Yaxayas 61
61
Txoj Xov Zoo Uas Hais Txog Kev Cawmdim
1Tus TSWV uas kav ibpuas tsavyam tus Ntsujplig tau los rau hauv kuv,
Rauqhov Nws tau tsa kuv thiab txib kuv
Coj txoj xov zoo mus qhia rau cov neeg txomnyem,
Mus nplig cov neeg uas muaj kev lwjsiab,
Qhia txoj kev ywjpheej rau cov uas raug ntes,
Thiab tso cov neeg raug txim tawm los. #Math 11:5; Lukas 7:22
2Nws tau txib kuv mus qhia
Kom sawvdaws paub tias twb txog lub sijhawm
Uas tus TSWV yuav cawm Nws haivneeg,
Thiab kovyeej lawv cov yeebncuab lawm.
Nws tau txib kuv mus nplig txhua tus uas muaj kev quajntsuag #Lukas 4:18-19
3Uas nyob hauv lub nroog Xi-oos.
Kom kuv muab kev zoosiab thiab kev kajsiab pauv kev lwjsiab,
Muab zaj nkauj hu qhuas tus TSWV pauv zaj kev txomnyem nyuajsiab.
Lawv yuav zoo li tsob ntoo
Uas tus TSWV tau muab cog cia.
Lawv sawvdaws yuav ua ncaj ua ncees,
Mas Vajtswv yuav raug qhuas rau tej uas Nws tau ua los.
4Lawv yuav rov txhimkho tej qub nroog uas puastsuaj tag lawm,
Thiab rov kho tej chaw uas muab tsotseg tau ntau tiam dhau los lawm dua tshiab.
5Kuv haivneeg 'e, cov neeg txawv tebchaws yuav tiam nej.
Lawv yuav yug nej tej tsiaj,
Thiab laij nej tej teb thiab tu nej tej vaj txivhmab.
6Luag yuav paub tias nej yog tus TSWV cov povthawj hlob,
Uas yog peb tus Vajtswv cov tubtxib.
Nej yuav tau txhua haivneeg tej nyiaj,
Thiab yuav khav ntxhias tias tej ntawd yog nej tug.
7Nej txoj kev txajmuag thiab kev poob ntsejmuag twb xaus lawm.
Nej yuav tau nyob hauv nej lub tebchaws.
Nej yuav tau nyiaj thiab txhua tsavyam ob npaug;
Nej yuav muaj kev zoosiab mus ibtxhis li.
8Tus TSWV hais tias,
“Kuv nyiam txoj kev ncajncees, tiamsis Kuv ntxub txoj kev ua tubsab thiab ua tsis zoo.
Kuv yuav muab nqizog kom ncajncees rau Kuv haivneeg,
Thiab yuav coglus rau lawv mus ibtxhis li.
9Lawv li cajces yuav nto moo lug ntawm ibtsoom tebchaws;
Txhua tus uas pom lawv yuav paub
Tias lawv yog haivneeg uas Kuv tau foom koobhmoov rau lawm.”
10Kuv zoosiab kawg nkaus rau tus TSWV uas yog kuv tus Vajtswv.
Rauqhov Nws tau muab kev cawmdim thiab kev ncajncees rau kuv hnav.
Kuv zoo li tus nraugvauv uas hnav tau cev tsoostsho noj tshoob lossis zoo li tus nkaujnyab uas coj saw muaj qe hlaws dai rau. #Tshwm 21:2
11Tej noob uas muab tseb lawm tuaj kaus licas,
Thiab tej av ua rau lub noob ntawd lojhlob licas,
Tus TSWV uas kav ibpuas tsavyam yuav cawm Nws haivneeg,
Thiab ua rau txhua haivneeg qhuas Nws li ntawd.
Currently Selected:
Yaxayas 61: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
