Mikhas 7
7
Cov Yixalayees Ua Tsis Ncaj
1Kuv tag kev ciasiab lawm lau! Kuv zoo li tus neeg tshaib plab uas xawb tsis tau ib lub txiv saum ntoo, thiab tsis muaj txivhmab nyob ntawm tej yuav de tau los noj li. Txhua re txivhmab uas qab thiab thawj phaum txiv ncuavpias luag twb muab de tag lawm. 2Tsis tshuav ib tug neeg ncajncees nyob hauv lub tebchaws li lawm; tsis muaj ib tug ncajncees rau Vajtswv li. Txhua tus npaj rawv tos yuav tua neeg. Txhua tus nyias yeej cuab ntxiab tos nyias tej kwvtij zejzog xwb. 3Lawv ob txhais tes txawj ua phem kawg li. Cov nomtswv thiab cov txiavtxim xav tau luag tej nyiaj xiab. Cov neeg uas tseemceeb yeej tau tej uas lawv lub siab ntshaw, lawv yeej tuaj sibtxoos thiab tuav tswvyim dag.#7:3: tuav tswvyim dag; paub tsis meej tias lolus Henplais yog txhais licas tiag txog qhov no. 4Txawm yog tus uas ua zoo thiab ua ncaj tshajplaws ntawm lawv cov ntawd los twb tseem zoo tsis npaum li tsob pos.
Twb txog hnub uas Vajtswv yuav txiavtxim rau cov neeg ntawd rawsli uas Nws tau hais rau lawv cov neeg fajxwm, uas yog cov cevlus ceebtoom rau lawv lawm. Nimno lawv ntxhovsiab heev. 5Tsis txhob ntseeg koj tej kwvtij zejzog lossis ciasiab rau koj tej phoojywg. Txawm yog tej lus uas koj hais rau koj tus txiv lossis koj tus pojniam los, koj yuavtsum tau ceevfaj. 6Lub sijhawm no tej tub yuav tsis hwm lawv txiv, cov ntxhais yuav tawmtsam lawv niam, thiab cov nyab yuav nrog niampog sibcav sibceg; koj cov yeebncuab ces yog koj tsev neeg ntag!
7Tiamsis kuv yuav ntsiantsoov tus TSWV; kuv ruajsiab rau Vajtswv, tus uas yuav los cawm kuv. Kuv tus Vajtswv yuav mloog kuv tej lus thov.
Tus TSWV Coj Kev Cawmdim Los
8Peb cov yeebncuab, nej tsis txhob hnyos peb! Peb ntog lawm, tiamsis peb yuav sawv rov los dua. Tamsim no peb nyob hauv qhov chaw uas tsausntuj nti, tiamsis tus TSWV yuav yog peb qhov kaj. 9Peb tau ua txhaum rau tus TSWV lawm, yogli ntawd peb yuav tau ua siabntev tiv Nws txoj kev npautaws mus ib nyuag ntu. Tiamsis thaum kawg Nws yeej yuav tuaj peb tog thiab muab txoj kev ncajncees rau peb. Nws yuav coj peb tawm mus rau ntawm qhov kaj, thiab peb yuav pom Nws cawm peb dim. 10Thaum ntawd peb cov yeebncuab yuav pom tej no thiab lawv yuav poob ntsejmuag heev. Lawv yog cov yeebncuab uas hnyos peb hais tias, “Tus TSWV uas yog nej tus Vajtswv nyob qhovtwg?” Peb yuav pom lawv swb, thiab yuav pom raug muab tsuj#7:10: Peb yuav pom… tsuj lossis Peb yuav hnyos lawv thaum lawv raug luag muab tsuj. li neeg tsuj av nkos tom tej kev.
11Cov neeg uas nyob hauv lub nroog Yeluxalees, twb yuav txog lub sijhawm uas nej rov kho tus ntsayeej uas thaiv lub nroog lawm. Thaum ntawd nej lub nroog tej ciam yuav davfo mus ntxiv. 12Nej cov neeg uas khiav mus nyob rau txhua qhov lawm sawvdaws yuav rov los. Los pem tebchaws Axilias, uas yog sab hnubtuaj los, los nram tebchaws Iziv, uas yog sab qabteb los, los ntawm tej tebchaws uas nyob ntawm ntug Dej Yufatis los, los tim tej hiavtxwv uas nyob deb thiab saum tej roob uas nyob deb los. 13Tiamsis lub ntiajteb yuav dhau mus ua ib lub tiaj suabpuam tag, vim cov neeg uas nyob rau hauv tej kev phem kev qias.
Tus TSWV Hlub cov Yixalayees
14Tus TSWV, thov koj ua tus tswv yug yaj rau Koj haivneeg, lawv yog haivneeg uas Koj tau xaiv tseg lawm. Txawm yog lawv nyob ua twmzeej rau tom tiaj suabpuam, los kuj tseem muaj tej av uas zoo qoobloo heev nyob puagncig lawv. Thov cia lawv mus noj tej zaub hauv lub tebchaws Npasas thiab Nkile-as, li lawv twb tau noj yav thaum ub lawm.
15Tus TSWV, thov Koj ua tej txujci tseemceeb rau peb pom#7:15: Nqe no sau hais tias ua tej txujci tseemceeb rau peb pom; phau lus Henplais hais tias Kuv yuav ua tej txujci rau nws pom. li Koj tau ua thaum Koj coj peb tawm hauv tebchaws Iziv los. 16Txawm yog ntau haivneeg yuav muajzog heev, los thaum lawv pom tej no, yuav ua rau lawv txajmuag. Lawv yuav pos qhovncauj thiab ntsaws pobntseg vim lawv ntshai heev. 17Lawv yuav nkag hauv av yam li tej nab; lawv yuav ntshai tsheehnyo tawm hauv lawv tej chaw nkaum los. Lawv yuav ntshai tsheehnyo tig rovqab los cuag tus TSWV uas yog peb tus Vajtswv.
18Tus TSWV, yeej tsis muaj ib tug Vajtswv uas zoo li Koj. Koj zamtxim rau Koj haivneeg uas seem rov los. Koj tsis npautaws tas mus ibtxhis, tiamsis Koj txaussiab hlo hlub peb. 19Koj yuav rov tabncuab peb dua ib zaug ntxiv. Koj yuav muab peb tej kev txhaum tsuj ntiag hauv Koj qab xibtaws thiab muab tej kev txhaum ntawd mus pov rau hauv qabthu hiavtxwv! 20Koj yuav qhia Koj txoj kev ncajncees thiab kev hlub uas ruaj-khov rau Koj haivneeg, uas yog Anplahas thiab Yakhauj cajces, rawsli Koj tau coglus rau peb cov yawgkoob thaum ub lawm.
Currently Selected:
Mikhas 7: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
