Ntawv Nkauj 78
78
Vajtswv Thiab Nws Haivneeg#78:0: Lus Henplais lub ntsiablus: Axafes zaj pajlug.
1Kuv haivneeg, nej ciali mloog kuv tej lus qhia,
thiab ua tibzoo mloog tej lus uas kuv hais.
2Kuv yuav siv ib zaj lus pivtxwv
thiab qhia tej uas yav tas los tau muab npog cia lawm.
3Tej ntawd yog tej uas peb twb tau hnov thiab paub,
yog tej uas peb cov yawgkoob tau qhia rau peb lawm.
4Peb yuav tsis muab tej ntawd zais tsis pub peb tej menyuam paub;
peb yuav qhia rau tiam neeg tomntej
txog tus TSWV lub hwjchim thiab Nws tes haujlwm uas tseemceeb,
thiab tej txujci tseemceeb uas Nws tau ua tas los.
5Nws tau muab Nws tej kevcai cob rau cov Yixalayees,
uas yog Yakhauj cajces.
Nws tau xaaj kom peb cov yawgkoob
muab Nws tej kevcai ntawd qhia rau lawv cov menyuam,
6kom tiam neeg tomntej thiaj tau kawm tej ntawd
thiab muab qhia rau lawv cov menyuam mus ntxiv.
7Ua li no lawv thiaj yuav tsosiab rau Vajtswv
thiab tsis hnovqab txog tej uas Nws tau ua los lawm,
tiamsis yuav coj ua rawsli Nws tej kevcai.
8Lawv yuav tsis zoo li lawv cov yawgkoob,
uas yog neeg ntxeevsiab thiab tsis mlooglus;
lawv txoj kev tsosiab rau Vajtswv yeej tsis ruaj tsis khov hlo li
thiab lawv lub siab yeej tsis ncajncees rau Vajtswv.
9Cov Efalayees uas muaj hneevnti thiab muaj xubvos,
tau khiav thaum muaj kev sibtua hauv tshavrog mus lawm.
10Lawv tsis ceev Vajtswv tej los cogtseg;
lawv tsis kam ua rawsli Nws txoj kevcai.
11Lawv tsis ncoqab txog tej uas Nws tau ua,
tej txujci tseemceeb uas Nws tau ua rau lawv pom los lawm.
12Vajtswv ua tej txujci ntawd rau lawv cov yawgkoob pom,
nyob rau ntawm lub tiaj Xau-as hauv tebchaws Iziv. #Khiav 7:8—12:32
13Nws muab dej hiavtxwv faib hlo rau ob sab thiab coj lawv mus dhau plaws rau sab tim ub;
Nws ua rau dej sawvtsees zoo li tej phabntsa. #Khiav 14:21-22
14Thaum nruabhnub Nws ua ib tauv huab coj lawv
thiab hmontuj Nws ua ib tug nplaimtaws cig rau lawv pomkev ib hmos nkaus. #Khiav 13:21-22
15Nyob ntawm tiaj suabpuam Nws ua rau phab pobzeb tawg txua
thiab muaj dej ntau heev, cuag txhawv hauv hiavtxwv los rau lawv haus.
16Nws ua rau dej txhawv hauv qhov pobzeb tuaj,
thiab ntws npaum li ib tug dej. #Khiav 17:1-7; Teev 20:2-13
17Tiamsis lawv pheej ua txhaum rau Vajtswv tsis tseg li,
thaum nyob hauv tiaj suabpuam lawv tau ntxeevsiab rau tus uas muaj Hwjchim Tshajplaws.
18Lawv txhobtxwm sim Vajtswv siab
los ntawm qhov uas lawv yuam kom Vajtswv tso cov mov uas lawv xav noj los rau lawv. #Khiav 16:2-15; Teev 11:4-23, 31-35
19Lawv haislus twm Vajtswv tias,
“Vajtswv puas yuav muab tau mov rau peb noj nyob hauv tiaj suabpuam no?
20Yeej muaj tseeb, Nws tau ntaus pobzeb,
dej tau txhawv ntws laublug los;
tiamsis Nws puas yuav muaj cuabkav muab tau mov thiab nqaij rau peb noj?”
21Thaum tus TSWV hnov lawv hais li ntawd, Nws chim heev;
Nws thiaj cia Nws txoj kev chim los kub Nws haivneeg,
thiab Nws txoj kev chim ntawd thiaj loj zujzus tuaj tawmtsam lawv,
22rauqhov lawv tsis ntseeg Nws
thiab tsis ntseeg tias Nws yuav cawm tau lawv dim.
23Tiamsis Nws hais rau lub ntuj uas nyob saud
thiab xaaj kom roojntug qhib;
24Nws tau tso mov saum ntuj los rau lawv,
uas yog tso manas los rau lawv noj. #Yauh 6:31
25Yogli ntawd, lawv thiaj tau noj cov timtswv ceebtsheej tej mov,
thiab Vajtswv muab txhua yam uas lawv xav tau rau lawv.
26Vajtswv tseem ua kom cov cua sab hnubtuaj ntsawj tuaj,
thiab Nws siv Nws lub hwjchim ua rau kom cov cua sab qabteb ntsawj tuaj;
27thiab Nws tso noog los rau Nws haivneeg noj,
cov noog ntawd ntau ib yam li tej xuabzeb ntawm ntug hiavtxwv;
28cov noog ntawd los puvnkaus rau hauv lub plawv yeej
thiab puagncig lawv tej tsevntaub.
29Yogli ntawd, cov tibneeg thiaj muaj nqaij noj txaus lawv siab;
Vajtswv tau muab txhua yam uas lawv xav tau rau lawv.
30Tiamsis txawm lawv npuav rawv mov hauv qhovncauj
los lawv tseem pheej tsis txaussiab rau tej uas lawv nqhis li thiab;
31yogli ntawd Vajtswv thiaj chim rau lawv,
Nws thiaj tua lawv cov neeg uas muajzog tshajplaws,
thiab cov Yixalayees tej tub hluas uas zoo tshajplaws povtseg.
32Txawm yog twb muaj tej no los tibneeg tseem ua txhaum qees;
txawm yog Nws twb ua ntau yam txujci tseemceeb kawg li los lawv yeej tsis ntseeg Nws li.
33Yogli ntawd, Nws thiaj ua rau lawv txojsia yaj ntshis mus yam li ua pa
thiab tib ntsais muag xwb, lawv lub neej raug kev puastsuaj tas.
34Thaum Vajtswv tua lawv ibtxhia lawm,
cov uas seem kuj tig rov los cuag Nws;
lawv kuj hloov dua siab tshiab thiab los thov Nws kawg siab kawg ntsws.
35Lawv rov nco tau tias Vajtswv yog lawv lub chaw nkaum,
thiab tus muaj Hwjchim Tshajplaws yog lawv tus Cawmseej.
36Tiamsis tej lus uas lawv hais ntawd yog lus dag xwb;
tsis muaj ib lolus uas yog lus tseeb li.
37Lawv tsis muab siab npuab Nws;
lawv tsis ua siabncaj rau Nws tej lus uas cogtseg rau lawv. #Teshl 8:21
38Tiamsis Vajtswv tseem hlub thiab tabncuab Nws haivneeg.
Nws zam lawv tej kev txhaum
thiab tsis ua kom lawv puastsuaj.
Muaj ntau zaus Nws tau thim Nws txoj kev chim
thiab cheem Nws txoj kev npautaws.
39Nws yeej ncontsoov tias lawv yog neeg xwb,
lawv zoo li nthwv cua uas dhau mus thiab yuav tsis rovqab los li lawm.
40Nyob hauv tiaj suabpuam, lawv pheej ibsij ntxeevsiab rau Nws;
ua rau Nws tusiab ntau zaus heev!
41Lawv pheej sim Vajtswv siab ib zaug tas ib zaug tuaj,
ua rau cov Yixalayees tus Vajtswv uas Dawbhuv tusiab kawg li.
42Lawv tsis ncoqab Nws lub hwjchim
thiab hnub uas Nws cawm lawv dim ntawm lawv cov yeebncuab txhais tes,
43thiab ua ntau yam txujci tseemceeb rau lawv pom
ntawm lub tiajnrag Xau-as hauv tebchaws Iziv.
44Nws tau muab tej dej hloov ua ntshav,
ua rau cov neeg Iziv tsis tau dej haus li. #Khiav 7:17-21
45Nws tau tso yoov ya los rau ntawm lawv thiab tom lawv,
thiab tso qav los ua rau lawv lub tebchaws puastsuaj. #Khiav 8:20-24; Khiav 8:1-6
46Nws tau tso kooj los noj lawv tej qoobloo
ua rau lawv tej liaj-teb puastsuaj tas. #Khiav 10:12-15
47Nws tau tso lawg los ntaus lawv tej txivhmab
thiab tso te los tua lawv tej ntoo txiv ncuavpias tuag tas. #Khiav 9:22-25
48Nws tau tso lawg los ntaus lawv tej nyuj,
thiab tso xob laim#78:48: lawg… xob laim lossis tej kab mob phem… mob aws. tua lawv tej tsiaj tuag tas huv tibsi.
49Nws tau tso Nws txoj kev chim uas nrujtsiv los rau lawv,
npaum nkaus li ib pab timtswv ceebtsheej coj txoj kev tuag los rau lawv,
ua rau lawv ntxhovsiab kawg nkaus li.
50Nws yeej tsis cheem Nws txoj kev chim
lossis tsis txuag lawv siav li,
tiamsis Nws tso kab mob los tua lawv.
51Nws muab txhua tus tub hlob
ntawm txhua yim uas nyob hauv tebchaws Iziv tua tuag tas. #Khiav 12:29
52Ces Nws coj Nws haivneeg tawm ib yam li tus tswv yug yaj;
thiab coj lawv kev los hla tiaj suabpuam. #Khiav 13:17-22
53Nws coj lawv los tsosiab plhuav, lawv tsis ntshai dabtsi li;
tiamsis dej hiavtxwv nphau nphwv los npog lawv tej yeebncuab. #Khiav 14:26-28
54Nws coj lawv los rau hauv Nws lub tebchaws dawbhuv,
los nyob saum tej roob uas Nws twb tua yeej lawm. #Khiav 15:17; Yaus 3:14-17
55Nws muab cov neeg uas nyob hauv lub tebchaws ntawd ntiab tawm khiav thaum Nws haivneeg los nyob;
Nws muab lawv tej av faib rau txhua xeem Yixalayees
thiab muab lawv tej vajtse rau Nws haivneeg nyob. #Yaus 11:16-23
56Tiamsis lawv tseem ntxeevsiab tawmtsam tus Vajtswv uas muaj Hwjchim Loj Kawg Nkaus
thiab lawv pheej sim Nws siab.
Lawv tsis ua rawsli Nws tej kevcai li. #Cthj 2:11-15
57Lawv ntxeevsiab thiab tsis muab siab npuab Vajtswv ib yam li lawv cov yawgkoob,
zoo yam li tus xibxub nkhaus uas siv tsis tau lawm.
58Lawv ua rau Nws chim kawg, vim lawv tej chaw teev dab,
thiab lawv ua rau Nws npautaws heev vim lawv pe mlom.
59Vajtswv chim heev thaum Nws pom tej ntawd,
yogli ntawd, Nws thiaj tso Nws haivneeg tseg tsis quavntsej lawv li lawm.
60Nws tau muab Nws lub tsevntaub hauv Silaus,#78:60: Silaus: Yog cov Yixalayees lub chaw pehawm uas tseemceeb nyob uantej Vajntxwv Daviv lub sijhawm.
uas yog lub chaw Nws nrog peb nyob tsotseg lawm thiab. #Yaus 18:1; Yelemi 7:12-14; 26:6
61Nws cia peb cov yeebncuab tuaj txeeb tau lub Phijxab Lus Cogtseg,
uas yog lub cim ntawm Nws lub hwjchim thiab tus tshwjchim. #1Xamu 4:4-22
62Nws npautaws heev rau Nws haivneeg,
Nws thiaj cia lawv cov yeebncuab muab lawv tua.
63Lawv cov tub hluas tuag tas rau hauv tshavrog,
ua rau cov ntxhais hluas tsis muaj txiv yuav.
64Cov povthawj hlob los raug luag tua tuag tas,
tiamsis luag tsis pub lawv cov pojniam quaj li.
65Thaum kawg tus TSWV thiaj tsim dheev, zooli tus uas tsim nruab dabntub los,
Nws zoo li tus txivneej uas qw nrov vim haus cawv ntau.
66Nws ua rau Nws cov yeebncuab thim rovqab
thiab poob ntsejmuag mus ibtxhis li.
67Tiamsis Nws tsis lees paub Yauxej cajces.
Nws tsis xaiv xeem Efalayees.
68Nws xaiv xeem Yudas
thiab lub Roob Xi-oos uas Nws hlub tshajplaws.
69Nws tsim Nws lub Tuamtsev rau qhov chaw ntawd,
uas yog lub chaw siab, zoo li Nws lub tsev uas nyob saum ntuj;
Nws ua lub Tuamtsev ntawd ruaj ib yam li lub ntiajteb
uas nyob mus ibtxhis.
70Nws xaiv Daviv, uas yog Nws tus tubtxib;
Nws coj Daviv tawm hauv tej tshav zaub,
71tej chaw uas Daviv zov Daviv pab yaj los,
thiab muab Daviv tsa ua vajntxwv kav cov Yixalayees;
Daviv yog tus tub yug yaj uas saib Vajtswv haivneeg. #1Xamu 16:11-12; 2Xamu 7:8; 1Xwm 17:7
72Daviv muaj lub siab dawbpaug saib lawv,
thiab nws muaj tswvyim zoo coj lawv.
Currently Selected:
Ntawv Nkauj 78: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
