Yaxayas 55
55
Vajtswv Txoj Kev Tabncuab
1Tus TSWV hais tias,
“Txhua tus uas nqhis dej, ciali los,
muaj dej nyob ntawm no!
Nej cov uas tsis muaj nyiaj, ciali los,
yuav mov noj!
Ciali los yuav cawv txivhmab thiab mis nyuj;
tsis tas them ib qhov nqi li! #Tshwm 21:6; 22:17
2Vim licas nej siv nej tej nyiaj mus yuav tej uas tsis yog mov?
Vim licas nej siv nej tej nqizog mus yuav tej uas tsis txaus nej siab?
Ciali mloog Kuv hais, nej thiaj tau noj tej zaub-mov uas zoo,
thiab thiaj yuav txaussiab rau tej zaub-mov uas qab-qab ntawd.
3“Kuv haivneeg, nej ciali mloog thiab los cuag Kuv,
nej thiaj yuav muaj sia nyob!
Kuv yuav coglus ruaj-khov rau nej mus ibtxhis
thiab yuav muab tej koobhmoov uas Kuv tau coglus tseg rau Daviv lawm rau nej. #Teshl 13:34
4Kuv tau tsa nws ua ib tug thawjcoj thiab kav ntau haivneeg,
nws thiaj ua rau tej neeg sawvdaws pom txog Kuv lub hwjchim.
5Zaumno nej yuav nquahu ibtsoom tebchaws uas nej tsis paub, kom tuaj cuag nej;
mas tej pejxeem uas nej tsis paub ntawd
yuav khiav zomzaws tuaj rau ntawm nej.
Kuv, uas yog tus TSWV, yog nej tus Vajtswv, yog cov Yixalayees tus Vajtswv dawbhuv,
yuav ua kom tej no tshwmsim tuaj;
Kuv yuav ua kom nej tau koobmeej thiab tshwjchim.”
6Ciali nrhiav tus TSWV thaum tseem nrhiav tau Nws;
ciali thov Nws thaum Nws tseem nyob ze.
7Kom cov neeg siabphem ciali tso lawv tej kev phem tseg,
thiab kom cov neeg siab tsis ncaj ciali tso lawv tej kev xav tseg.
Kom lawv tig los cuag tus TSWV, uas yog peb tus Vajtswv;
Nws yuav tabncuab lawv thiab yuav zam lawv lub txim.
8Tus TSWV hais tias, “Kuv tej kev xav tsis zoo li nej tej kev xav,
thiab tej uas Kuv ua tsis zoo li tej uas nej ua.
9Lub ntuj nyob siab tshaj lub ntiajteb licas,
ces tej uas Kuv ua thiab tej uas Kuv xav nyob siab tshaj tej uas nej ua thiab tej uas nej xav npaum li ntawd.
10“Kuv txojlus zoo yam li daus thiab nag
uas los saum nruabntug los ywg lub ntiajteb.
Tej daus thiab nag ntawd ua rau tej qoobloo lojhlob, tawgpaj txitxiv,
thiaj muaj noob rau tus cog qoobloo thiab muaj mov rau tus tshaib plab noj. #2Klt 9:10
11Ib yam nkaus li ntawd, tej lus uas tawm hauv Kuv lub ncauj mus lawm—
yuav tsis rovqab los cuag Kuv dawb do ib zaug li,
tiamsis yuav tawgpaj txitxiv rawsli Kuv tau npaj tseg lawm;
thiab yuav ua txhua yam uas Kuv tau tso Nws mus ua kom tiav.
12“Nej yuav tawm hauv lub nroog Npanpiloos mus zoosiab hlo,
luag yuav coj nej tawm kajsiab lug hauv lub nroog ntawd mus.
Tej roob thiab tej povroob yuav tsa suab hlo hunkauj,
thiab tej xyoob tej ntoo yuav npuajtes zoosiab!
13Ntoo ciab yuav lojhlob tuaj hloov ntoo pos chaw,
thiab ntoo tswqab yuav tuaj hloov hav pos chaw.
Tej no yuav ua ib lub cim nyob mus ibtxhis li,
uas yog qhia txog tej uas Kuv, uas yog tus TSWV, tau ua los.”
Currently Selected:
Yaxayas 55: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
