Yaxayas 36
36
Cov Axilias Thiab Lub Nroog Yeluxalees
(2 Vajntxwv 18:13-27; 2 Xwmtxheej Vajntxwv 32:1-19)
1Xyoo thib kaum-plaub uas Hexekiyas ua vajntxwv kav lub tebchaws Yudas, huabtais Xenakhelis uas kav lub tebchaws Axilias txawm tuaj tua cov Yudais tej nroog uas muaj ntsayeej thaiv thiab txeeb tau tagnrho tej nroog ntawd huv tibsi lawm. 2Ces tus vajntxwv kav Axilias ntawd txawm tso nws tus thawj tubrog hauv lub nroog Lakhis nrog ib pab tubrog mus rau hauv Yeluxalees. Tus thawj tubrog thiaj mus sawv rau ntawm txojkev ntawm qhov chaw ntos ntaub uas npuab tus kwjdeg uas ntws ntawm lub pas dej theem saud los.
3Muaj peb tug neeg Yudais txawm tawm mus cuag nws: Hilekiyas tus tub Eliakees, uas yog tus saib lub loog; Senpenas, uas yog tus teevntawv; thiab Axafes tus tub Yau-as, uas yog tus ceev tej ntaub ntawv. 4Ces cov Axilias tus thawj tubrog hais rau lawv tias tus huabtais kav Axilias xav paub seb dabtsi ua rau vajntxwv Hexekiyas muaj kev ruajsiab ualuaj. 5Nws hais tias, “Nej xav tias lolus hais xwb ces txawm muajceem npaum li ib pab tubrog tus dagzog lawm no lov? Nej xav tias leejtwg yog tus yuav pab nej ntxeevsiab tawmtsam cov Axilias? 6Nej ciasiab tias cov Iziv yuav pab nej, tiamsis lawv tsuas zooli tus lojkov uas muab ua pas nrig xwb, nws yuav lov thiab chob nej tes. Falaus uas yog cov Iziv tus vajntxwv ces yeej zoo li ntawd rau txhua tus uas ciasiab rau nws.” #Exek 29:6-7
7Cov Axilias tus thawj tubrog hais ntxiv tias, “Lossis puas yog nej yuav hais rau kuv tias nej ciasiab rau tus TSWV uas yog nej tus Vajtswv? Twb yog Hexekiyas muab tus TSWV tej chaw pehawm saum roob siab thiab tej thaj rhuav puastsuaj tag, thaum nws hais cov Yudais thiab cov Yeluxalees kom mus pehawm ntawm tiblub thaj fij nkaus xwb? 8Kuv tuav kuv tus huabtais lub npe thomnqi nrog nej. Kuv yuav muab 2,000 tus nees rau nej yog tias nej nrhiav tau npaum li ntawd tus tibneeg los caij. 9Nej twb kov tsis yeej kuv tus vajntxwv uas kav lub tebchaws Axilias tus thawj tubrog uas qis tshajplaws no, uacas nej tseem yuav kom cov Iziv coj tsheb nees thiab tubrog caij nees tuaj pab nej! 10Nej xav tias tus TSWV tsis pab kuv tuaj tua thiab rhuav nej lub tebchaws no lov? Twb yog tus TSWV kom kuv tuaj tua thiab rhuav nej lub tebchaws ntag.”
11Ces Eliakees, Senpenas, thiab Yau-as thiaj hais rau tus thawj tubrog ntawd tias, “Koj tsis txhob haislus Henplais, koj haislus Alamej los peb yeej totaub, rauqhov cov pejxeem uas nyob saum tej ntsayeej, puavleej mloog huv tibsi.”
12Tus thawj tubrog ntawd teb tias, “Nej xav tias kuv tus vajntxwv txib kuv tuaj hais tej no rau nej thiab nej tus huabtais xwb no lov? Tsis yog li ntawd. Kuv hais rau cov pejxeem uas zaum tsaws rau saum tus ntsayeej huv tibsi, rauqhov lawv yuav noj lawv tej quav thiab haus lawv tej zis ib yam li nej thiab.”
13Ces cov Axilias tus thawj tubrog sawvtsees qw ua lus Henplais tias, “Nej ciali mloog tus huabtais uas kav lub tebchaws Axilias tej lus uas nws hais rau nej nawb! 14Nws hais tias nej tsis txhob cia Hexekiyas dag-ntxias nej. Hexekiyas yeej cawm tsis tau nej li. 15Thiab tsis txhob cia nws haub-ntxias nej kom ciasiab rau tus TSWV. Tsis txhob xav tias tus TSWV yuav cawm kom nej dim thiab tsis pub lub nroog no poob rau cov Axilias tus vajntxwv txhais tes. 16Tsis txhob mloog Hexekiyas lus! Cov Axilias tus huabtais xaaj kom nej ciali tawm hauv nroog los thiab nyoo nws. Nws yuav pub rau nej tau noj tej txivhmab thiab txiv ncuavpias hauv nej tej vaj, thiab tau haus tej dej hauv nej tej qhovdej 17mus txog hnub uas huabtais coj nej mus nyob hauv lub tebchaws uas zoo ib yam li nej lub, uas muaj txivhmab ua cawv thiab muaj nplej ua ncuav. 18Nej tsis txhob cia Hexekiyas ntxias kom nej xav tias tus TSWV yuav cawm nej. Puas muaj ib haivneeg twg uas lawv tej nyuag vajtswv cawm tau lawv dim ntawm cov Axilias tus vajntxwv txhais tes? 19Cov Hamaj thiab cov Apas tej nyuag vajtswv nyob qhovtwg lawm? Cov Xefavayees tej nyuag vajtswv nyob qhovtwg lawm? Tej nyuag vajtswv ntawd puas cawm tau lub nroog Xamalis? 20Thaum twg tej tebchaws ntawd tej nyuag vajtswv twb cawm tau lawv dim ntawm peb tus huabtais txhais tes lawm? Yogli ntawd, dabtsi ua rau nej xav tias tus TSWV yuav cawm tau lub nroog Yeluxalees?”
21Cov pejxeem nyob ntsiagto, rauqhov Vajntxwv Hexekiyas tau xaaj kom lawv tsis txhob teb ib los li. 22Ces Eliakees, Senpenas, thiab Yau-as nyuajsiab heev, lawv txawm muab lawv tej tsho dua thiab mus piav tej lus uas cov Axilias tus thawj tubrog hais ntawd rau vajntxwv Hexekiyas mloog.
Currently Selected:
Yaxayas 36: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
