Yaxayas 54
54
Tus TSWV Txoj Kev Hlub Rau Cov Yixalayees
1Yeluxalees, koj zoo li tus pojniam uas tsis tau muaj dua menyuam,
tiamsis nimno koj yuav hunkauj thiab qw vim zoosiab!
Nimno koj yuav muaj menyuam coob tshaj
tus pojniam uas nws tus txiv nyob nrognraim nws. #Kalat 4:27
2Ciali rub koj lub tsevntaub kom dav ntxiv,
txuas tej hlua kom ntev thiab txhos tej tswg kom khov!
3Koj yuav txav koj ciam dej ciam av ntawm txhua phab kom dav mus ntxiv,
koj tej pejxeem yuav rov los nyob hauv lawv tej qub teb qub chaw
uas nimno lwm haivneeg los nyob lawm.
Tej nroog uas nimno ciaj suabpuam tas lawm yuav rov muaj neeg nyob puvnkaus.
4Koj tsis txhob ntshai, koj yuav tsis raug kev txajmuag lawm,
koj yuav tsis raug luag hais saib tsis taus lawm.
Koj yuav tsis nco txog tej kev txajmuag uas koj tau ua thaum koj tseem hluas,
thiab tsis nco txog tej lus txobthuam uas thaum koj ua pojntsuam lawm.
5Tus uas tsim koj yuav zoo yam li koj tus txiv,
Nws lub npe hu ua tus TSWV uas muaj Hwjchim Loj Kawg Nkaus.
Cov Yixalayees tus Vajtswv uas dawbhuv yuav cawm koj
Nws yog tus kav tagnrho lub ntiajteb no.
6Yixalayees, koj zoo nkaus li tus pojniam hluas
uas tus txiv muab tsotseg ua rau nyuajsiab heev.
Tiamsis tus TSWV hu koj rov los cuag Nws thiab hais tias,
7“Kuv tso koj tseg ib nyuag ntu xwb,
tiamsis Kuv hlub koj heev, Kuv yuav coj koj rov los.
8Vim Kuv chim heev, Kuv thiaj fee plhu ntawm koj mus ib ntus,
tiamsis Kuv yuav qhia Kuv txoj kev hlub uas nyob mus ibtxhis rau koj.”
Tus TSWV uas cawm koj yog tus hais li ntawd.
9“Thaum Nau-as tiam Kuv tau coglus tseg
tias yuav tsis pub dej nyab lub ntiajteb ib zaug ntxiv li lawm.
Nimno Kuv coglus yuav tsis chim rau koj ib zaug ntxiv li lawm;
Kuv yuav tsis cem lossis rautxim rau koj. #Chiv 9:8-17
10Txawm cov hauv roob thiab cov povroob yuav ploj mus,
los Kuv txoj kev hlub rau koj yuav tsis paub kawg li;
Kuv yuav ua rawsli Kuv tau coglus tias Kuv yuav muaj kev kajsiab rau koj.”
Tus TSWV uas hlub koj yog tus uas hais li ntawd.
Lub Nroog Yeluxalees Tshiab
11Tus TSWV hais tias,
“Au, Yeluxalees, koj yog lub nroog uas raug kev txomnyem lwjsiab, tsis muaj leejtwg pab,
thiab tsis muaj leejtwg nplig koj li,
Kuv yuav rov muab tej pobzeb muajnqis los puab koj.
12Kuv yuav muab tej qe zeb iav los ua koj tej chaw tsomfaj,
muab tej pobzeb uas ci li nplaimtaws los ua koj tej roojloog,
thiab muab tej hlaws muajnqis los ua tus ntsayeej thaiv puagncig koj. #Tshwm 21:18-21
13“Kuv yuav qhia koj haivneeg
thiab yuav pub kev vammeej thiab kev thajyeeb rau lawv. #Yauh 6:45
14Txoj kev ncajncees yuav ua rau koj nyob ruaj-khov,
koj yuav tsis raug luag tsimtxom thiab yuav tsis muaj kev txhawj-ntshai.
15Yog leejtwg tawmtsam koj, qhov ntawd tsis yog Kuv tso ncauj,
yog leejtwg tawmtsam koj, tus ntawm yuav swb koj.
16“Kuv yog tus tsim tus kws ntaus hlau,
nws thiaj rauv thee thiab teeb lwjhlaus ntaus cuabyeej uarog.
Kuv yog tus tsim tus tubrog,
nws thiaj siv tej cuabyeej ntawd mus sibntaus sibtua.
17Tiamsis yuav tsis muaj ib yam cuabyeej twg uas yuav tawmtsam yeej koj li,
koj yuav muaj lus teb txhua tus neeg uas komtxim rau koj.
Kuv yuav tivthaiv Kuv cov tubtxib
thiab pab kom lawv yeej.”
Tus TSWV yog tus uas hais tej los no.
Currently Selected:
Yaxayas 54: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
