Ntawv Nkauj 84
84
Xav Mus Nyob Hauv Vajtswv Lub Tsev#84:0: Lus Henplais lub ntsiablus: Cuab Kaulas zaj nkauj.
1Tus TSWV uas muaj Hwjchim Loj Kawg Nkaus, Koj lub Tuamtsev zoo tiag-tiag li!
2Kuv xav mus nyob hauv!
Kuv tos tsis taus yuav mus nyob hauv tus TSWV lub Tuamtsev.
Kuv yuav hunkauj xyivfab kawg siab kawg ntsws
qhuas Vajtswv tus uas muaj sia nyob.
3Tus TSWV uas muaj Hwjchim Loj Kawg Nkaus, kuv tus Vajntxwv thiab kuv tus Vajtswv,
txawm yog tej noog tsev los twb txawj ua zes,
thiab tej noog luv los twb muaj chaw rau lawv nyob,
lawv tseem coj lawv tej menyuam noog los nyob ze ntawm Koj lub thaj.
4Cov neeg uas nyob hauv Koj lub Tuamtsev yog cov uas muaj kev kajsiab,
lawv hunkauj qhuas Koj tsis tseg tsis tu li.
5Cov neeg uas muaj kev kajsiab yog cov uas paub tias Koj yog tus ua kom lawv muajdag muajzog,
thiab kubsiab lug mus rau saum lub Roob Xi-oos.
6Thaum lawv hla lub hav qhuav Npakas mus,
lub hav ntawd ciali muaj dej txhawv ntau qhov;
thaum txog lub caij ntuj nag lub hav ntawd muaj pas dej teev mias.
7Lawv yim mus yim muajzog dua qub tuaj;
lawv yuav pom tej nyuag vajtswv tus Vajtswv nyob saum Roob Xi-oos.
8Tus TSWV, uas yog Vajtswv tus muaj Hwjchim Loj Kawg Nkaus, thov mloog kuv tej lus thov.
Au Yakhauj tus Vajtswv, thov tig ntsej mloog!
9Au Vajtswv, thov Koj foom koobhmoov rau peb tus vajntxwv,
uas Koj yog tus tsa nws.
10Nyob ib hnub hauv Koj lub Tuamtsev
zoo dua li nyob lwmqhov ibtxhiab hnub;
kuv xum ua tus zov kuv tus Vajtswv lub qhovrooj
dua li mus nyob hauv cov neeg siabphem tej tsev.
11Tus TSWV yog tus tivthaiv peb thiab yog tus vajntxwv uas muaj koobmeej,
Nws pub kev hlub thiab koobmeej rau peb.
Nws yeej tsis tseg ib yam zoo uas yuav tsis muab
rau cov neeg uas ua qhov yog.
12Tus TSWV uas muaj Hwjchim Loj Kawg Nkaus, cov neeg uas tsosiab rau Koj, yog cov uas muaj kev zoosiab!
Currently Selected:
Ntawv Nkauj 84: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
