Yaxayas 64

1Vim licas Koj tsis dua rhe roojntug thiab nqis los? Kom tej roob thiaj yuav pom Koj thiab ntshai uazog koog! 2Tej roob yuav tshee uazog kais yam li dej npau hauv lub laujkaub uas rhaub hauv qhovcub. Thov Koj los qhia Koj lub hwjchim rau Koj cov yeebncuab pom, thiab ua rau txhua haivneeg ntshai tsheehnyo tabmeeg Koj. 3Muaj ib zaug Koj tau los ua tej yam uas peb ntshai kawg li rau peb pom, peb yeej tsis tau xav txog tias yuav muaj li ntawd; tej tojroob hauvpes uazog koog tabmeeg Koj. 4Txij thaum ub los yeej tsis tau muaj leejtwg pom lossis hnov ib tug Vajtswv uas zoo li Koj, uas ua tej haujlwm loj npaum li no pab rau cov uas ciasiab rau nws. #1Klt 2:9 5Koj tostxais txhua tus uas txaussiab ua neeg ncaj, cov uas ncontsoov ua lub neej rawsli Koj lub siab nyiam. Koj twb chim rau peb lawm, tiamsis peb tseem ua txhaum ntxiv thiab; txawm yog Koj twb chim rau peb npaum li ntawd los peb pheej ua txhaum tsis tseg txij puag thaum ub los li.#64:5: Nqe no sau hais tias txawm yog… los li; paub tsis meej tias lolus Henplais yog txhais licas tiag txog qhov no. 6Peb txhua tus puavleej puvnpo kev txhaum; txawm yog peb twb ua zoo kawg nkaus los yeej tseem zoo li tej khaubhlab uas qias neeg ntsuav. Twb yog vim peb tej kev txhaum, peb thiaj zoo li tej nplooj qhua uas cua muab ntsawj ya tas lawm. 7Tsis muaj leejtwg hu txog Koj lub npe; tsis muaj leejtwg tuaj thov Koj pab li. Twb yog vim peb tej kev txhaum Koj thiaj fee plhu ntawm peb thiab muab peb tsotseg lawm.#64:7: Tej cov ntawv qub-qub thaum ub saum hais tias muab peb tsotseg lawm; phau los Henplais hais tias yaj tas.

8Tiamsis tus TSWV, Koj yog peb Leejtxiv. Peb yog cov av nplaum, thiab Koj yog tus uas puab. Koj yog tus tsim peb, 9yogli ntawd tus TSWV, thov Koj tsis txhob chim rau peb, thiab tsis txhob cimntsoov peb tej kev txhaum mus ibtxhis. Peb yog Koj haivneeg; thov Koj tsa muag los saib peb. 10Koj tej nroog uas dawbhuv tau raug piamsij ua suabpuam tag; Yeluxalees los puastsuaj tag, tsis muaj neeg nyob hauv lawm. 11Lub Tuamtsev uas dawbhuv thiab zoonkauj yog qhov chaw uas peb cov yawgkoob tuaj qhuas Koj, raug hluavtaws kub tag. Txhua thaj chaw uas zoonkauj puavleej raug puastsuaj tag huv tibsi. 12Tus TSWV, Koj yeej yuav tsis nti li lov? Koj yeej yuav tsis ua ib yam dabtsi li thiab yuav cia peb raug txoj kev txomnyem uas peb tiv tsis taus no lov?

Currently Selected:

Yaxayas 64: MWW2022

Highlight

Copy

Compare