Yaxayas 37

Vajntxwv Hexekiyas Tuavxam Nrog Yaxayas

(2 Vajntxwv 19:1-7)

1Thaum Vajntxwv Hexekiyas hnov tej lus ntawd, nws nyuajsiab heev, nws dua rhe nws lub tsho thiab muab ntaub tsaj los hnav, thiab mus rau hauv tus TSWV lub Tuamtsev. 2Nws txib Eliakees uas yog tus saib lub loog, Senpenas, uas yog tus teevntawv, thiab cov thawjcoj ntawm povthawj hlob kom mus cuag Yaxayas, uas yog tus xibhwb cev Vajtswv lus, uas yog Amoj tus tub. Lawv puavleej hnav ntaub tsaj huv tibsi. 3Vajntxwv kom lawv mus hais rau Yaxayas li no: “Hnubno yog ib hnub uas muaj kev txomnyem; peb tabtom raug tsimtxom thiab poob ntsejmuag. Peb zoo li tus pojniam uas txog caij yug menyuam lawm tiamsis nws tsis muajzog yug nws tus menyuam. 4Tus huabtais uas kav lub tebchaws Axilias tau txib nws ib tug thawj tubrog tuaj thuam Vajtswv tus uas muaj sia nyob. Thov tus TSWV uas yog koj tus Vajtswv hnov tej lus txobthuam ntawd thiab rautxim rau cov neeg uas tuaj hais tej lus ntawd. Yogli ntawd, koj ciali thov Vajtswv pab peb cov uas tseem seem nyob no.”

5Thaum Yaxayas hnov tej lus uas Vajntxwv Hexekiyas hais lawm, 6nws thiaj kom lawv rov mus hais rau vajntxwv tias, “Tus TSWV kom koj tsis txhob ntshai tus vajntxwv uas kav lub tebchaws Axilias tej lus thuam uas hais tias Nws yuav pab tsis tau nej. 7Tus TSWV yuav ua kom tus huabtais ntawd hnov lus huab lus cua uas ua rau nws ciali rov mus rau pem nws lub tebchaws, thiab tus TSWV yuav ua kom nws raug tua rau ped.”

Cov Axilias Xa Dua Ib Cov Neeg Mus Thab-plaub

(2 Vajntxwv 19:8-19)

8Cov Axilias tus thawj tubrog paub tias huabtais tau tawm hauv lub nroog Lakhis mus tua lub nroog Linas uas nyob tsis deb ntawd; nws txawm mus nrog huabtais sablaj. 9Cov Axilias tus vajntxwv hnov tias Vajntxwv Tawhakas, uas kav lub tebchaws Itiupias,#37:9: Phau lus Henplais hais tias Khuses: Khuses yog ib lub npe thaum ub uas nyob rau ib cheebtsam qabteb ntawm tus Dej Nais. Cheebtsam no, nyob rau tiam thaum nomtswv Loos kav tebchaws, yog hu ua Itiupias, uas tus ciamteb yog los ti nkaus rau tebchaws Xudas thiab tiam nimno hu ua Itiupias. coj ib pab tubrog Iziv tuaj tua lawv lawm. Nws txawm txib neeg mus hais rau Vajntxwv Hexekiyas 10uas kav tebchaws Yudas tias, “Tsis txhob cia tus nyuag vajtswv uas koj ciasiab rau ntxias tau koj tias koj yuav tsis poob rau kuv txhais tes. 11Nyaj koj hnov tej uas cov Axilias tus huabtais tau ua rau tej tebchaws uas nws xav muab ua kom puastsuaj ntawd lawm. Koj xav tias koj yuav khiav dim no lov? 12Kuv cov yawgkoob twb ua rau lub nroog Nkauxas, Halas, thiab Lexes puastsuaj tag, thiab tua cov neeg Npethedees uas nyob hauv Telaxas tuag tag, thiab lawv tej nyuag vajtswv yeej tsis muaj ib tug los pab lawv dim li. 13Cov vajntxwv uas kav lub nroog Hamaj, Apas, Xefavayees, Henas, thiab Ivas dua twg tag lawm?”

14Vajntxwv Hexekiyas txais tsab ntawv ntawm cov xa tuaj los nyeem. Nws coj tsab ntawv mus rau hauv lub Tuamtsev thiab muab nthuav rau ntawm tus TSWV xubntiag, 15thiab thov tus TSWV hais tias, 16“Cov Yixalayees tus Vajtswv, tus TSWV uas muaj Hwjchim Loj Kawg Nkaus, tus zaum saum cov khelunpees tej phab tis. Koj tibleeg xwb thiaj yog tus Vajtswv uas kav tagnrho txhua lub tebchaws hauv ntiajteb no. Koj yog tus uas tsim lub ntuj thiab lub ntiajteb. 17Tus TSWV, thov tig pobntseg los mloog thiab tsa qhovmuag los saib tej xwm uas los raug peb. Thov Koj mloog tej lus uas Xenakhelis thuam Koj, uas yog Vajtswv tus muaj sia nyob. 18Tus TSWV, peb paub tias cov Axilias cov huabtais tau tua ntau haivneeg thiab rhuav lawv tej tebchaws puastsuaj tag nyob qhuav nquas cia, 19thiab muab lawv tej nyuag vajtswv uas yeej tsis yog Vajtswv hlo li, hlawv povtseg tag, tej ntawd yog pobzeb thiab ntoo uas siv neeg txhais tes txua xwb. 20Tus TSWV uas yog peb tus Vajtswv, nimno thov Koj pab peb kom dim ntawm cov Axilias txhais tes, kom txhua haivneeg uas nyob hauv ntiajteb thiaj yuav paub tias Koj tibleeg xwb thiaj yog Vajtswv.”

Yaxayas Xa Xov Mus Rau Vajntxwv

(2 Vajntxwv 19:20-37)

21Tomqab ntawd Yaxayas xa xov mus hais rau Vajntxwv Hexekiyas tias 22tus TSWV teb tias, “Xenakhelis, lub nroog Yeluxalees luag koj plig thiab hnyos koj. 23Koj puas tau saib tsis taus thiab thuam leejtwg? Twb yog koj tsis hwm Kuv, uas yog cov Yixalayees tus Vajtswv, uas dawbhuv ntag! 24Koj txib koj cov tubtxib xa xov tuaj hais khav ntxhias rau Kuv tias vim koj muaj tsheb nees ntau heev, koj thiaj mus txeeb tau tej roob siab tshajplaws hauv tebchaws Lenpanoos. Koj khav tias koj twb muab cov ntoo ciab uas siab tshaj thiab cov ntoo thuv uas zoo tshaj ntov tag, thiab koj mus txog hauv lub plawv zoov nujtxeeg uas deb heev. 25Koj khav tias koj tau mus khawb qhovdej thiab haus tej dej hauv luag tej tebchaws thiab koj cov tubrog tau mus tsuj tus Dej Nais nram tebchaws Iziv nqhuab kiag.

26“Koj tsis tau hnov tias Kuv twb npaj tej no ntev los lawm no lov? Nimno Kuv thiaj ua rawsli Kuv tau hais tseg. Kuv pub koj muaj hwjchim rhuav tej nroog uas luag txhim ntsayeej khovkho ntawd vau tag ua tsheej pawg cia. 27Cov neeg uas nyob hauv tej nroog ntawd yeej tsis muajzog li, lawv ntshai heev thiab tsis paub yuav ua licas. Lawv zooli tej nrojtsuag uas tuaj hauv tej teb lossis zooli tej yub nroj uas tuaj saum tej rutsev, txheej tsev lastshav, uas raug cov cua kub sab hnubtuaj ntsawj. #37:27: Nqe no sau hais tias uas raug cov cua kub sab hnubtuaj ntsawj; phau lus Henplais hais tias tuag uantej tej nroj ntawd tuaj.

28“Tiamsis Kuv paub txhua yam txog koj, paub tias koj ua dabtsi thiab koj mus qhovtwg. Kuv paub tias koj chim rau Kuv npaum licas. 29Kuv hnov txog koj txoj kev chim thiab kev khavtheeb, yogli ntawd Kuv yuav muab nqelauj los nqe koj qhovntswg thiab muab hwm loojthawb los sam koj qhovncauj, thiab cab koj rovqab taug txojkev uas koj tuaj mus.”

30Ces Yaxayas hais rau Vajntxwv Hexekiyas tias, “No yog ib lub cim uas qhia tias yuav muaj xwm tshwm los: Xyoo no thiab lwm xyoo, nej yuav tau noj tej qoobloo uas nws tuaj nws, tiamsis xab xyoo nej yuav cog thiab yuav tau sau. Nej yuav cog txivhmab thiab tau noj tej txivhmab ntawd. 31Cov uas seem thiab tseem nyob rau hauv Yudas yuav lojhlob zoo li tsob ntoo uas tej cag ntsia av tob-tob thiab yuav tawgpaj txitxiv. 32Yuav muaj neeg nyob rau hauv lub nroog Yeluxalees thiab saum lub Roob Xi-oos uas yog cov seem, rauqhov tus TSWV uas muaj Hwjchim Loj Kawg Nkaus yeej npajsiab kom muaj li ntawd.

33“Tus TSWV hais txog tus huabtais uas kav lub tebchaws Axilias li no: ‘Nws yuav tsis nkag mus rau hauv lub nroog no lossis tua ib hnee rau hauv li. Cov tubrog uas muaj daim hlau thaiv cev yuav tsis tuaj ze lub nroog no, thiab yuav tsis khawb av txhub puagncig kom nce tau rau hauv lub nroog. 34Nws yuav taug txojkev uas nws tuaj rov mus tsev, nws yuav tsis tau los rau hauv lub nroog no. Kuv yog tus TSWV uas hais li ntawd. 35Kuv yuav tivthaiv thiab tsomkwm lub nroog no, kom Kuv thiaj tau ntsejmuag thiab kom muaj rawsli tej lus uas Kuv tau cogtseg rau Kuv tus tubtxib Daviv lawm.’ ”

36Tus TSWV ib tug timtswv los tua cov tubrog Axilias hauv lawv lub yeej tuag 185,000 leeg. Thaum kajntug lawv cov tubrog tuag pawglug cia xwb! 37Ces Xenakhelis uas yog tus huabtais kav lub tebchaws Axilias thiajli thim nws cov tubrog rov mus rau pem lub nroog Nineves lawm. 38Muaj ib hnub, thaum nws tabtom pehawm nws tus mlom Nilaus hauv lub tsev teev mlom, ces nws ob tug tub, uas yog Anramelej thiab Salexaws txawm muab ntaj tua nws tuag, thiab nkawd khiav mus rau tebchaws Alalaj lawm. Nws tus tub uas hu ua Exahadoos thiaj sawv los ua huabtais hloov nws chaw.

Currently Selected:

Yaxayas 37: MWW2022

Highlight

Copy