Yausuas 23
23
Yausuas Ntuas Cov Yixalayees
1Tau ib ntus ntev loo los rau tomqab no, tus TSWV pub cov Yixalayees nyob tsosiab lug tsis ntshai tej yeebncuab uas nyob ibncig lawv. Thaum ntawd Yausuas laus heev lawm, 2nws thiaj hu tagnrho cov Yixalayees, cov txwjlaug, cov thawjcoj, cov txiavtxim, thiab cov nomtswv tuaj cuag nws, nws hais rau lawv tias, “Nimno kuv laus heev lawm. 3Nej twb pom txhua yam uas tus TSWV uas yog nej tus Vajtswv ua rau txhua haivneeg vim yog nej lawm. Tus TSWV uas yog nej tus Vajtswv yeej tuaj nej tog pab nej tua nej cov yeebncuab. 4Kuv twb muab txhua haivneeg uas nyob hauv lub tebchaws no tej av, tsis hais tej uas peb txeeb tau lawm lossis tej uas peb tseem tsis tau mus txeeb faib rau nej txhua xeem lawm. Tej av no yog txij ntua ntawm tus Dej Yauladees uas nyob sab hnubtuaj mus ti nkaus rau ntawm Hiavtxwv Meditelanees uas nyob sab hnubpoob. 5Tus TSWV uas yog nej tus Vajtswv yuav ntiab lawv tawm ntawm nej mus, thiab Nws yuav ntiab kom lawv khiav uantej nej mus rau hauv lub tebchaws. Nej yuav tau lawv lub tebchaws, rawsli tus TSWV uas yog nej tus Vajtswv tau coglus tseg rau nej lawm.
6“Yogli ntawd, nej yuavtsum ua tibzoo coj thiab ua rawsli txhua yam uas nyob rau hauv Mauxes phau Ntawv Kevcai, tsis txhob muab ib nqes tsotseg li. 7Tsis txhob mus nrog lwm haivneeg uas nrog nej nyob koom uake lossis hais txog lawv tej nyuag vajtswv lub npe lossis siv tej npe ntawd coglus lossis pehawm tej nyuag vajtswv ntawd lossis qhau hau rau tej nyuag vajtswv ntawd. 8Nej yuavtsum ncajncees rau tus TSWV ib yam li nej ibtxwm coj los txog rau niajhnub no. 9Thaum nej los nyob hauv lub tebchaws no, tus TSWV muab lwm haivneeg uas muajzog thiab muaj hwjchim ntiab tawm tabmeeg nej, tsis muaj leejtwg muaj cuabkav tiv nej li. 10Nej ib leeg xwb los yeej muaj peevxwm raws tau 1,000 leej khiav mus, rauqhov tus TSWV uas yog nej tus Vajtswv pab nej tua lawv, rawsli Nws tau coglus tseg lawm. #2Kev 32:30; 2Kev 3:22 11Yogli ntawd, nej yuavtsum ua tibzoo hlub tus TSWV uas yog nej tus Vajtswv. 12Yog nej tsis muab siab npuab tus TSWV thiab ciali mus nrog lwm haivneeg uas nrog nej nyob ua tshoob ua kos, 13kom nej paub meej-meej tias tus TSWV yuav tsis ntiab cov neeg ntawd tawm mus, tiamsis cov neeg ntawd yuav ua teebmeem rau nej, yam li ib rooj ntxiab lossis ib lub qhov cuab nej, yuav ua rau nej mob npaum nkaus li nej mag nplawm saum nej nrobqaum lossis ib yam li tus saus uas nyob hauv nej lub qhovmuag. Nej yuav raug txomnyem li ntawd mus txog hnub uas nej puastsuaj tag rau hauv lub tebchaws uas tus TSWV uas yog nej tus Vajtswv muab rau nej.
14“Nimno tub txog lub sijhawm uas kuv yuav tuag lawm. Nej txhua tus lub siab lub ntsws yeej paub tias tus TSWV uas yog nej tus Vajtswv twb pub txhua yam zoo rau nej rawsli Nws tau coglus tseg rau nej lawm. Nws yeej ua rawsli txhua lolus cogtseg uas Nws hais, tsis poob ib los li. 15Tiamsis yog Nws twb muab txhua yam zoo rau nej rawsli Nws tau coglus tseg lawm, Nws yeej yuav muab txhua yam phem uas Nws tau coglus tseg rau nej thiab. 16Yog nej tsis coj rawsli tej lus cogtseg uas tus TSWV uas yog nej tus Vajtswv tau xaaj rau nej, thiab tseem mus tiam thiab pehawm lwm haivneeg tej nyuag vajtswv, mas Nws yuav chim thiab rautxim rau nej, ces tsis ntev nej yuav puastsuaj tas rau hauv lub tebchaws zoo uas Nws muab rau nej no li.”
Currently Selected:
Yausuas 23: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
