Yaxayas 66
66
Tus TSWV Rautxim Rau Txhua Haivneeg
1Tus TSWV hais tias, “Ntuj ceebtsheej yog Kuv lub zwmtxwv, thiab ntiajteb yog Kuv lub chaw tiag taw. Nej yuav ua lub tsev zoo licas rau Kuv nyob, thiab qhov chaw uas Kuv nyob yuav zoo licas? #Math 5:34; 23:22; Math 5:35 2Lub ntuj thiab lub ntiajteb no yog Kuv txhais tes tsim! Kuv txaussiab heev rau cov neeg uas paub txo hwjchim, paub quajntsuag rau lawv tej kev txhaum, thiab paub ntshai ua ibce tsheehnyo thaum lawv hnov Kuv tej lus. #Teshl 7:49-50
3“Tiamsis neeg ua rawsli lawv lub siab nyiam xwb; txawm lawv tua ib tug txiv nyuj thiab tua ib tug neeg hlawv fij los lawv suav hais tias zoo ib yam xwb; txawm lawv tua ib tug menyuam yaj thiab muab ib tug dev lov cajdab hlawv fij los lawv suav hais tias zoo ib yam xwb; txawm lawv muab nplej thiab ntshav npua fij los lawv suav hais tias zoo ib yam xwb; txawm lawv hlawv tshuaj tswqab thiab pe mlom los lawv suav hais tias zoo ib yam xwb. Lawv yeej nyiam ua kev qias vuabtsuab xwb. 4Yogli ntawd, Kuv yuav tso kev puastsuaj los rau lawv—tej ntawd yog tej uas lawv ntshai tshajplaws—rauqhov thaum Kuv hu tsis muaj leejtwg teb, lossis thaum Kuv hais tsis muaj leejtwg mloog. Lawv txhobtxwm tsis mloog Kuv lus thiab mus ua phem nkaus xwb.”
5Nej cov uas ntshai tus TSWV ua ibce tsheehnyo, ciali mloog Nws tej lus no: “Vim nej ncajncees rau Kuv lub npe, nej cov neeg muaj qeeleej thiajli ntxub nej thiab tsis lees paub nej. Lawv thuam nej hais tias, ‘Kom tus TSWV qhia Nws lub hwjchim rau nej pom, kom peb thiaj pom nej zoosiab.’ Tiamsis lawv yuav poob ntsejmuag! 6Ua tibzoo mloog nawb! Tej suab nrov ntsoogqees hauv nroog, thiab lub suab uas nrov hauv lub Tuamtsev tuaj, yog lub suab uas tus TSWV rautxim rau Nws cov yeebncuab ntag!
7“Kuv lub nroog uas dawbhuv zoo yam li tus pojniam uas yug tau menyuam sai heev, tsis hnov mob plab li twb yug tau nws tus tub lawm. #Tshwm 12:5 8Puas muaj leejtwg hnov lossis tau pom dua ib zaug li? Puas muaj ib haivneeg twg uas tibhnub xwb, txawmsiv yug tau lawv thiab ciali sawv ua tau ib lub tebchaws? Lub nroog Xi-oos yuav huamvam sai ua ib haivneeg, nws yuav tsis tau tiv kev txomnyem ntxiv lawm. 9Nej tsis txhob xav tias Kuv coj Kuv haivneeg los txog lub caij uas yug lawv, los Kuv tseem tsis pub lawv yug.” Tus TSWV yog tus uas hais li ntawd.
10Nej cov uas nyiam lub nroog Yeluxalees,
ciali nrog nws zoosiab thiab txaussiab rau nws!
Nej cov uas quajntsuag rau nws,
ciali nrog nws zoosiab!
11Nej yuav zoosiab rau nws txoj kev vammeej,
ib yam li tus menyuam uas txaussiab tau noj nws niam lub mis.
12Tus TSWV hais tias, “Kuv yuav coj kev npluanuj los rau nej mus ibtxhis, txhua haivneeg tej nyiaj yuav ntws laublug los rau nej li tus dej ntws uas tsis paub nqhuab. Nej yuav zoo li tus menyuam uas leejniam puag rawv hauv xubntiag noj mis, thiab hlub nws kawg li. 13Kuv yuav nplig nej hauv lub nroog Yeluxalees li leejniam nplig nws tus menyuam. 14Thaum nej pom tej xwm no tshwmsim los, nej yuav zoosiab; qhov ntawd yuav ua rau nej lojhlob mosnyoos li tej nrojtsuag. Thaum ntawd nej yuav paub tias Kuv, uas yog tus TSWV, yog tus pab cov neeg mloog Kuv lus, tiamsis Kuv yuav chim rau Kuv cov yeebncuab.”
15Saib maj, tus TSWV yuav nrog nplaimtaws uake los. Nws yuav caij cuadaj cuadub los, thiab Nws yuav rautxim rau tus uas ua rau Nws chim. 16Tus TSWV yuav tso hluavtaws thiab ntaj los rautxim rau txhua tus neeg nyob hauv ntiajteb uas Nws pom tias muaj txim; mas coob leej yuav raug tua tuag.
17Tus TSWV hais tias, “Cov neeg uas ua kevcai ntxuav kom lawv tau mus pe dab rau hauv tej vaj dawbhuv,#66:17: tej vaj dawbhuv: Saib 1:3. noj nqaij npuas, noj nastsuag, thiab noj tej zaub-mov uas qias vuabtsuab, yuav raug kev puastsuaj tag huv tibsi. 18Kuv paub#66:18: Tej cov ntawv qub-qub thaum ub sau hais tias Kuv paub; phau lus Henplais hais tias Kuv. tej kev xav thiab tej haujlwm uas lawv ua. Kuv yuav los#66:18: Tej cov ntawv qub-qub thaum ub sau hais tias Kuv yuav los; phau lus Henplais hais tias Nws yuav los. sau txhua haivneeg los uake. Thaum lawv los uake lawm, lawv yuav pom Kuv tus tshwjchim, 19thiab yuav paub tias Kuv yog tus uas txiavtxim rau lawv.
“Tiamsis Kuv yuav tseg qeeleej nyob thiab txib lawv mus qhia txhua haivneeg thiab tej tebchaws deb-deb uas tsis tau hnov txog Kuv lub npe thiab tsis tau pom dua Kuv tus tshwjchim—tebchaws Xapees, tebchaws Linpias,#66:19: Ib phau ntawv qub-qub thaum ub sau hais tias Linpias; phau lus Henplais hais tias Pus. thiab tebchaws Lidias, uas muaj cov neeg txawj tua hneevnti, thiab hauv tebchaws Tunpas thiab tebchaws Kilis. Lawv yuav mus qhia Kuv tus tshwjchim rau hauv cov tebchaws ntawd. 20Lawv yuav coj tagnrho nej cov kwvtij tawm hauv cov tebchaws ntawd los ua ib qhov khoomplig rau Kuv. Lawv yuav coj nej cov kwvtij ntawd caij nees, caij zag, caij ntxhuav, caij tsheb nees uarog thiab caij tsheb nyuj, los rau ntawm Kuv lub roob dawbhuv,#66:20: lub roob dawbhuv: Saib 2:3. ib yam li cov Yixalayees muab hmoov nplej ntim rau hauv tej tais phiab uas twb muab ntxuav huvsi lawm, es yuav coj mus fij rau hauv lub Tuamtsev. 21Kuv yuav tsa lawv qeeleej ua povthawj hlob thiab ua cov Levis.”
22Tus TSWV hais tias, “Lub ntiajteb tshiab thiab lub ntuj tshiab yuav nyob ruaj-khov rau ntawm Kuv lub hwjchim licas, nej cajces thiab nej lub npe yuav nyob ruaj-khov ib yam li ntawd. #Yaxaya 65:17; 2Pet 3:13; Tshwm 21:1 23Txhua lub Kevcai Hli Xiab thiab txhua hnub Xanpataus, mas txhua haivneeg yuav tuaj pehawm Kuv hauv lub nroog Yeluxalees no. 24Thaum lawv tawm tuaj mus, lawv yuav pom cov neeg uas ntxeevsiab rau Kuv tej cev tuag. Cov kas uas noj lawv tej cev yuav tsis tuag li, thiab tej hluavtaws uas kub lawv ntawd los yuav tsis paub tuag li thiab. Tej cev tuag ntawd yuav qias vuabtsuab rau txhua tus neeg.” #Malak 9:48
Currently Selected:
Yaxayas 66: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
