Nahus 1
1
1Nov yog cov lus uas hais txog lub nroog Nineves, thiab yog ib zaj yogtoog uas Nahus tau pom; Nahus nyob hauv lub nroog Elekauses. #Yaxaya 10:5-34; 14:24-27; Xefani 2:13-15
Tus TSWV Chim Rau Lub Nroog Nineves
2Tus TSWV uas yog Vajtswv yeej tsis tso cov neeg uas mus pehawm lwmtus nyuag vajtswv tseg;
Nws rautxim rau cov uas tawmtsam Nws.
Nws txoj kev npautaws ua rau Nws ua pauj rau Nws cov yeebncuab.
3Tus TSWV yeej tsis chim sai,
tiamsis Nws muaj hwjchim heev,
thiab Nws yeej tsis cia tus neeg txhaum dim dawb tsis raug txiavtxim.
Tus TSWV mus txog qhovtwg, nagxob nagcua sawv txog qhov ntawd;
Nws txhais kotaw ua rau tej huab ncho pa lug li tej pa hmoov av!
4Nws xaaj rau hiavtxwv, ces hiavtxwv ciali qhuav!
Nws ua rau tej dej nqhuab qhuav tag huv tibsi.
Tej tiajnrag hauv tebchaws Npasas qhuav nkig nkuav,
lub Roob Khamees qhuav dajtsaus tas,
thiab tej pajntoos uas nyob pem Lenpanoos ntsws tas.
5Tej roob siab qeeg tabmeeg tus TSWV;
thiab tej ncov roob yuav yaj tag huvsi.
Thaum tus TSWV tshwm los, lub ntiajteb uazog koog.
Lub ntiajteb thiab tej tibneeg tshee laim dais.
6Thaum Nws npautaws, leejtwg thiaj yuav dim tau?
Leejtwg thiaj yuav dim tau ntawm Nws txoj kev npautaws uas txaus ntshai heev?
Nws txoj kev chim phwj los yam nkaus li hluavtaws hlawv,
tej pobzeb tawg ua hmoov tag tabmeeg Nws.
7Tus TSWV yog tus zoo;
Nws yog lub chaw tivthaiv rau Nws haivneeg thaum tau kev txomnyem;
Nws tsomkwm cov uas tsosiab rau Nws.
8Nws rhuav Nws cov yeebncuab#1:8: Tej co ntawv qub-qub thaum ub sau hais tias cov yeebncuab; phau lus Henplais hais tias Nineves lub chaw. kom puastsuaj tag yam nkaus li dej tshoob;
Nws muab cov uas tawmtsam Nws xa mus rau txoj kev tuag.
9Nej pheej ntxeevsiab tawmtsam tus TSWV ua dabtsi?
Nws yuav rhuav kom nej puastsuaj tag.
Tsis muaj leejtwg uas yuav tawmtsam Nws txog ob zaug li!
10Nej zoo li tej pos uas sibrig thiab mus kev zoo li tej neeg qaugcawv
nej yuav raug hluavtaws hlawv yam li tej quavnyab qhuav.
11Muaj ib tug hauv nej, puvnpo txoj kev tuav tswvyim ua phem, uas tau tuavhauv tawmtsam tus TSWV, nyob hauv lub nroog Nineves tuaj ntag los sav! 12Tus TSWV hais rau Nws haivneeg Yixalayees tias, “Txawm yog cov Axilias muajzog thiab coob heev, los lawv yuav raug puastsuaj thiab ploj tag mus. Kuv haivneeg, Kuv tau ua kom nej raug kev txomnyem, tiamsis Kuv yuav tsis ua ntxiv lawm. 13Nimno Kuv yuav muab lawv tus quab ntawm nej cajdab tsoo kom tawg, thiab muab lawv tej saw hlau uas khi nej txiav kom tu.”
14Nov yog tej lus uas tus TSWV hais txog cov Axilias: “Lawv yuav tsis muaj cajces los ris lawv lub npe. Kuv yuav muab tej mlom hauv lawv tej nyuag vajtswv tej tsev rhuav kom puastsuaj tag. Kuv tabtom npaj ib lub qhovntxa rau cov Axilias lawv tsis tsimnyog ua neeg nyob lawm!”
15Saib maj, muaj ib tug xa xov tabtom taug kev hla roob coj xov zoo tuaj lawm! Nws tabtom tuaj tshajtawm txog txoj kev muajyeej! Cov Yudais, nej ciali npaj ua kevcai nojhaus zoosiab thiab muab tej khoom uas nej tau coglus tseg lawm rau Vajtswv. Cov neeg siabphem yuav tsis tuaj tua nej lub tebchaws ib zaug ntxiv lawm. Lawv twb raug puastsuaj tag lawm! #Yaxaya 52:7
Currently Selected:
Nahus 1: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
