Yaxayas 58
58
Kevcai Yoo Mov Uas Tseeb
1Tus TSWV hais tias, “Qw kom nrov npaum li koj muaj peevxwm qw tau! Ciali qhia rau Kuv haivneeg Yixalayees kom lawv paub txog lawv tej kev txhaum! 2Lawv pehawm Kuv txhua hnub, zoo li lawv kuj xav paub Kuv tus dejsiab thiab ua rawsli Kuv tej kevcai. Lawv thov kom Kuv muab txoj kev ncajncees rau lawv, thiab ua li lawv xav-xav los nyob ze Kuv.”
3Cov pejxeem nug hais tias, “Yog tus TSWV twb tsis pom li, vim licas peb ho ua kevcai yoo mov? Yog Nws twb tsis quavntsej li, vim licas peb thiaj yuav yoo tsis noj dabtsi li?”
Tus TSWV teb lawv tias, “Qhov tseeb yog li no, hnub uas nej ua kevcai yoo mov ntawd yog nej ua rawsli nej lub siab nyiam xwb; thiab thaum nej yoo mov ntawd nej tsimtxom cov neeg uas ua haujlwm rau nej. 4Nej txoj kevcai yoo mov ntawd ua rau nej uanruj uatsiv, sibceg, thiab sibntaus. Nej xav tias txoj kevcai yoo mov zoo li no, ua rau Kuv mloog nej tej lus thov no lov? 5Thaum nej yoo mov, nej muab nej tuskheej tiv kev txomnyem; nej nyo hau ib yam li daim nplooj lojkov, muab ntaub tsaj thiab muab tshauv pua rau nej pw. Ua li ntawd nej suav hais tias yog kevcai yoo mov no lov? Nej xav tias Kuv yuav txaussiab rau tej ntawd no lov?
6“Txoj kevcai yoo mov uas Kuv txaussiab yog li no: Rho tej kev tsimtxom uas zoo li txoj saw hlau, txo txoj kev tsis ncaj uas zoo li tus quab, thiab tso cov neeg uas raug tsimtxom mus. 7Faib nej tej zaub-mov rau cov neeg tshaib plab noj thiab qhib nej lub tsev rau cov neeg pluag uas tsis muaj tsev nyob. Pub khaubncaws rau cov neeg uas tsis muaj hnav, thiab tsis txhob tig nrobqaum rau nej tej kwvtij. #Math 25:34
8“Ces Kuv txojkev txaussiab yuav ci rau nej ib yam li lub hnub ci thaum sawvntxov, thiab nej tej teebmeem yuav ploj mus sai. Kuv yuav nrognraim nej nyob ua nej tus Cawmseej thiab Kuv tus tshwjchim yuav tsomkwm puagncig nej. #Loos 3:15-17 9Thaum nej thov thiab thaum nej hu txog Kuv, Kuv yuav teb nej.
“Yog nej tso txoj kev tsimtxom uas zoo li tus quab, txoj kev taw tes nki rau luag, thiab tej lus phem lus qias tseg; 10yog nej pub zaub-mov rau cov neeg tshaib plab noj thiab pab cov neeg txomnyem, ces qhov tsausntuj uas nyob puagncig nej yuav hloov ua qhov kaj npaum nkaus li thaum tavsu. 11Kuv yuav ua tus coj nej kev mus li, thiab pub dej rau nej thaum nej nyob rau thaj chaw uas qhuav nkig nkuav. Kuv yuav pub nej muajzog thiab nojqab nyobzoo. Nej yuav zoo ib yam li lub vaj uas muaj dej ywg tsis tseg, thiab ib yam li lub qhovdej txhawv uas tsis paub nqhuab li. 12Nej haivneeg yuav rov txhimkho tej uas thaum ub twb puastsuaj tas lawm, thiab yuav rov ua vaj ua tsev rau tej qub chaw. Luag yuav paub tias nej yog cov neeg uas txhimkho tej ntsayeej dua tshiab, thiab yog cov kho tej vajtse uas twb puastsuaj tas lawm.”
Nqizog Rau Txoj Kev Ceev Hnub Xanpataus
13Tus TSWV hais tias, “Yog nej ceev hnub Xanpataus ua hnub dawbhuv thiab tsis ua tej yam rawsli nej lub siab nyiam; yog nej hwm Kuv hnub dawbhuv es tsis txhob ua tej uas nej niajhnub ua, tsis txhob ua haujlwm, thiab tsis txhob hais tej lus uas tsis muaj qabhau, 14ces nej yuav tau txais kev kajsiab los ntawm Kuv. Kuv yuav kom txhua haivneeg hauv qabntuj no hwm nej. Nej yuav txaussiab heev rau lub tebchaws uas Kuv tau muab pub rau nej yawgkoob Yakhauj. Kuv yog tus TSWV uas hais li ntawd.”
Currently Selected:
Yaxayas 58: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
