Yaxayas 51
51
Tej Lus Npligsiab Rau Lub Nroog Yeluxalees
1Tus TSWV hais tias,
“Nej cov uas raws txoj kev ncajncees
thiab nrhiav tus TSWV, nej ciali mloog Kuv hais.
Ncontsoov saib lub pobzeb uas txua nej tawm los
thiab qhov chaw uas khawb nej tawm hauv cov pobzeb ntawd los.
2Ncontsoov nej yawgkoob Anplahas
thiab nej pogkoob Xalas, uas yug nej cov uas ua xeebntxwv.
Thaum Kuv hu Anplahas, nws tsis muaj ib tug menyuam li,
tiamsis Kuv foom koobhmoov rau nws thiab pub rau nws muaj menyuam;
Kuv pub rau nws muaj xeebntxwv coob heev.
3“Kuv yuav nplig cov neeg hauv Yeluxalees,
thiab txhua tus uas nrog nws raug puastsuaj tag lawm lub siab.
Txawm yog nws lub tebchaws yog tiajnrag mojsab xwb los xij,
Kuv yuav muab kho ua ib lub vaj, zoo li lub Vaj Edees.
Yuav muaj kev zoosiab thiab kev kajsiab nyob hauv,
thiab yuav muaj lub suab hunkauj qhuas Kuv thiab ua Kuv tsaug.
4“Kuv haivneeg 'e, nej ciali mloog Kuv hais,
Kuv lub tebchaws 'e, ciali tig pobntseg mloog Kuv tej lus.
Kuv txoj kevcai yuav tawm ntawm Kuv mus,
thiab Kuv txoj kev ncajncees yuav ua lub teeb ci rau txhua haivneeg.
5Kuv yuav ceevnrooj los cawm lawv;
Kuv txoj kev cawmdim twb los lawm.
Kuv txhais npab yuav kav txhua haivneeg.
Cov tebchaws uas nyob deb tos rawv Kuv;
ciasiab ntsoov rau Kuv uas yuav cawm lawv.
6Nej ciali tsa qhovmuag saib saum nruabntug thiab saib rau hauv ntiajteb!
Lub ntuj yuav yaj ntshis zoo li tej pataws;
lub ntiajteb yuav ntuag tas li tej qub khaubncaws,
thiab tej neeg uas nyob hauv ntiajteb yuav tuag tas zoo li tej yoov.
Tiamsis Kuv txoj kev cawmdim yuav nyob mus ibtxhis;
Kuv txoj kev ncajncees yuav kav mus tsis paub kawg li.
7“Nej cov uas paub txoj kev ncajncees,
thiab cov uas khaws Kuv txoj kevcai rau nruabsiab, ciali mloog Kuv hais.
Nej tsis txhob ntshai thaum neeg thuam thiab saib tsis taus nej,
8vim ntsaum kabrwg yuav noj lawv ib yam li noj tej khaubncaws!
thiab cab yuav noj lawv ib yam li noj tej ntaub plaub yaj.
Tiamsis Kuv txoj kev ncajncees yuav muaj nyob mus ibtxhis,
thiab Kuv txoj kev cawmdim yuav muaj rau txhua tiam neeg.”
9Tus TSWV, sawv los, sawv los pab peb lau!
Siv Koj lub hwjchim cawm peb,
ib yam li Koj tau ua yav thaum ub los lawm.
Koj yog tus uas muab tus zaj Lahaj#51:9: Lahaj: Zaj dabneeg txog tus zaj hauv hiavtxwv, piv txog kev tsimtxom thiab kev phem, thiab tej thaum kuj yog lub cim piv txog cov Iziv. txiav ua tej thooj.
10Koj yog tus uas ua rau dej hiavtxwv nqhuab
thiab ua ib txojkev taug hauv dej mus rau sab tim ub,
kom cov neeg uas Koj cawm thiaj hla dhau rau sab tid.
11Cov neeg uas Koj tau cawm lawv dim lawm,
yuav hunkauj zoosiab thaum lawv rovqab los rau hauv Yeluxalees.
Lawv yuav muaj kev zoosiab mus tag ibtxhis,
kev txomnyem quajntsuag thiab kev tusiab yuav tsis raug lawv ntxiv li lawm.
12Tus TSWV hais tias,
“Kuv yog tus txhawb nej tus zog.
Vim licas nej thiaj ntshai cov neeg txawj tuag,
uas tsuas nyob ntev zoo li tej nyom xwb?
13Nej hnovqab tus TSWV uas tsim nej,
tus uas nthuav lub ntuj
thiab pua lub ntiajteb lawm lov?
Vim licas nej thiaj ua neej nyob niajhnub ntshai
cov neeg phem txoj kev caijtsuj nej
thiab xav kom nej puastsuaj xwb?
Lawv tej kev nrujtsiv yeej ua tsis tau licas rau nej.
14Tshuav tsis ntev Kuv yuav tso cov neeg raug txim tawm los;
lawv yuav tsis tuag rau hauv tej tsev lojcuj,
thiab yuav muaj noj muaj haus tsaunpo.
15“Kuv yog tus TSWV uas yog nej tus Vajtswv,
Kuv yog tus do hiavtxwv
kom ntas nphau tej niag nthwv thiab nrov ntxhe ntws.
Kuv lub npe hu ua tus TSWV uas muaj Hwjchim Loj Kawg Nkaus!
16Kuv nthuav#51:16: Ib phau ntawv qub-qub thaum ub sau hais tias nthuav; phau lus Henplais hais tias muab cog. lub ntuj
thiab pua lub ntiajteb.
Kuv hais rau cov neeg hauv Yeluxalees tias, ‘Nej yog kuv haivneeg!
Kuv muab Kuv tej lus tso rau hauv nej lub qhovncauj
thiab Kuv txhais tes ua ntxoovntxoo roos nej.’ ”
Yeluxalees Tej Kev Txomnyem Dhau Lawm
17Yeluxalees, ciali sawv, ciali sawv!
Ciali tsa koj tuskheej thiab sawv!
Koj twb haus tus TSWV lub khob uas yog txoj kev npautaws lawm.
Koj twb tsa hlo lub khob ntawd haus,
thiaj ua rau koj ntog pujpoog. #Tshwm 14:10; 16:19
18Cov menyuam uas koj yug,
tsis muaj ib tug coj koj kev;
cov menyuam uas koj tu hlob,
tsis muaj ib tug los tuav koj tes.
19Muaj ob yam kev puastsuaj los raug koj:
koj lub tebchaws tau piamsij tas vim kev tsov kev rog,
thiab koj haivneeg ntsib kev tshaib kev nqhis.
Tiamsis tsis muaj leejtwg nplig koj siab li.
20Koj cov menyuam ciali tsaugmuag,
lawv pw pawglug ntawm tej kev;
zoo li tej kauv uas mag neeg cuab tsiaj lub vas.
Lawv raug Vajtswv txoj kev chim thiab Nws tej lus cem.
21Nej cov neeg uas raug kev txomnyem hauv nroog Yeluxalees,
nej cov uas ntog pujpoog cuag qaugcawv, tiamsis tsis yog haus cawv ntxws,
22Tus TSWV uas yog nej tus Vajtswv, tus uas tivthaiv nej hais tias,
“Saib maj, Kuv muab lub khob uas yog txoj kev npautaws
rho tawm ntawm nej txhais tes mus lawm.
Lub khob uas yog Kuv txoj kev npautaws
thiab ua rau nej ntog pujpoog ntawd, nej yuav tsis tau haus ntxiv lawm.
23Kuv yuav muab lub khob ntawd rau cov neeg uas caijtsuj nej,
muab rau cov uas yuam nej pw hauv tej kev
thiab tsuj nej nrobqaum cuag li nej yog tej hmoov av.”
Currently Selected:
Yaxayas 51: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
