Yaxayas 52
52
Vajtswv Yuav Cawm Cov Neeg Hauv Yeluxalees
1Yeluxalees, ciali sawv, ciali sawv, ciali rov muajzog thiab khovkho tuaj!
Vajtswv lub nroog uas dawbhuv, ciali hnav tej tsoostsho uas zoo tshajplaws!
Cov neeg uas tsis ua kevcai txiav thiab cov uas tsis huv,
yuav tsis mus ntawm koj tej roojloog los rau hauv koj ib zaug ntxiv li lawm. #Tshwm 21:2, 27
2Yeluxalees, ciali nchos koj tej hmoov av!
Ciali sawv mus nyob saum lub zwmtxwv.
Xi-oos tus ntxhais uas raug ntes 'e,
ciali daws txoj saw hlau uas khi koj cajdab povtseg!
3Tus TSWV uas kav ibpuas tsavyam hais rau Nws haivneeg tias, “Thaum nej mus ua luag qhev, luag twb tsis muab nyiaj yuav nej; yogli ntawd yuav tsis muab nyiaj txhiv nej rovqab los thiab. 4Thaum nej khiav mus nyob nram tebchaws Iziv, cov Axilias tau tuaj quabyuam caijtsuj nej thiab tsis them ib yam dabtsi li. 5Nimno tej xwm no muaj nyob rau hauv Npanpiloos lawm thiab. Nej raug lawv ntes mus ua qhev, lawv twb tsis them nqi yuav nej. Cov neeg uas kav nej thiaj khav thiab thuam Kuv lub npe. #Loos 2:24 6Muaj ib hnub twg nej yuav lees paub tias Kuv yog Vajtswv, thiab nej yuav paub tias Kuv twb hais tej no rau nej lawm.”
7Cov neeg uas coj txoj xov zoo,
uas hais txog kev thajyeeb thiab kev cawmdim,
hla tojroob hauvpes tuaj
mas lawv txhais kotaw zoonkauj kawg li!
Nws hais rau cov neeg hauv lub nroog Yeluxalees tias,
“Nej tus Vajtswv yog Vajntxwv!” #Nahus 1:15; Loos 10:15; Efex 6:15
8Cov neeg uas zov lub nroog tsa lawv lub suab
qw zomzaws zoosiab heev.
Vim lawv qhovmuag pom ntsoov tus TSWV
rov los rau hauv Yeluxalees lawm.
9Lub nroog Yeluxalees uas tawg tas lawm,
ciali hunkauj zoosiab!
Tus TSWV yuav cawm Nws lub nroog
thiab nplig Nws haivneeg siab.
10Tus TSWV yuav siv Nws lub hwjchim uas dawbhuv;
Nws yuav cawm Nws haivneeg,
mas thoob ntiajteb yuav pom Vajtswv txoj kev cawmdim.
11Ciali tawm, ciali tawm hauv lub nroog Npanpiloos mus!
Tsis txhob kov tej yam uas tsis huv!#52:11: tej yam uas tsis huv: Yog txhua yam khoom uas suav tau tias tsis huv.
Nej cov uas nqa tus TSWV tej cuabyeej siv hauv lub Tuamtsev,
ciali tawm mus thiab ua kevcai ntxuav kom nej huv. #2Klt 6:17
12Zaumno tsis tas nej yuav maj tawm,
rauqhov tsis yog nej yuav nyiagkev khiav.
Tus TSWV uas yog nej tus Vajtswv yuav coj nej txoj haukev;
thiab yuav thaiv tom nej qab.
Tus Tubtxib Tej Kev Txomnyem
13Tus TSWV hais tias,
“Kuv tus tubtxib yuav ua tibzoo ua nws tes haujlwm;
nws yuav raug hwm thiab raug tsa rau qhov chaw siab.#52:13: raug tsa rau qhov chaw siab; lossis rov raug tsa ua tus loj tshaj thiab raug hwm.
14Thaum muaj coob leej pom nws, lawv yuav xav tsis thoob;
nws lub ntsejmuag thiab nws lub cev txawv heev, zoo tsis thooj li neeg lub.
15Nws yuav ua rau ntau haivneeg ceeb,
tej vajntxwv yuav yoob tas, hais tsis taus ib lolus li.
Lawv yuav pom yam uas tsis tau muaj leejtwg qhia rau lawv,
thiab yuav totaub txog yam uas lawv tsis tau paub dua li.” #Loos 15:21
Currently Selected:
Yaxayas 52: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
