsotseg,
tsuas yog kev tsausntuj thiaj tseem yog kuv tus phoojywg lawm xwb.
Currently Selected:
Ntawv Nkauj 88: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
