Ntawv Nkauj 83
83
Thov Vajtswv Kom Yixalayees Cov Yeebncuab Swb#83:0: Lus Henplais lub ntsiablus: Axafes zaj nkauj.
1Au Vajtswv, thov Koj tsis txhob nyob ntsiagto;
tsis txhob ua tus tsis hnov thiab tsis txhob nyob twjywm!
2Saib maj! Koj tej yeebncuab tabtom ntxeevsiab
thiab cov uas ntxub Koj tabtom sawv tawmtsam Koj.
3Lawv tabtom npajsiab twjywm yuav tawmtsam Koj haivneeg;
lawv tabtom tuavhauv tawmtsam haivneeg uas Koj hlub.
4Lawv hais tias, “Ciali tuaj, peb mus tua lawv lub tebchaws kom puastsuaj tas;
kom thiaj tsis muaj leejtwg nco txog haivneeg Yixalayees mus ibtxhis li.”
5Lawv pomzoo ua li lawv hais
thiab koomsiab uake tawmtsam Koj:
6cov neeg Edoos thiab cov Yisamayees,
cov neeg Mau-am thiab cov Hankelis,
7cov neeg Nkenpas, cov Amoos, thiab cov Amalej,
cov Filixatees thiab cov Thailes.
8Cov Axilias los kuj koomtes nrog lawv,
nrog cov Amoos thiab cov Mau-am, uas yog Lauj cajces.
9Thov Koj ciali ua rau lawv ib yam li Koj tau ua rau cov Midias,
cov Xixelas thiab cov Yanpees uas nyob ntawm tus Dej Kisoos. #Cthj 7:1-23; Cthj 4:6-22
10Koj tau ua rau lawv puastsuaj nyob ntawm Edaus,
ua rau lawv tuag thiab lwj tas rau hauv av.
11Thov Koj ua rau lawv cov thawjcoj ib yam li Koj tau ua rau Aules thiab Xees;
thov ua rau lawv cov nomtswv swb ib yam li Koj tau ua rau Xenpas thiab Xamunas, #Cthj 7:25; Cthj 8:12
12vim lawv khav hais tias, “Peb yuav mus txeeb lub tebchaws
uas yog Vajtswv tug los ua peb tug.”
13Au kuv tus Vajtswv, thov Koj ua kom lawv zoo yam li tej hmoov av,
thiab yam li tej quavnyab uas cua muab ntsawj ya tas.
14Yam li hluavtaws kub havzoov,
yam li tej nplaimtaws uas ua rau tej ncov roob kubhnyiab,
15thov Koj tso nagxob nagcua raws lawv khiav mus,
thiab tso cuadaj cuadub los ntsawj ua kom lawv txhawj-ntshai.
16Tus TSWV, thov Koj ua kom lawv raug kev txajmuag,
kom lawv thiaj tig los nrhiav Koj.
17Thov kom lawv txajmuag thiab ntshai mus tas ibtxhis li;
thov kom lawv tuag ua rhuav plhu ntsuav.
18Kom lawv paub tias Koj tibleeg thiaj yog tus TSWV,
yog tus muaj Hwjchim Loj Kawg Nkaus uas kav tagnrho lub qabntuj no.
Currently Selected:
Ntawv Nkauj 83: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
