Yaxayas 60
60
Yeluxalees Yuav Tau Koobmeej
1Yeluxalees 'e, ciali sawv, vim koj txoj kev kaj twb los lawm;
Tus TSWV tus tshwjchim tabtom ci ntsa-iab rau saum koj!
2Saib maj, kev tsausntuj roos tagnrho lub ntiajteb,
Thiab kev tsausntuj dubnciab npog txhua haivneeg,
Tiamsis tus TSWV tus tshwjchim yuav ci rau koj;
Mas luag yuav pom Nws tus tshwjchim ntawd nyob rau ntawm koj.
3Txhua haivneeg yuav los rau hauv koj txoj kev kaj,
Thiab tej vajntxwv yuav pom tus duab tshavntuj uas nyuamqhuav tawm ua hnub tshiab rau koj.
4Ciali tsa qhovmuag saib puagncig koj seb muaj dabtsi tabtom tshwmsim los:
Koj haivneeg tabtom sibsau yuav rov los tsev!
Koj cov tub yuav taug kev deb rov los;
Luag yuav puag koj cov ntxhais ib yam li puag menyuam los.
5Thaum koj pom tej no, koj yuav zoosiab heev,
Koj lub siab yuav tsheehnyo vim txoj kev zoosiab.
Neeg yuav nqa nyiaj los rau koj;
Tej nyiaj ntawd yuav hla hiavtxwv los rau koj.
6Yuav muaj ntau pab ntxhuav los tim tebchaws Midias thiab tebchaws Efas los nyob puvnkaus hauv koj lub tebchaws.
Cov ntxhuav ntawd yuav thauj kub thiab tshuaj tswqab hauv tebchaws Senpas tuaj rau koj.
Neeg yuav piav txog txoj xov zoo hais txog tej uas tus TSWV tau ua!
7Luag yuav coj cov neeg Kedas thiab cov neeg Nenpaiyaus
Tej yaj tuaj rau koj tua ua khoom fij,
Thiab muab hlawv rau saum lub thaj kom haum tus TSWV siab.
Tus TSWV yuav ua kom Nws lub Tuamtsev muaj koobmeej dua qub.
8Cov nkoj uas ya zoo li tej huab,
Thiab ya zoo li tej nquab rov los tsev ntawd yog dabtsi?
9Cov ntawd yog tej nkoj tuaj ntawm tej tebchaws uas nyob deb tuaj,
Xa Vajtswv haivneeg los tsev,
Thiab thauj nyiaj thauj kub nrog lawv
Los hwm tus TSWV,
Uas yog cov Yixalayees tus Vajtswv uas dawbhuv,
Uas tau ua rau ibtsoom tebchaws hwm Nws haivneeg.
10Tus TSWV hais rau Yeluxalees tias,
“Cov neeg txawv tebchaws yuav rov los kho koj tej ntsayeej,
Thiab lawv cov vajntxwv yuav tiam koj.
Vim Kuv chim Kuv thiaj rautxim rau koj,
Tiamsis nimno Kuv yuav ua zoo rau koj thiab tabncuab koj.
11Koj tej roojloog yuav qhib tashnub tashmo;
Kom txhua haivneeg tej vajntxwv
Thiaj coj tau lawv tej nyiaj tuaj rau koj. #Tshwm 21:25-26
12Tiamsis lub tebchaws twg uas tsis kam tiam koj,
Yuav raug kev puastsuaj.
13“Lenpanoos lub koobmeej yuav los rau koj,
Nws tej ntoo thuv, ntoo npeb, thiab ntoo ciab,
Yuav raug txiav coj los txhimkho koj, uas yog Yeluxalees.
Los ua kom Kuv lub tuamtsev zoonkauj,
Thiab ua kom Kuv lub nroog ci ntsa-iab.
14Cajces ntawm cov neeg uas tsimtxom koj,
Lawv yuav tuaj pe koj thiab hwm koj.
Txhua tus uas saib tsis taus koj, yuav los txhoscaug ntawm koj kotaw pe koj.
Lawv yuav hu koj hais tias, ‘Tus TSWV lub Nroog,’
‘Xi-oos, uas yog cov Yixalayees tus Vajtswv Dawbhuv lub Nroog.’ #Tshwm 3:9
15“Luag yuav tsis ntxub koj lossis tso koj tseg
ua ib lub nroog uas nyob lwjsiab thiab qhuav nquas cia ib zaug li lawm.
Kuv yuav ua kom koj vammeej thiab zoonkauj,
ua ib qhov chaw kajsiab rau txhua tiam neeg.
16Txhua haivneeg thiab tej vajntxwv yuav tu koj
Yam li leejniam pub mis rau nws tus menyuam.
Koj yuav paub tias Kuv, uas yog tus TSWV, yog tus uas tau cawm koj;
Yog cov Yixalayees tus Vajtswv uas muaj Hwjchim Loj Kawg Nkaus ua tus tso koj dim.
17“Kuv yuav muab kub los pauv tooj liab,
Muab nyiaj thiab tooj liab los pauv hlau thiab ntoo;
Thiab muab hlau los pauv pobzeb rau koj.
Koj tej nomtswv yuav tsis caijtsuj koj ntxiv lawm,
Kuv yuav ua kom lawv tswjhwm ncajncees thiab kom muaj kev thajyeeb.
18Yuav tsis hnov tej suab sibntaus sibtua ntxiv;
Thiab kev puastsuaj puasntsoog yuav tsis los raug koj lub tebchaws lawm.
Kuv yuav tivthaiv koj yam nkaus li tus ntsayeej;
Koj yuav qhuas Kuv, rauqhov Kuv tau pab koj dim lawm.
19“Nruabhnub lub hnub yuav tsis ci rau koj
Lossis hmontuj lub hli yuav tsis ci rau koj lawm;
Kuv, uas yog koj tus TSWV yuav yog lub teeb ci rau koj pomkev mus ibtxhis,
Kuv tus tshwjchim yuav pomkev thiab yuav ci ntsa-iab rau koj. #Tshwm 21:23; 22:5
20Koj lub hnub yuav tsis poobqho,
Thiab koj lub hli yuav tsis tsaus ntxiv lawm.
Kuv, uas yog tus TSWV yuav yog lub teeb ci rau koj pomkev mus ibtxhis.
Koj tej kev nyuajsiab quajntsuag yuav xaus mus.
21Koj haivneeg txhua tus yuav ua ncaj,
Thiab lawv yuav tau lub tebchaws los ua lawv tug mus ibtxhis.
Kuv tau muab lawv cog rau ntawd, Kuv yog tus tsim lawv,
Kom lawv qhia Kuv tus tshwjchim rau sawvdaws.
22Tsev neeg uas tsawg tshajplaws yuav dhau mus ua 1,000 leej,
Thiab xeem uas tsawg tshajplaws yuav dhau mus ua ib haivneeg uas muajzog heev.
Thaum txog lub sijhawm lawm,
Kuv, uas yog tus TSWV,
Yuav ua kom tej ntawd tshwmsim los sai-sai!”
Currently Selected:
Yaxayas 60: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
