Ntawv Nkauj 80
80
Thov Txhimkho Haivneeg Yixalayees#80:0: Lus Henplais lub ntsiablus: Axafes zaj nkauj; ib zaj lus povthawj.
1Cov Yixalayees tus Tswv yug yaj, thov Koj mloog peb tej lus thov;
tus thawj uas coj Koj pab yaj, thov mloog peb tej suab hu.
Koj nyob saum Koj lub zwmtxwv saum cov khelunpees, #Khiav 25:22
2thov qhia Koj rau xeem Efalayees, xeem Npeeyamees, thiab xeem Manaxes.
Thov qhia Koj lub hwjchim rau peb;
thiab los cawm peb!
3Vajtswv, thov coj peb rovqab!
Thov qhia Koj txoj kev tabncuab rau peb, peb thiaj yuav dim!
4Tus TSWV, uas yog Vajtswv tus muaj Hwjchim Loj Kawg Nkaus,
Koj tseem yuav chim rau Koj haivneeg tej lus thov ntev npaum licas ntxiv?
5Koj tau muab cov mov uas yog kev quajntsuag rau peb noj,
thiab muab lub khob uas yog kuamuag rau peb haus.
6Koj cia cov neeg uas nyob puagncig peb tuaj txeeb peb lub tebchaws;
mas peb cov yeebncuab txobthuam peb kawg li.
7Vajtswv tus muaj Hwjchim Loj Kawg Nkaus, thov coj peb rovqab los!
Thov qhia Koj txoj kev tabncuab rau peb, peb thiaj yuav dim!
8Peb zoo li cov txivhmab uas Koj coj nram tebchaws Iziv los;
Koj muab lwm haivneeg ntiab mus thiab muab peb cog rau hauv lub tebchaws.
9Koj tu thaj chaw du-dais rau cov txivhmab kom lojhlob;
tej cag nrhau mus tob thiab hlav mus thoobplaws lub tebchaws.
10Nws ua duab ntxoo tuaj roos tej hauv roob;
nws tej ceg ua duab ntxoo roos tej ntoo ciab uas loj siab.
11Nws tej ceg dauv mus ti nkaus ntawm ntug Hiavtxwv Meditelanees
thiab nthuav mus ti nkaus rau pem tus Dej Yufatis.
12Vim licas Koj muab tej ntsa lajkab uas xov lub vaj ntawd rhuav lawm?
Zaumno txhua tus neeg uas dua kev mus-los yuav nyiag tau tej txivhmab ntawd;
13npuateb yuav muab tej txivhmab ntawd tsuj tas,
thiab tej tsiaj qus yuav los muab noj tas huv tibsi.
14Vajtswv tus uas muaj Hwjchim Loj Kawg Nkaus! Thov tig los rau ntawm peb!
Thov Koj saib saum ntuj los rau ntawm peb;
thov ciali los thiab cawm Koj haivneeg!
15Thov ciali los cawm tsob txivhmab uas Koj cog cia,
tsob txivhmab ntawd Koj tau ua rau lojhlob khov heev lawm!
16Peb cov yeebncuab tau muab tsob txivhmab ntawd ntov thiab tis hluavtaws hlawv,
thov Koj saib lawv ua npautaws vog thiab muab lawv ua kom puastsuaj mus!
17Thov Koj tsomkwm thiab tivthaiv haivneeg uas Koj xaiv tseg,
yog haivneeg uas Koj tau ua rau lawv muajzog heev.
18Peb yuav tsis khiav tawm ntawm Koj mus ntxiv lawm;
thov pab kom peb muaj sia nyob, kom peb thiaj tau qhuas Koj.
19Tus TSWV, uas yog Vajtswv tus uas muaj Hwjchim Loj Kawg Nkaus, thov coj peb rovqab los.
Thov qhia Koj txoj kev tabncuab rau peb, peb thiaj yuav dim!
Currently Selected:
Ntawv Nkauj 80: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
