Yaxayas 57
57
Rautxim Rau Cov Yixalayees Tej Mlom
1Cov neeg zoo tuag, tsis muaj leejtwg quavntsej lossis mobsiab txog lawv. Tiamsis thaum lawv tuag, lawv dim kev nyuajsiab lawm. 2Cov neeg uas ua lub neej ncajncees yuav tau mus so ntawm qhov chaw kajsiab lug thaum lawv tuag.
3Tiamsis nej cov uas yog cov neeg txawj ua khawvkoob tej menyuam, cov neeg ua kev nkauj kev nraug, thiab cov niamntiav, nej cov no yog neeg txhaum, nej ciali los ntawm no, kuv yuav txiavtxim rau nej! 4Nej luag leejtwg plig? Nej rua ncauj thiab hlev nplaig rau leejtwg? Nej tsis yog rojntsha los ntawm cov neeg ntxeevsiab thiab cajces ntawm cov neeg dag lov? 5Nej mus pe tej mlom kom muaj tub muaj ki thiab pheej mus sibdee hauv tej qab ntoo qhib thiab txhua tsob ntoo uas muaj nplooj ntxoov nyos. Nej muab nej tej menyuam mus tua fij nyob rau hauv lub hav tej tsua zeb. 6Nej muab tej pobzeb uas du ntauglees hauv tej qhov ntawd los ua mlom rau nej pe. Nej hliv cawv thiab coj qoobloo mus fij rau tej pobzeb ntawd. Nej xav tias kuv txaussiab rau tej ntawd no lov? 7Nej nce mus fij khoom rau saum tej roob siab thiab mus sibdee. 8Nej muab nej tej mlom mus teeb rau ntawm nej tej pawsrooj. Nej tso kuv tseg; nej hle khaubncaws thiab nce mus rau saum lub txaj uas dav-dav nrog cov uas nej hlub, uas nej them nyiaj rau lawv tuaj nrog nej pw. Lawv lub cev liabqab ntawd ua rau nej txaussiab heev. 9Nej muab tshuaj tswqab pleev kom nej tswqab ntxiag mus pe tus nyuag vajtswv Maulej. Nej txib neeg mus deb heev, txawm yog huv tubtuag teb los lawv mus hauv tibsi, kom nrhiav tau tej nyuag vajtswv los rau nej hlub. 10Nej qaugzog zis vim nej taug kev deb heev mus nrhiav tej nyuag vajtswv ntawd, tiamsis nej yeej tsis tsotseg li. Nej xav tias cov nyuag vajtswv ntawd yuav txhawb nej tus zog, yogli ntawd nej thiaj tsis txawj nkees hlo li.
11Tus TSWV hais tias, “Cov nyuag vajtswv ntawd ua rau nej ntshai lov? Nej thiaj dag Kuv thiab tsis nco txog Kuv lawm puas yog? Kuv nyob ntsiagto tau ntev los lawm, nej thiaj tsis hwm Kuv lawm puas yog? 12Nej khav tias tej uas nej ua ntawd yog kev ncajncees, tiamsis Kuv yuav muab nej tes haujlwm ntawd nthuav tawm, mas nej tej nyuag mlom yeej yuav pab tsis tau nej li. 13Thaum nej quaj thov pab, cia kom nej cov mlom ntawd los cawm nej! Khaubzeeg cua yuav los nqa cov nyuag mlom ntawd mus povtseg! Tiamsis cov uas tsosiab rau Kuv yuav tau nyob hauv lub tebchaws thiab tau Kuv lub roob dawbhuv los ua lawv tug.”
Vajtswv Coglus Yuav Pab Thiab Kho Kom Zoo
14Tus TSWV hais tias, “Cia Kuv haivneeg rovqab los cuag Kuv. Tshem tej yam uas khaumkev hauv txojkev mus povtseg! Ciali kho kev kom zoo thiab tiavlog!
15“Kuv yog tus uas siab thiab yog Vajtswv uas dawbhuv, tus uas nyob mus ibtxhis. Kuv nyob saum lub chaw siab thiab dawbhuv, tiamsis Kuv kuj nrog cov neeg uas txo hwjchim thiab tso lawv tej kev txhaum tseg nyob, kom Kuv thiaj txhawb tau lawv kom muaj kev ruajsiab thiab kev ciasiab. 16Kuv tau pub txojsia rau Kuv haivneeg lawm, mas Kuv yuav tsis komtxim rau lawv lossis npautaws rau lawv mus ibtxhis li lawm.#57:16: Kuv tau pub txojsia… mus ibtxhis li lawm; lossis Kuv yuav tsis komtxim rau lawv lossis chim rau lawv mus ibtxhis li lawm, nyobtsam txhua tus neeg uas Kuv tau muab txojsia rau ho tuag tas. 17Kuv npautaws rau lawv, vim lawv tej kev txhaum thiab ua siabhlob, yogli ntawd Kuv thiaj rautxim rau lawv thiab muab lawv tsotseg. Txawm li ntawd los lawv tseem pheej ua rawsli lawv lub siab nyiam xwb.
18“Kuv yeej paub tej uas lawv ua lawm, tiamsis Kuv yuav kho kom lawv zoo. Kuv yuav coj lawv, pab lawv, thiab Kuv yuav nplig cov uas muaj kev txomnyem siab. 19Kuv yuav pub txoj kev thajyeeb nyabxeeb rau txhua tus, tsis hais cov uas nyob deb lossis nyob ze! Thiab Kuv yuav kho Kuv haivneeg kom zoo. #Efex 2:17 20Tiamsis tus neeg uas ua phem ces zoo li dej hiavtxwv ntas mus ntas los tsis paub tus li, ua rau tej yam qias tawm tuaj. 21Cov neeg ua phem yeej tsis muaj kev kajsiab hlo li.” Tus TSWV yog tus hais li ntawd. #Yaxaya 48:22
Currently Selected:
Yaxayas 57: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
