Yaxayas 62
62
1Vim lub nroog Xi-oos, kuv yuav tsis nyob twjywm;
Thiab vim lub nroog Yeluxalees, kuv yuav tsis nyob ntsiagto,
Mus txog thaum nws txoj kev ncajncees ci li thaum kajntug,
Thiab nws txoj kev cawmdim ci li tes tsau thaum tsausntuj.
2Yeluxalees, txhua haivneeg yuav pom koj txoj kev ncajncees!
Txhua tus vajntxwv yuav pom koj tau koobmeej,
Luag yuav hu koj lub npe tshiab,
Uas yog lub npe tus TSWV muab rau koj.
3Koj yuav yog lub mom kub uas zoonkauj heev ntawm tus TSWV txhais tes,
Yog lub mom vajntxwv uas nyob ntawm koj tus Vajtswv lub xibteg.
4Luag yuav tsis hu koj hais tias “Raug Tso,”
Lossis koj lub tebchaws yuav tsis raug hu hais tias “Tus Pojniam uas Raug Muab Tsotseg.”
Koj lub npe tshiab yuav hu ua “Vajtswv Txaussiab rau Nws.”
Koj lub tebchaws yuav hu ua “Sibyuav Kajsiab Lug Lawm,”
Rauqhov tus TSWV txaussiab rau koj heev,
Mas koj yuav zoo li tus txiv rau lub tebchaws.
5Tus tub hluas yuav ib tug nkaujxwb ua pojniam licas,
Ces tus uas tsim koj yuav yuav koj li ntawd.
Tus nraugvauv txaussiab rau nws tus pojniam licas,
Ces koj tus Vajtswv txaussiab rau koj li ntawd ntag.
6Yeluxalees, kuv cia cov neeg fajxwm nyob saum koj tej ntsayeej;
Lawv yuavtsum tsis txhob nyob ntsiagto nruabhnub lossis hmontuj,
Tiamsis lawv yuavtsum hais tsis tseg rau tus TSWV, txog Nws tej lus cogtseg,
Kom Nws tsis txhob hnovqab lawv ib zaug li.
7Lawv yuavtsum tsis txhob pub tus TSWV mus so txog thaum Nws txhimkho lub nroog Yeluxalees tiav,
Thiab ua kom tau lub nroog rau lub ntiajteb no qhuas.
8Tus TSWV tau coglus tseg
Thiab los ntawm Nws lub hwjchim, Nws yuav ua kom tiav:
“Kuv yuav tsis pub nej tej qoobloo rau nej cov yeebncuab tau noj ntxiv lawm,
Thiab cov neeg txawv tebchaws yuav tsis tau haus tej cawv txivhmab uas nej ua tau ntawd lawm.
9Tiamsis nej yog cov uas cog thiab sau tej qoobloo ntawd;
Nej yuav tau noj tej ncuav ntawd thiab ua Vajtswv tsaug.
Nej yog tus npaj thiab sau tej txivhmab los uake,
Nej yuav tau haus cawv txivhmab nyob hauv Kuv lub Tuamtsev.”
10Cov neeg hauv Yeluxalees, nej ciali mus kom dhau plaws cov roojloog,
Thiab rhawv kev rau nej cov pejxeem tau taug rov los!
Ciali ncaws txoj niamkev loj; khaws tej pobzeb huvsi povtseg!
Tsa ib tug chij kom txhua haivneeg thiaj paub tias
11Tus TSWV tau tshajtawm rau txhua haivneeg tias,
“Nej ciali qhia rau cov neeg hauv Yeluxalees
Tias ‘Saib maj, nej tus Cawmseej twb los lawm!
Nws coj Nws tej nqizog nrog Nws los,
Cov neeg uas Nws twb cawm lawv dim lawm yuav los ua Nws ntej.’ ” #Yaxaya 40:10; Tshwm 22:12
12Luag yuav hu nej ua, “Vajtswv Haivneeg Uas Dawbhuv,”
“Haivneeg uas Tus TSWV Tau Cawm Lawm.”
Luag yuav hu lub nroog Yeluxalees ua, “Lub Nroog Uas Vajtswv Hlub,”
“Lub Nroog Uas Vajtswv Tsis Muab Tsotseg Li.”
Currently Selected:
Yaxayas 62: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
