Yausuas 22
22
Cov Xeem Uas Nyob Sab Hnubtuaj Rov Mus Tsev
1Yausuas hu tagnrho xeem Lunpees, xeem Nkaj, thiab xeem Manaxes Sab Hnubtuaj los cuag nws. 2Yausuas hais rau lawv tias, “Nej tau ua txhua yam uas tus TSWV tus tubtxib Mauxes tau xaaj rau nej ua, thiab nej twb ua rawsli kuv hais lawm. #Teev 32:20-32; Yaus 1:12-15 3Txij thaum pib los txog nimno, nej tsis tso nej cov kwvtij Yixalayees tseg li. Nej ua tibzoo mloog thiab ua rawsli tus TSWV uas yog nej tus Vajtswv tej lus xaaj. 4Nimno nej cov kwvtij Yixalayees twb nyob thajyeeb lug rawsli tus TSWV uas yog nej tus Vajtswv tau coglus tseg lawm. Yogli ntawd, nej ciali rov mus tsev, mus rau lub tebchaws uas yog nej tug, nyob ntawm tus Dej Yauladees sab hnubtuaj uas tus TSWV tus tubtxib Mauxes twb muab rau nej lawm. 5Nej yuavtsum ncontsoov ua rawsli tej kevcai uas Mauxes tau xaaj rau nej lawm hais tias: hlub tus TSWV uas yog nej tus Vajtswv, ua rawsli Nws siab nyiam, ua rawsli Nws tej kevcai, ncajncees rau Nws, thiab tiam Nws kom kawg nej lub siab lub ntsws.”
6-8Yausuas foom koobhmoov rau lawv thiab tso lawv mus tsev nrog cov lus no: “Nej rov mus tsev nrog txoj kev muajtxiag npluanuj, muaj tsiajtxhu coob, muaj nyiaj muaj kub, muaj tooj muaj hlau, thiab muaj tsoostsho hnav ntau heev. Ncontsoov muab tej uas nej mus txeeb tau ntawm nej cov yeebncuab los faib rau nej tej kwvtij.” Ces lawv txawm rov mus tsev lawm.
Mauxes twb muab lub tebchaws ntawm tus Dej Yauladees sab hnubtuaj faib rau ibnrab xeem Manaxes lawm, tiamsis Yausuas muab lub tebchaws ntawm tus Dej Yauladees sab hnubpoob faib rau ibnrab xeem Manaxes thiab lwm xeem.
9Yogli ntawd, Xeem Lunpees, xeem Nkaj, thiab xeem Manaxes Sab Hnubtuaj thiaj rov mus tsev. Lawv tso lawv cov kwvtij Yixalayees rau ntawm lub nroog Silaus hauv tebchaws Kana-as thiab lawv rov mus rau tebchaws Nkile-as uas lawv txeeb tau los rawsli tus TSWV tau xaaj tseg rau Mauxes kom hais rau lawv lawm.
Lub Thaj Ntawm Ntug Dej Yauladees
10Thaum xeem Lunpees, xeem Nkaj, thiab xeem Manaxes Sab Hnubtuaj rov los txog hauv Nkelilaus, uas tseem nyob ntawm ntug dej Yauladees sab hnubpoob,#22:10: sab hnubpoob; lossis sab hnubtuaj. lawv teeb tau ib lub thaj loj thiab zoo heev rau ntawm ntug dej. 11Muaj neeg mus qhia rau cov kwvtij Yixalayees hais tias, “Nej mloog nawb! Xeem Lunpees, xeem Nkaj, thiab xeem Manaxes Sab Hnubtuaj tau teeb ib lub thaj rau ntawm Nkelilaus, uas nyob ntawm ntug Dej Yauladees uas yog peb sab lawm!” 12Thaum cov Yixalayees hnov li ntawd, lawv sawvdaws txawm tuaj sibsau rau hauv Silaus thiab npaj mus uarog nrog cov xeem uas nyob sab hnubtuaj.
13Thaum ntawd cov Yixalayees thiaj tso tus povthawj hlob Finehas uas yog Ele-axas tus tub mus cuag xeem Lunpees, xeem Nkaj, thiab xeem Manaxes Sab Hnubtuaj uas nyob hauv tebchaws Nkile-as. 14Muaj kaum leej thawjcoj, ib xeem ib leeg ntawm cov xeem uas nyob sab hnubpoob thiaj nrog Finehas mus; lawv puavleej yog cov thawj ntawm tej tsev neeg thiab tej cuab. 15Lawv mus cuag xeem Lunpees, xeem Nkaj, thiab xeem Manaxes Sab Hnubtuaj hauv tebchaws Nkile-as, 16thiab hais rau tus TSWV haivneeg txhua tus hais tias, “Vim licas nej ua tej kev phem no tawmtsam cov Yixalayees tus Vajtswv? Qhov uas nej teeb lub thaj no rau nej, yog nej ntxeevsiab rau tus TSWV! Nej ciali tsis mloog Nws hais lawm! #2Kev 12:13-14 17Nej puas nco tau tej kev txhaum uas peb ua nyob ntawm Pe-aus uas tus TSWV tau tso subtawg subntsha rautxim rau Nws haivneeg? Niajhnub no peb raug txomnyem twb yog vim tej ntawd ntag. Tej kev txhaum ntawd tseem tsis tau txaus thiab lov? #Teev 25:1-9 18Nej tseem yuav tso tus TSWV tseg thiab lov? Yog hnubno nej ntxeevsiab rau tus TSWV, mas tagkis Nws yuav chim rau peb cov Yixalayees txhua tus. 19Zaumno, yog nej lub tebchaws tsis huv rau kev pehawm, nej ciali tuaj rau tim tus TSWV lub tebchaws uas teeb Nws lub Tsevntaub. Tuaj es peb yuav muab av rau nej. Tiamsis nej tsis txhob ntxeevsiab rau tus TSWV lossis ntxeevsiab rau peb thiab mus teeb dua lwm lub thaj ntxiv rau tus TSWV uas yog peb tus Vajtswv lub. 20Nej ncontsoov tias Xelas tus tub Akhas tsis ua rawsli tus TSWV tej lus, uas yog nws ua tsis ncaj rau tej khoom uas muab fij rau tus TSWV; tagnrho cov Yixalayees thiaj raug txim vim tej ntawd. Tsis yog Akhas tuag ib leeg xwb tiamsis muaj ntau leej tuag nrog Akhas vim nws tej kev txhaum.” #Yaus 7:1-26
21Xeem Lunpees, xeem Nkaj, thiab xeem Manaxes Sab Hnubtuaj teb rau cov thawjcoj ntawm tej tsev neeg ntawm cov xeem uas nyob sab hnubpoob hais tias, 22“Tus muaj Hwjchim Loj yog Vajtswv! Nws yog tus TSWV! Tus muaj Hwjchim Loj yog Vajtswv! Nws yog tus TSWV! Nws paub tias vim licas peb thiaj ua li no, thiab peb xav kom nej paub thiab! Yog tias peb ntxeevsiab thiab ua tsis ncaj rau tus TSWV, thov nej tsis txhob pub kom peb muaj sia nyob hlo li! 23Yog tias peb tsis mloog tus TSWV lus, es ciali mus teeb thaj thiab hlawv peb tej khoom theej txhoj, ciali siv tej nplej lossis tej khoom fij ua kev sib raugzoo rau saud, ces thov kom tus TSWV rautxim rau peb. 24Tsis yog li ntawd! Qhov uas peb teeb lub thaj no, yog peb ntshai nyobtsam yav tomntej nej tej cajces yuav hais rau peb tej cajces tias, ‘Nej tau ua dabtsi txuam nrog tus TSWV uas yog cov Yixalayees tus Vajtswv? 25Tus TSWV tau muab tus Dej Yauladees ua tus ciam quas nruabnrab ntawm peb thiab nej, uas yog xeem Lunpees thiab xeem Nkaj. Nej yeej tsis tau ua dabtsi rau tus TSWV hlo li.’ Thaum ntawd nej cov cajces yuav ua rau peb cov cajces tso txoj kev pehawm tus TSWV tseg. 26Yogli ntawd, peb thiaj teeb lub thaj no, tsis yog teeb los hlawv tsiaj fij lossis hlawv khoom fij, 27tiamsis yog peb teeb los ua lub cim qhia rau peb thiab nej, thiab rau ntau tiam tomqab peb kom lawv paub tias peb yeej pehawm tus TSWV, yeej hlawv khoom theej txhoj thiab fij khoom ua kev sib raugzoo ntawm tus TSWV lub Tsevntaub. Tej no yog peb ua tseg kom nej tej cajces tsis txhob hais tias peb tej cajces tsis tau ua dabtsi rau tus TSWV li. 28Tej no yog tej uas peb xav tseg, yog tias lam muaj tseeb li ntawd tiag, peb tej cajces thiaj muaj lushais tias, ‘Saib maj! Peb cov yawgkoob muaj lub thaj zoo ib yam li tus TSWV lub thiab. Tsis yog teeb los hlawv tsiaj lossis hlawv khoom fij, tiamsis yog teeb los ua lub cim tseg rau nej thiab peb.’ 29Tsis yog peb yuav ciali ntxeevsiab rau tus TSWV lossis tso Nws tseg, es ciali mus teeb dua ib lub thaj hlawv tsiaj, hlawv nplej lossis lwmyam khoom fij rau saud. Peb yeej yuav tsis teeb dua lwm lub thaj hlo li, tsuas yog tus TSWV uas yog peb tus Vajtswv lub uas nyob ntawm tus TSWV lub Tsevntaub Sibntsib hauvntej xwb.”
30Tus povthawj hlob Finehas thiab kaum leej thawjcoj uas sawvcev tsoom pejxeem uas yog cov thawj ntawm tej tsev neeg ntawm cov xeem nyob sab hnubpoob uas nrog Finehas mus ntawd, hnov tej lus uas xeem Lunpees, xeem Nkaj, thiab xeem Manaxes Sab Hnubtuaj hais, lawv thiaj txaussiab. 31Tus povthawj hlob Finehas uas yog Ele-axas tus tub hais rau lawv tias, “Nimno peb paub tias tus TSWV nrog peb nyob. Tsis yog nej ntxeevsiab rau Nws, tiamsis yog nej cawm kom cov Yixalayees dim tus TSWV txoj kev rautxim xwb.”
32Finehas thiab cov thawjcoj uas nrog nws mus thiaj tso xeem Lunpees, xeem Nkaj, thiab xeem Manaxes Sab Hnubtuaj rau hauv tebchaws Nkile-as thiab rov los cuag cov Yixalayees rau hauv tebchaws Kana-as, thiab tshabxo rau lawv paub. 33Cov Yixalayees txaussiab thiab ua Vajtswv tsaug. Lawv tsis hais txog qhov uas yuav tua thiab rhuav lub tebchaws uas xeem Lunpees, thiab xeem Nkaj nyob lawm.
34Xeem Lunpees thiab xeem Nkaj hais tias, “Lub thaj no ua timkhawv rau peb sawvdaws tias tus TSWV yog Vajtswv.” Yogli ntawd, lawv thiaj tis npe rau lub thaj ntawd hu ua “Timkhawv.”
Currently Selected:
Yausuas 22: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
