Yausuas 21
21
Xeem Levis Cov Nroog
1Xeem Levis cov thawjcoj mus cuag tus povthawj hlob Ele-axas, Noos tus tub Yausuas, thiab cov thawjcoj ntawm tej tsev neeg hauv txhua xeem Yixalayees, 2ntawm lub nroog Silaus hauv tebchaws Kana-as thiab hais tias, “Tus TSWV tau xaaj rau Mauxes kom muab ib co nroog rau peb nyob, uas yog muaj tshav zaub nyob ibncig rau peb tej tsiaj tau noj.” #Teev 35:1-8 3Yogli ntawd, cov thawjcoj thiaj faib tej nroog uas muaj tshav zaub hauv lawv tej cheebtsam rau xeem Levis rawsli tus TSWV tau xaaj rau cov Yixalayees lawm.
4Xeem Levis uas yog cuab Kauhas yog thawj pab uas cov thawjcoj faib nroog rau. Tus povthawj hlob Aloos cov xeebntxwv tej tsev neeg tau kaum-peb lub nroog hauv xeem Yudas, xeem Xime-oos, thiab xeem Npeeyamees li cheebtsam av. 5Dua li lwm tsev neeg ntawm cuab Kauhas, tau kaum lub nroog hauv xeem Efalayees, xeem Das, thiab xeem Manaxes Sab Hnubpoob li cheebtsam av.
6Cuab Nkawsoos tau kaum-peb lub nroog hauv xeem Ixakhas, xeem Asaws, xeem Nathalis thiab xeem Manaxes Sab Hnubtuaj li cheebtsam av.
7Cuab Melalis tej tsev neeg tau kaum-ob lub nroog hauv xeem Lunpees, xeem Nkaj, thiab xeem Xenpuloos cheebtsam av.
8Cov Yixalayees rho ntawv#21:8: rho ntawv: saib 14:2. faib tej nroog uas muaj tshav zaub rau xeem Levis rawsli tus TSWV tau xaaj rau Mauxes lawm.
9Nov yog tej npe nroog hauv xeem Yudas thiab xeem Xime-oos cheebtsam av uas muab faib 10rau Aloos cov xeebntxwv uas yog cuab Kauhas thiab yog Levis cov xeebntxwv. Lawv yog thawj pab uas xub los rho ntawv tau. 11Lawv rho tau lub nroog Alanpas (Alanpas yog Anas txiv) uas nimno yog lub nroog Henploos, hauv xeem Yudas cheebtsam av ua laj roob uas muaj tshav zaub nyob ibncig. 12Tiamsis tej teb thiab tej moos uas nyob ibncig lub nroog ntawd twb xub muab rau Yefunes tus tub Kalej ua nws tug lawm.
13Cov nroog uas muab ntxiv rau lub nroog Henploos (uas yog ib lub nroog cawmsiav), uas muab faib rau tus povthawj hlob Aloos cov xeebntxwv yog: Linas, 14Yatis, Esetemu-as 15Hauloos, Denpis, 16Ayees, Yutas, thiab Npes Semes, nrog rau lawv tej tshav zaub: cuaj lub nroog nyob hauv xeem Yudas thiab xeem Xime-oos cheebtsam av. 17Hauv xeem Npeeyamees cheebtsam av yog muaj plaub lub nroog: Nkinpe-oos, Nkenpas, 18Anathaus, thiab Alimoos, nrog rau lawv tej tshav zaub. 19Tagnrho kaum-peb lub nroog nrog rau lawv tej tshav zaub, puavleej muab faib rau Aloos cov xeebntxwv uas ua povthawj hlob.
20Xeem Levis lwm tsev neeg uas yog cuab Kauhas yog tau cov nroog hauv xeem Efalayees cheebtsam av. 21Lawv tau plaub lub nroog: Sekhees (uas yog ib lub nroog cawmsiav) uas muaj tshav zaub nyob hauv xeem Efalayees cheebtsam av uas ua laj roob, Nkexaws, 22Kixais, thiab Npes Hauloos, nrog rau lawv tej tshav zaub. 23Hauv xeem Das cheebtsam av, lawv tau plaub lub nroog: Etekes, Nkinpethoos, 24Aiyaloos, thiab Nkalimoos, nrog rau lawv tej tshav zaub. 25Hauv xeem Manaxes Sab Hnubpoob cheebtsam av, lawv tau ob lub nroog: Ta-anaj thiab Nkalimoos, nrog rau lawv tej tshav zaub. 26Cuab Kauhas tej tsev neeg yog tau tagnrho kaum lub nroog, nrog rau lawv tej tshav zaub huv tibsi.
27Xeem Levis uas yog cuab Nkawsoos tau ob lub nroog hauv xeem Manaxes Sab Hnubtuaj cheebtsam av: Nkaulas (yog ib lub nroog cawmsiav) uas nyob hauv Npasas thiab Npesestelas, nrog rau lawv tej tshav zaub. 28Hauv Xeem Ixakhas cheebtsam av, lawv tau plaub lub nroog: Kisi-oos, Danpelas, 29Yamus, thiab Enkanees, nrog rau lawv tej tshav zaub. 30Hauv xeem Asaws cheebtsam av, lawv tau plaub lub nroog: Misas, Adoos, 31Helekas, thiab Lehaus, nrog rau lawv tej tshav zaub. 32Hauv xeem Nathalis cheebtsam av, lawv tau peb lub nroog: Kedes (uas yog ib lub nroog cawmsiav) uas nyob hauv Kalilais, Hamus Daus, thiab Kataas, nrog rau lawv tej tshav zaub. 33Cuab Nkawsoos tej tsev neeg tau tagnrho kaum-peb lub nroog nrog rau lawv tej tshav zaub huv tibsi.
34Xeem Levis lwmpab uas yog cuab Melalis, tau plaub lub nroog hauv xeem Xenpuloos cheebtsam av: Yaune-as, Katas, 35Dinas, thiab Nahalas, nrog rau lawv tej tshav zaub. 36Hauv xeem Lunpees cheebtsam av, lawv tau plaub lub nroog: Npexaws, Yahaj, 37Kedemaus, thiab Mefa-as, nrog rau lawv tej tshav zaub. 38Hauv xeem Nkaj cheebtsam av, lawv tau plaub lub nroog: Lamaus (uas yog ib lub nroog cawmsiav) uas nyob hauv Nkile-as, Mahana-ees, 39Hesenpoos, thiab Yaxaws, nrog rau lawv tej tshav zaub. 40Yogli ntawd, cov nroog uas muab rau cuab Melalis tagnrho muaj kaum-ob lub nroog.
41-42Thoobplaws hauv lub tebchaws uas cov Yixalayees nyob, lawv muab plaubcaug-yim lub nroog, nrog rau lawv tej tshav zaub uas nyob puagncig rau xeem Levis.
Cov Yixalayees Tau Tebchaws
43Thaum lawv mus tua thiab txeeb tau tagnrho lub tebchaws uas tus TSWV tau coglus tseg rau lawv cov yawgkoob hais tias yuav muab rau lawv lawm. Lawv txawm los nyob rau hauv lub tebchaws ntawd. 44Tus TSWV pub lawv tau nyob thajyeeb lug hauv lub tebchaws ntawd rawsli Nws tau coglus tseg rau lawv cov yawgkoob lawm. Lawv tej cov yeebncuab yeej tsis muaj ib tug uas muaj cuabkav tuaj tawmtsam lawv li, rauqhov tus TSWV cia cov Yixalayees kovyeej tagnrho lawv tej yeebncuab. 45Tus TSWV tau ua rawsli Nws tau coglus tseg rau cov Yixalayees txhua nqe huv tibsi.
Currently Selected:
Yausuas 21: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
