Yausuas 17
17
Xeem Manaxes Sab Hnubpoob
1Muab feem av ntawm tus Dej Yauladees sab hnubpoob faib rau Yauxej tus tub hlob Manaxes cajces ua lawv tug rawsli lawv tej tsev neeg. Makhaws, uas yog Nkile-as txiv, yog Manaxes tus tub hlob thiab nws yog ib tug tubrog uas ua tau heev; yogli ntawd, lawv thiaj muab cheebtsam Nkile-as thiab Npasas, ntawm tus dej Yauladees sab hnubtuaj rau nws. 2Muab feem av ntawm tus Dej Yauladees sab hnubpoob faib rau xeem Manaxes uas tseem tsis tau muaj av rawsli lawv tej tsev neeg: Anpi-exaws, Helej, Aliyees, Sekhees, Hefaws thiab Semidas. Lawv yog Yauxej tus tub hlob Manaxes li cajces uas ua thawjcoj rau lawv tej tsev neeg. 3Hefaws tus tub Xelaufehas muaj ntxhais xwb tsis muaj tub. Hefaws yog Nkile-as tub, Nkile-as yog Makhaws tub, Makhaws yog Manaxes tub. Xelufehas cov ntxhais yog Malas, Nau-as, Haunkelas, Milekas thiab Tilexas. 4Lawv txawm mus thov tus povthawj hlob Ele-axas, thiab Noos tus tub Yausuas, thiab cov thawjcoj hais tias, “Tus TSWV tau xaaj rau Mauxes kom faib av rau peb ua peb tug ib yam li faib rau peb tej nus kwvtij.” Yogli ntawd, vim tus TSWV tau xaaj tseg lawm, cov thawjcoj thiaj faib av rau lawv ib yam li faib rau lawv tej nus kwvtij. #Teev 27:1-7 5Vimli ntawd, xeem Manaxes thiaj tau av tshaj kaum feem ntxiv rau cheebtsam Nkile-as thiab Npasas uas nyob ntawm tus Dej Yauladees sab hnubtuaj, 6rauqhov Manaxes li cajces, tsis hais cov ntxhais lossis cov tub, puavleej muaj feem tau av ua lawv tug. Yogli ntawd, thiaj muab cheebtsam Nkile-as faib rau tagnrho Manaxes li cajces ua lawv tug.
7Manaxes cheebtsam av tus ciam pib ntawm Asaws mus rau ntawm lub nroog Mimethas uas nyob ntawm Sekhees sab hnubtuaj. Tus ciam nqis mus rau sab qabteb, mus txog ntawm cov neeg Eetapuas tus ciam. 8Feem av uas nyob ibncig lub nroog Tapuas puavleej yog xeem Manaxes li, tiamsis lub moos Tapuas uas nyob ntawm tus ciam yog Efalayees cov xeebntxwv li. 9Tus ciam nqis mus rau ntawm tus dej Kanas. Txawm yog cov nroog uas nyob sab qabteb ntawm tus dej Kanas hauv xeem Manaxes tus ciam los cov nroog ntawd puavleej yog xeem Efalayees li. Xeem Manaxes tus ciam yog raws tus dej Kanas sab qaumteb mus xaus rau ntawm Hiavtxwv Meditelanees. 10Xeem Efalayees yog nyob sab qabteb, thiab xeem Manaxes yog nyob sab qaumteb uas yog Hiavtxwv Meditelanees ua lawv tus ciam sab hnubpoob. Xeem Asaws yog nyob sab qaumteb hnubpoob thiab xeem Ixakhas yog nyob sab qaumteb hnubtuaj. 11Nyob rau hauv ib cheebtsam Ixakhas thiab Asaws, Manaxes tau lub nroog Npes Sas thiab lub nroog Inpele-as thiab tej zos uas nyob ibncig, thiab lub moos Daus (lub moos uas nyob ntawm ntug hiavtxwv),#17:11: Nqe no sau hais tias Daus (lub moos uas nyob ntawm ntug hiavtxwv); paub tsis meej tias lolus Henplais yog txhais licas tiag txog qhov no. lub moos Eedaus, Ta-anaj, Menkidaus, thiab tej moos uas nyob ibncig. 12Tiamsis cov Manaxes tsis muaj peevxwm ntiab cov neeg uas nyob hauv cov nroog ntawd khiav, yogli ntawd cov Kana-as thiaj tseem nrog lawv nyob rau hauv cov nroog ntawd. #Cthj 1:27-28 13Txawm yog thaum cov Yixalayees muajzog tuaj lawm los lawv tsis ntiab cov Kana-as khiav, tiamsis lawv yuam kom cov Kana-as ua lawv qhev.
Xeem Efalayees Thiab Manaxes Sab Hnubpoob Thov Av Ntxiv
14Yauxej cajces tau hais rau Yausuas tias, “Tus TSWV twb foom koobhmoov rau peb, ua rau peb huamvam coob heev lawm, vim licas koj thiaj faib ib nyuag thaj av rau peb xwb?”
15Yausuas teb lawv tias, “Yog nej muaj neeg coob heev lawm, thiab yog tias xeem Efalayees lub laj roob tsis txaus nej nyob, nej ciali mus luaj thiab ntov cov Pelixes thiab Lefayees thaj havzoov rau nej nyob.”
16Lawv teb tias, “Suam av uas ua laj roob ntawd dav tsis txaus peb nyob; tsis yogli ntawd xwb, cov Kana-as uas nyob hauv tiajnrag tsis hais cov uas nyob hauv Npes Sas thiab nyob hauv tej moos ibncig, thiab cov uas nyob hauv lub Hav Yexelees, puavleej muaj tsheb nees hlau.”
17Yausuas hais rau xeem Efalayees thiab xeem Manaxes Sab Hnubpoob hais tias, “Nej yeej muaj neeg coob thiab muajzog heev tiag, tsimnyog nej tau dua ib feem av ntxiv. 18Suam av uas ua laj roob yuav yog nej li. Txawm yog suam ntawd tseem ua havzoov los nej ciali mus luaj thiab ntov ua nej tug, tagnrho sab no mus rau sab tim ub. Txawm yog cov Kana-as muaj tsheb nees hlau thiab muajzog heev los nej yeej yuav ntiab tau lawv khiav mus.”
Currently Selected:
Yausuas 17: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
