Yaxayas 65
65
Vajtswv Rautxim Rau Cov Neeg Ntxeevsiab
1Tus TSWV hais tias, “Kuv tos rawv yuav teb Kuv haivneeg tej lus thov, tiamsis lawv tsis thov Kuv. Kuv tos rawv lawv los nrhiav Kuv, tiamsis lawv tsis kam los. Txawm yog Kuv hais tias, ‘Kuv nyob ntawm no; Kuv yuav pab nej,’ los lub tebchaws tsis kam thov Kuv. #Loos 10:20 2Kuv niajhnub cev tes rau Kuv cov neeg uas tawv ncauj, uas lawv pheej mus ua phem thiab ua rawsli lawv lub siab nyiam. #Loos 10:21 3Lawv txhobtxwm ua kom Kuv npautaws los ntawm qhov uas lawv muab khoom mus fij rau dab hauv lawv tej vaj dawbhuv#65:3: tej vaj dawbhuv: Saib 1:29. thiab hlawv xyab rau saum tej thaj txi dab. 4Hmontuj lawv nkag mus rau hauv tej qhovtsua thiab tej qhovntxa, mus sablaj rau cov neeg uas tuag lawm tej plig. Lawv noj nqaij npuas thiab haus tej kua nqaij uas muab fij rau dab lawm. 5Thiab lawv tseem hais rau lwmtus tias, ‘Txav deb ntawm peb; tsis txhob kov peb vim peb dawbhuv dua nej!’ Kuv tiv tsis taug cov neeg ntawd li. Kuv txoj kev chim rau lawv, mas npaum nkaus li lub cubtawg uas cig tsis paub tuag.
6“Twb muaj lus sau tseg lawm hais tias, Kuv yuav tsis kavliam rau tej uas lawv tau ua tas los, tiamsis Kuv yuav ua pauj rau lawv; 7Kuv yuav rautxim rau lawv tej kev txhaum thiab lawv cov yawgkoob tej kev txhaum huv tibsi, rauqhov lawv tau mus hlawv hmoov xyab rau saum tej roob thiab haislus saib tsis taus Kuv. Yogli ntawd Kuv thiaj yuav rautxim kom txaus nkaus rau tej uas lawv ua los lawm.”
8Tus TSWV hais tias, “Tsis muaj leejtwg yuav muab tej txivhmab uas ncw ua kom puastsuaj mus, tiamsis tsuas yog muab tej txivhmab ntawd los ua cawv haus xwb. Ib yam li ntawd, Kuv yuav tsis ua rau Kuv haivneeg kom raug kev puastsuaj—Kuv yuav cawm cov uas yog Kuv li tubtxib. 9Kuv yuav foom koobhmoov rau cov Yixalayees uas yog xeem Yudas, mas lawv cajces yuav tau Kuv lub tebchaws uas muaj roob muaj hav los ua lawv tug. Cov neeg uas Kuv tau xaiv lawm, thiab Kuv cov tubtxib yuav nyob rau ntawd. 10Lawv yuav pehawm Kuv thiab yuav coj lawv tej yaj tej nyuj mus noj zaub hauv lub Tiaj Saloos uas nyob sab hnubpoob, thiab hauv lub Hav Teebmeem uas nyob sab hnubtuaj. #Yaus 7:24-26
11“Tiamsis nej cov uas tau tso Kuv tseg thiab tsis nco txog Xi-oos, uas yog Kuv lub roob dawbhuv,#65:11: roob dawbhuv: Saib 2:3. nej teeb thaj teev tus mlom Nkaj thiab tus mlom Menis, uas yog ob tug nyuag vajtswv saib moo seb lub neej tomntej yuav zoo lossis phem. 12Nej lub neej yav tomntej yog nej yuav tuag rau hniav ntaj hniav riam, vim thaum Kuv hu, nej tsis teb thiab thaum Kuv hais, nej tsis mloog. Nej txiavtxim siab mus ua kev phem, thiab ua tej uas nej paub tias Kuv tsis nyiam. 13Kuv hais rau nej tias cov tubtxib uas hwm Kuv thiab mloog Kuv lus, lawv yuav muaj noj muaj haus nplua-mias, tiamsis nej yuav tshaib nqhis. Kuv cov tubtxib yuav zoosiab, tiamsis nej yuav poob ntsejmuag. 14Kuv cov tubtxib yuav hunkauj zoosiab, tiamsis nej yuav quaj lwjsiab ntsuav. 15Cov neeg uas Kuv xaiv tseg lawm, yuav tuav nej lub npe foom phem. Kuv, uas yog tus TSWV kav ibpuas tsavyam, Kuv yuav muab nej tua povtseg, tiamsis Kuv yuav muab lub npe tshiab rau cov tubtxib uas mloog Kuv lus. 16Yog cov neeg uas nyob hauv lub tebchaws no yuav thov koobhmoov, yuavtsum yog thov ntawm tus Vajtswv uas muaj kev ncajncees. Yog leejtwg yuav coglus, yuavtsum tuav Vajtswv tus uas muaj kev ncajncees lub npe cog. Mas tej kev txomnyem uas nej raug los lawm thiaj yuav ploj mus thiab nej thiaj yuav tsis nco txog li lawm.”
Lub Ntuj Tshiab Thiab Lub Ntiajteb Tshiab
17Tus TSWV hais tias, “Saib maj, Kuv yuav tsim dua lub ntuj tshiab thiab lub ntiajteb tshiab. Tsis muaj leejtwg yuav nco txog lub qub ib zaug li lawm. #Yaxaya 66:22; 2Pet 3:13; Tshwm 21:1 18Nej ciali zoosiab thiab txaussiab rau yam uas Kuv tsim dua tshiab ntawd mus ibtxhis. Lub nroog Yeluxalees tshiab uas Kuv tsim yuav puvnpo txoj kev kajsiab, mas cov neeg uas nyob rau hauv yuav zoosiab heev. 19Kuv yuav zoosiab rau lub nroog Yeluxalees thiab txaussiab kawg nkaus rau Kuv haivneeg. Yuav tsis hnov suab quaj suab nyiav nyob hauv lub nroog ntawd ib zaug ntxiv li lawm. #Tshwm 21:4
20“Nyob hauv lub nroog ntawd yuav tsis muaj cov menyuam mos uas yug tau los hnub puav xwb es ciali tuag lawm, lossis yuav tsis muaj cov laus uas tuag uantej puv lawv lub hnubnyoog. Cov uas tuag thaum muaj hnubnyoog ibpuas xyoo los tseem suav tau tias yog tus hluas. Yog leejtwg tuag uantej ntawd ces yog Kuv rautxim rau nws xwb. 21-22Neeg yuav ua tsev thiab mus nyob rau hauv tej tsev ntawd—tsis yog lwmtus yuav los nyob. Lawv yuav cog txivhmab thiab yuav tau haus tej cawv txivhmab ntawd—tsis yog lwmtus yuav tau haus. Kuv haivneeg yuav muaj hnubnyoog nyob ntev yam li tej ntoo. Lawv yuav zoosiab rau txhua yam uas lawv txhais tes ua tau los. 23Txhua yam uas lawv ua yuav tiav mus rau qhov zoo, thiab lawv tej menyuam yuav tsis raug kev puastsuaj. Kuv yuav foom koobhmoov rau lawv thiab lawv cajces mus ibtxhis li. 24Thaum lawv tseem thov Kuv tsis tau xaus, Kuv yuav teb lawv tej lus thov. 25Hma thiab menyuam yaj yuav noj zaub uake, tsov ntxhuav yuav noj quavnyab ib yam li nyuj noj, thiab nab yuav noj hmoov av. Yuav tsis muaj leejtwg raug mob lossis raug kev puastsuaj nyob saum Kuv lub roob dawbhuv#65:25: roob dawbhuv: Saib 2:3. lawm.” #Yaxaya 11:6-9
Currently Selected:
Yaxayas 65: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
