Yaxayas 59
59
Tus Cevlus Qhia Cov Pejxeem Lub Txim
1Tsis txhob xav tias tus TSWV txhais npab luv dhau thiaj cawm tsis tau nej lossis Nws lagntseg dhau lawm, Nws thiaj tsis hnov nej tej lus thov! 2Twb yog vim nej tej kev txhaum muab nej quas, thiab nej tej kev txhaum roos Vajtswv lub ntsejmuag lawm, Nws thiaj tsis hnov nej tej lus thov. 3Nej txhais tes lo ntshav, nej tej ntivtes lo kev txhaum, nej lub ncauj haislus dag, thiab nej tus nplaig yws lus phem lus qias.
4Nej mus hauv tsev tu plaub, tiamsis nej yeej ua tsis ncaj li. Nej tsis muaj povthawj thiab nej dag kom nej kovyeej luag. Nej tuav tswvyim phem ua kom luag puastsuaj. 5Nej tej tswvyim phem zoo li tus nab muaj taug cov qe thiab zoo li tus kab laugsab tej xov xwb. Leejtwg noj cov qe ntawd, nws yuav tuag; thiab yog muab lub qe ntawd tsoo, ces nab tawm hauv los xwb. 6Tiamsis nej tej tswvyim uas zoo li kab laugsab tej xov ntawd yeej tsis muaj qabhau dabtsi, yeej muab ntos ua tsis tau tsoostsho los npog nej lub cev. Nej tej haujlwm yog haujlwm phem, thiab kev uanruj uatsiv nyob rawv ntawm nej txhais tes. 7Nej txhais kotaw majnroos yuav mus ua phem, thiab maj mus muab tej neeg uas tsis muaj txim tua kom tuag. Nej niajhnub tuav tswvyim ua phem, nej mus txog twg, kev nrujtsiv thiab kev puastsuaj txog ntawd. 8Nej nyob qhovtwg, qhov ntawd yeej tsis muaj kev thajyeeb li. Txhua yam nej ua yeej tsis muaj kev ncajncees. Txojkev nej taug yog txojkev nkhaus xwb. Txhua tus uas taug txojkev nkhaus ntawd yeej tsis muaj kev kajsiab li. #Loos 3:15-17
Cov Neeg Uas Lees Kev Txhaum
9Cov pejxeem hais tias, “Nimno peb paub tias vim licas Vajtswv thiaj tsis pab peb dim ntawm cov neeg uas caijtsuj peb. Peb nrhiav txoj kev kaj taug, tiamsis tsuas tau txoj kev tsaus xwb, 10thiab peb maub tuav phabntsa mus kev ib yam li tej neeg digmuag. Txawm yog tavsu nrig los peb dawm ntog pujpoog ib yam li maub hmontuj; txawm yog tseem ciajsia los zoo yam li peb twb tuag lawm. 11Peb nyooj yam li dais; peb quaj txomnyem ntsuav yam li nquab. Peb tosntsoov Vajtswv los pab kom peb dim ntawm txoj kev tsimtxom thiab ua tsis ncaj, tiamsis tsis pom tej ntawd tshwmsim li.
12“Tus TSWV, peb tau ua txhaum ntau kawg rau Koj lawm. Peb tej kev txhaum komtxim rau peb. Peb thov lees paub peb tej kev txhaum ntawd. 13Peb tau ntxeevsiab rau Koj, tau tso Koj tseg, thiab tsis kam raws Koj qab. Peb tau tsimtxom luag thiab tso Koj tseg. Peb tej kev xav los yeej tsis tseeb, thiab peb tej lushais yog lus dag xwb. 14Txoj kev ncajncees tau khiav mus lawm, thiab txoj kev ua zoo nyob deb peb. Txoj kev tseeb ntog rau hauv plawv nroog, thiab txoj kev coj ncaj nrhiav tsis tau lub chaw nyob rau qhovtwg li. 15Txoj kev tseeb tsis muaj lawm; leejtwg uas tso kev phem tseg mas nws tseem raug luag tsimtxom thiab.”
Tus TSWV Cawm Nws Haivneeg
Tus TSWV pom tej no, Nws thiaj tsis txaussiab, vim tsis muaj kev ncajncees lawm. 16Nws xav tsis thoob tias ua licas tsis pom muaj leejtwg pab cov neeg uas raug luag caijtsuj. Yogli ntawd Nws thiaj yuav siv Nws lub hwjchim los cawm lawv, thiab siv Nws txoj kev ncajncees los tso lawv dim. #Yaxaya 63:5 17Nws yuav muab txoj kev ncajncees los ua daim hlau thaiv hauvsiab thiab muab txoj kev cawmdim los ua lub mom hlau. Nws yuav muab txoj kev pauj los ua lub tsho ntev hnav, thiab muab kev chimsiab los qhwv Nws lub cev. #Efex 6:14, 17; 1Thex 5:8 18Nws yuav rautxim rau Nws cov yeebncuab rawsli tej uas lawv tau ua los lawm, xam cov uas nyob tej tebchaws deb huv tibsi. 19Txhua tus uas nyob sab hnubtuaj mus ti sab hnubpoob yuav ntshai Nws thiab Nws lub hwjchim uas loj kawg nkaus. Nws yuav los ib yam li dej huam, thiab ib yam li cuadaj cuadub ntsawj.
20Tus TSWV hais rau Nws haivneeg tias, “Kuv yuav los rau hauv Yeluxalees, los cawm nej txhua tus uas tso kev txhaum tseg. #Loos 11:26 21Thiab Kuv yuav coglus rau nej tias: Kuv twb muab Kuv lub hwjchim thiab Kuv tej lus qhia cob rau nej mus ibtxhis lawm, txij hnubno mus nej yuavtsum hwm Kuv, yuavtsum qhia nej cov menyuam thiab nej tej xeebntxwv kom txawj hwm Kuv mus ibtxhis.”
Currently Selected:
Yaxayas 59: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
