Yausuas 24
24
Yausuas Hais Rau Cov Yixalayees Ntawm Sekhees
1Ces Yausuas txawm hu tagnrho cov Yixalayees txhua xeem tuaj txoos uake rau ntawm Sekhees. Nws kom cov txwjlaug, cov thawjcoj, cov txiavtxim, thiab cov Yixalayees tej nomtswv tuaj nyob tabmeeg Vajtswv. 2Yausuas hais rau sawvdaws tias, “Tus TSWV uas yog cov Yixalayees tus Vajtswv hais li no: ‘Thaum ub nej cov yawgkoob nyob ntawm ntug Dej Yufatis sab tid thiab lawv pehawm lwmtus nyuag vajtswv. Cov yawgkoob ntawd ib tug yog Telas, uas yog Anplahas thiab Nahaus txiv. #Chiv 11:27 3Kuv coj nej yawgkoob Anplahas tawm hauv lub tebchaws ntawd hla tus Dej Yufatis thiab coj nws mus thoobplaws tebchaws Kana-as. Kuv pub nws muaj xeebntxwv coob los ntawm nws tus tub Ixaj. #Chiv 12:1-9; Chiv 21:1-3 4Kuv pub Ixaj muaj Yakhauj thiab Exaus. Kuv muab lub tebchaws Edoos uas ua laj roob rau Exaus ua nws tug, tiamsis nej yawgkoob Yakhauj thiab nws cov menyuam khiav mus nyob nram tebchaws Iziv. #Chiv 25:24-26; Chiv 36:8; 2Kev 2:5; Chiv 46:1-7 5Tomqab ntawd Kuv txib Mauxes thiab Aloos mus thiab Kuv tso tej kev siv kev npog los rau tebchaws Iziv, tiamsis Kuv coj nej tawm los; #Khiav 3:1—12:42 6Kuv coj nej cov yawgkoob tawm hauv tebchaws Iziv los, mas cov Iziv tau caij nees thiab tsheb nees caum lawv tua. Tiamsis thaum nej cov yawgkoob los txog ntawm Hiavtxwv Liab, #Khiav 14:1-31 7lawv tau quaj thov Kuv pab, Kuv thiaj tso kev tsausntuj los quas nkaus lawv thiab cov Iziv. Kuv ua kom hiavtxwv nphau los npog nkaus cov Iziv ua rau lawv tuag tas. Nej paub tias Kuv tau ua licas rau lub tebchaws Iziv.’
“ ‘Nej nyob ntawm tiaj suabpuam tau ntev heev. 8Kuv thiaj coj nej los rau hauv cov Amaules lub tebchaws uas nyob ntawm tus Dej Yauladees sab hnubtuaj. Cov Amaules tua nej, tiamsis Kuv cia nej tua yeej lawv. Kuv ua rau lawv puastsuaj tabmeeg nej thiab cia nej txeeb tau lawv lub tebchaws. #Teev 21:21-35 9Xipaus tus tub Npalaj uas ua vajntxwv kav tebchaws Mau-am tuaj tua nej. Nws txib neeg mus hais rau Npe-aus tus tub Npala-as, kom tuaj foom phem rau nej. 10Tiamsis Kuv tsis mloog Npala-as tej lus, yogli ntawd Npala-as thiaj foom koobhmoov rau nej. Kuv ua li ntawd, yog Kuv cawm nej dim ntawm Npalaj tes. #Teev 22:1—24:25
11“ ‘Nej hla tus Dej Yauladees mus rau hauv lub nroog Yelikaus. Cov neeg hauv Yelikaus tuaj tua nej, cov Amaules, cov Pelixes, cov Kana-as, cov Hitis, cov Nkawkasis, cov Hivis, thiab cov Yenpus los kuj tuaj tua nej, tiamsis Kuv cia nej tua yeej lawv. #Yaus 3:14-17; Yaus 6:1-21 12Thaum nej tabtom los txeem lawv lub tebchaws, Kuv ua rau lawv ntshai heev, nej thiaj caum tau cov Amaules ob tug vajntxwv tawm. Nej yeej tsis tau muab nej tej hneevnti thiab ntaj tua hlo li. #Khiav 23:28; 2Kev 7:20 13Kuv muab lub tebchaws uas nej tsis tau rhawv thiab tej nroog uas nej tsis tau tsim pub rau nej nyob. Nimno nej los nyob hauv tej nroog ntawd, nej tau noj tej txivhmab thiab tej txiv ntoo-roj uas tsis yog nej cog.’ ” #2Kev 6:10-11
14Yausuas hais ntxiv tias, “Txij no mus, nej yuavtsum hwm tus TSWV thiab tiam Nws ntawm lub siab dawbpaug thiab ncajncees. Muab tej nyuag vajtswv uas nej cov yawgkoob pehawm tim tebchaws Mexuputamias thiab hauv tebchaws Iziv povtseg, es ciali tiam tus TSWV tibleeg xwb. 15Yog nej tsis txaussiab tiam tus TSWV, hnubno nej ciali txiavtxim siab seb nej yuav tiam leejtwg. Nej yuav tiam tej nyuag vajtswv uas nej cov yawgkoob pehawm tim tebchaws Mexuputamias lossis tiam tej nyuag vajtswv uas cov Amaules pehawm hauv lub tebchaws uas nej nyob no. Ntawm kuv thiab kuv tsev neeg, peb yuav tiam tus TSWV xwb.”
16Cov neeg teb tias, “Peb yuav tsis tso tus TSWV tseg thiab mus tiam lwmtus nyuag vajtswv hlo li! 17Tus TSWV uas yog peb tus Vajtswv tau coj peb cov yawgkoob thiab peb tawm ntawm kev ua luag qhev nram tebchaws Iziv los, thiab peb twb pom tej txujci tseemceeb uas Nws tau ua lawm. Tus TSWV tsomkwm thiab nrognraim peb hauv tej tebchaws uas peb los dhau lawm txhua qhov. 18Tus TSWV ntiab cov Amaules uas nyob hauv lub tebchaws no tawm mus uantej peb los nyob. Yogli ntawd, peb yuav tiam tus TSWV uas yog peb tus Vajtswv xwb.”
19Yausuas hais rau lawv tias, “Ntshai nej yuav tiam tsis tau tus TSWV, rauqhov Nws yog Vajtswv tus dawbhuv thiab Nws khib nej heev. Nws yuav tsis zamtxim rau nej txoj kev ntxeevsiab thiab nej lub txim li. 20Yog nej tso tus TSWV tseg es mus tiam lwm haivneeg tej nyuag vajtswv, Nws yuav tawmtsam thiab rautxim rau nej. Txawm yog yav tas los Nws tau ua zoo rau nej lawm los Nws yuav ua kom nej puastsuaj mus.”
21Cov neeg hais rau Yausuas tias, “Peb yuav tsis ua li ntawd! Peb yuav tiam tus TSWV xwb.” 22Yausuas hais rau lawv tias, “Nej ua timkhawv rov rau nej tias nej yeej xaiv yuav tiam tus TSWV xwb.”
Lawv teb tias, “Yog lawm, peb thov ua timkhawv li ntawd.”
23Yausuas hais rau lawv tias, “Yogli ntawd mas nej yuavtsum tso lwm haivneeg tej nyuag vajtswv uas nej muaj ntawd tseg, muab siab npuab tus TSWV uas yog cov Yixalayees tus Vajtswv.”
24Lawv hais rau Yausuas tias, “Peb yuav tiam tus TSWV uas yog peb tus Vajtswv thiab mloog Nws tej lus.”
25Hnub ntawd Yausuas thiaj coglus rau#24:25: rau; lossis nrog. lawv, thiab muab tej kevcai los qhia rau lawv ntawm Sekhees, kom lawv coj rawsli ntawd. 26Yausuas sau tej kevcai ntawd rau hauv phau ntawv uas teev Vajtswv txoj Kevcai. Nws muab ib lub pobzeb loj los teeb rau hauvqab tsob ntoo qhib ntawm lub chaw pehawm tus TSWV. 27Nws hais rau lawv tias, “Lub pobzeb no yuav ua timkhawv rau peb. Lub pobzeb no hnov txhua lolus uas tus TSWV tau hais rau peb; nws yuav ua timkhawv tawmtsam nej, kom nej tsis txhob ntxeevsiab rau nej tus Vajtswv.” 28Ces Yausuas txawm kom lawv rovqab mus tsev, thiab lawv nyias rov mus rau nyias lub tebchaws lawm.
Yausuas Thiab Ele-axas Tuag
29Tomqab ntawd, tus TSWV tus tubtxib uas yog Noos tus tub Yausuas thiaj tuag thaum nws hnubnyoog muaj 110 xyoo. 30Lawv muab nws log rau hauv nws thaj av ntawm lub nroog Tinas Xelas, pem lub laj roob hauv tebchaws Efalayees uas nyob ntawm lub Roob Nka-as sab qaumteb. #Yaus 19:49-50
31Tiam uas Yausuas tseem ua neej nyob, cov Yixalayees yeej tiam tus TSWV, thiab tomqab uas nws tuag lawm los lawv yeej tiam tus TSWV mus txog ntu uas cov thawjcoj tiam ntawd tseem ua neej nyob thiab pom txhua yam uas tus TSWV tau ua pab cov Yixalayees.
32Yauxej lub cev uas cov Yixalayees coj nram tebchaws Iziv los, lawv muab faus rau ntawm Sekhees, hauv thaj av uas Yakhauj muab 100 lub txiajnyiag yuav ntawm Hamaus uas yog Sekhees txiv los. Thaj av ntawd yog Yauxej cajces li qubtxeeg qubteg. #Chiv 33:19; 50:24-25; Khiav 33:19; Yauh 4:5; Teshl 7:16
33Aloos tus tub Ele-axas tuag thiab lawv muab nws log rau ntawm lub moos Nkinpe-as uas muab tu rau nws tus tub Finehas hauv tebchaws Efalayees uas ua laj roob.
Currently Selected:
Yausuas 24: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
