Yausuas 18
18
Faib Tej Av Uas Seem
1Tomqab cov Yixalayees tua thiab txeeb tau tebchaws tag lawm, tagnrho cov Yixalayees tuaj sibsau rau hauv Silaus thiab tsa lub Tsevntaub Sibntsib. 2Tiamsis tseem tshuav cov Yixalayees xya xeem uas tsis tau faib av rau lawv.
3Yogli ntawd, Yausuas thiaj hais rau cov Yixalayees tias, “Nej tseem yuav tos txog thaum twg es nej mamli mus txeeb lub tebchaws uas tus TSWV, uas yog nej cov yawgkoob tus Vajtswv, twb muab rau nej lawm? 4Nej ciali xaiv ib xeem twg peb leeg txivneej. Kuv yuav txib lawv mus kom thoob lub tebchaws, mus ntsuas tej cheebtsam uas lawv xav tau los ua lawv tug. Tomqab ntawd lawv mam rov los cuag kuv. 5Kom lawv muab lub tebchaws no faib ua xya feem rau lawv; xeem Yudas yuav nyob feem sab qabteb, thiab xeem Yauxej yuav nyob feem sab qaumteb. 6Nej muab xya feem av ntawd sau kom meej rau hauv ntawv thiab coj los rau kuv. Kuv yuav rho ntawv#18:6: rho ntawv: Saib 14:2 thiab nug tus TSWV uas yog peb tus Vajtswv thiab faib av rau nej. 7Tiamsis xeem Levis yuav tsis nrog nej tau av, rauqhov lawv feem tug yog ua cov povthawj hlob uas ua tus TSWV haujlwm. Tiamsis xeem Nkaj, xeem Lunpees, thiab ibnrab xeem Manaxes, ces lawv twb tau lawv qhov av ntawm tus dej Yauladees sab hnubtuaj, uas tus TSWV tus tubtxib Mauxes, twb muab faib rau lawv lawm.”
8Thaum cov txivneej ntawd sawvkev mus ntsuas tebchaws, Yausuas thiaj tau xaaj rau lawv tias “Nej ciali mus ntsuas kom thoob lub tebchaws thiab muab sau rau hauv ntawv coj los rau kuv, kuv yuav nyob hauv Silaus no rho ntawv thiab nug tus TSWV.” 9Cov txivneej ntawd txawm mus thoobplaws lub tebchaws thiab los zaum tsaws sau seb lawv yuav muab xya feem ntawd faib ua licas, thiab sau tej npe licas rau txhua lub moos. Ces lawv rov los cuag Yausuas hauv Silaus. 10Yausuas thiajli rho ntawv tabmeeg tus TSWV, thiab muab tej av ntawd faib rau xya xeem Yixalayees ib xeem ib feem.
Faib Av Rau Xeem Npeeyamees
11Xeem Npeeyamees yog thawj pab uas Yausuas xub faib av rau. Lawv cheebtsam av nyob ntu nruabnrab ntawm xeem Yudas thiab xeem Yauxej. 12Lawv tus ciam sab qaumteb yog txij ntua ntawm tus Dej Yauladees nce mus rau zaj ntav toj ntawm Yelikaus sab qaumteb, mus rau sab hnubpoob hla cheebtsam uas ua laj roob thiab mus rau tiaj suabpuam Npethavees. 13Tus ciam mus rau zaj ntav toj uas nyob sab qabteb ntawm lub nroog Lus (uas hu ua Npethees), nqis mus rau Atalaus Adas, mus rau saum lub roob uas nyob sab qabteb ntawm Npes Hauloos Theem Qis. 14Tus ciam puav lub roob no sab hnubpoob mus rau sab qabteb, thiab mus rau ntawm Kili-as Npa-as (lossis Kili-as Ye-alees), uas yog xeem Yudas av. Nov yog tus ciam sab hnubpoob.
15Tus ciam sab qabteb yog txij ntua ntawm ceskaum nroog Kili-as Ye-alees thiab mus rau#18:15: Nqe no saud hais tias thiab mus rau; phau lus Henplais hais tias thiab mus rau sab hnubpoob. ntawm cov Qhovdej Netau-as. 16Tus ciam nqis mus rau ntawm lub taw roob uas ntsiantsoov lub Hav Hinoos, ntawm sab qaumteb uas lub Hav Lefayees mus xaus. Tus ciam nqis mus hla sab qabteb lub Hav Hinoos, mus rau zaj ntav toj sab ntawm Yenpus, thiab nqis mus rau Eelaunkees. 17Tus ciam txawm lem rau sab qaumteb mus rau Eesemes, mus rau Nkelilaus uas nyob ncaj lub Dawm Adumees. Tus ciam txawm nqis mus rau ntawm Npuhas lub Pobzeb (Npuhas yog Lunpees tus tub) 18thiab hla sab qaumteb ntawm zaj ntav toj uas ntsiantsoov rau hauv lub Hav Yauladees. Tus ciam nqis mus rau hauv lub voshav ntawd 19thiab hla mus rau zaj ntav toj ntawm Npes Haunkelas sab qaumteb, thiab mus xaus rau sab qaumteb ntawm Hiavtxwv Tuag uas tus dej Yauladees los tshuam. Nov yog tus ciam kawg sab qabteb. 20Tus dej Yauladees ua tus ciam ntawm sab hnubtuaj. Tej no yog cheebtsam av uas tu rau xeem Npeeyamees ua lawv tug rawsli lawv tej tsev neeg.
21Cov nroog uas faib rau xeem Npeeyamees ua lawv tug rawsli lawv tej tsev neeg yog: Yelikaus, Npes Haunkelas, Emej Kexis, 22Npes Alanpas, Xemalayees, Npethees, 23Avis, Palas, Aufalas, 24Khefalamaunis, Aufanis, thiab Nkenpas: kaum-ob lub nroog thiab tej moos uas nyob ibncig. 25Kuj muaj Nkinpe-oos, Lamas, Npe-elaus, 26Mixepas, Khefilas, Mauxas, 27Lekees, Ipe-ees, Talalas, 28Xelas, Ha-eles, Yenpus (lossis Yeluxalees), Nkinpe-as, thiab Kili-as Ye-alees: kaum-plaub lub nroog thiab tej moos uas nyob ibncig. No yog cheebtsam av uas faib rau xeem Npeeyamees ua lawv tug rawsli lawv tej tsev neeg.
Currently Selected:
Yausuas 18: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
