Yaxayas 34
34
Vajtswv Yuav Rautxim Rau Nws Cov Yeebncuab
1Txhua haivneeg, ciali txav los kom ze! Sibsau los nyob uake thiab tig pobntseg mloog. Tagnrho lub ntiajteb thiab txhua tus uas nyob rau hauv ciali los ntawm no thiab tig pobntseg mloog. 2Tus TSWV chim heev rau txhua haivneeg thiab rau lawv txhua tus tubrog. Nws thiaj rautxim hnyav rau lawv thiab muab lawv cob rau luag coj mus tua povtseg. 3Tsis muaj neeg muab lawv faus, tiamsis yuav tso lawv tswlwj ntxiag cia; thiab saum tej roob yuav liabploog vim ntshav xwb. 4Lub hnub, lub hli, thiab tej hnubqub yuav ploj mus. Lub ntuj yuav ploj mus ib yam li thooj ntawv uas muab dov, thiab tej hnubqub yuav poob ib yam li tej nplooj uas poob ntawm tsob txivhmab lossis tsob txiv ncuavpias los. #Math 24:29; Malak 13:25; Lukas 21:26; Tshwm 6:13-14
5Thaum tus TSWV rab ntaj haus tej saum nruabntug tsau lawm, rab ntaj ntawd yuav nqis los tawmtsam cov Edoos, uas yog cov Nws tub teemtxim tuag rau lawm. #Yaxaya 63:1-6; Yelemi 49:7-22; Exek 25:12-14; 35:1-15; Amaus 1:11-12; Aunpa 11-14; Mlakis 1:2-5 6Nws rab ntaj yuav lo lawv tej ntshav thiab tej roj, zoo li tej roj thiab tej ntshav yaj ntshav tshis uas muab ua khoom fij. Tus TSWV yuav muab tej khoom fij no coj mus fij rau hauv lub nroog Npauxelas; Nws yuav ua kom zaum no yog ib zaug uas neeg tuag coob heev nyob rau hauv tebchaws Edoos. 7Tej txiv nyuj qus yuav nrog lawv ntog, thiab tej ntsuag nyuj los ntog nrog cov txiv nyuj uas cajdab ntug ntoob. Lawv lub tebchaws yuav cam ntshav liabploog thiab lawv tej av muaj roj meem mias. 8No yog lub sijhawm uas tus TSWV yuav cawm lub nroog Xi-oos thiab ua pauj rau lub nroog tej yeebncuab.
9Tej dej hauv tebchaws Edoos yuav hloov ua kua rojhmab nplaum heev, thiab av yuav hloov ua leejfaj. Tagnrho lub tebchaws yuav kubhnyiab ib yam li rojhmab. 10Yuav kub tashnub tashmo thiab tej pa yuav ncho tas mus li. Lub tebchaws yuav nyob qhuav nquas cia ib tiam dhau ib tiam, thiab yuav tsis muaj leejtwg taug kev hla lub tebchaws ntawd li lawm. #Tshwm 14:11; 19:3 11Plas thiab uab-lag yuav los ua zes nyob hauv lub tebchaws ntawd. Tus TSWV yuav rov muab lub tebchaws ntawd tso nyob qhuav nquas zoo yam li thaum tsis tau tsim nws. 12Yuav tsis muaj vajntxwv kav lub tebchaws ntawd lawm, thiab lawv tej thawjcoj los yuav ploj mus tag.#34:12: Nqe 12 no hauv phau lus Henplais mas pib ntawm ib lolus uas paub tsis meej tias lub ntsiab yog txhais licas tiag. 13Hmab pos thiab ntoo pos yuav tuaj laum nkaus hauv tej loog thiab thoobplaws tej ntsaloog, hma thiab plas yuav los nyob hauv tej nroog ntawd. 14Tsiaj qus yuav nyooj zomzaws nyob rau qhov ntawd, thiab tej dab yuav sibhu ib tug dhau ib tug. Tus dab hmontuj#34:14: dab hmontuj: Neeg ntseeg tias yog ib tug dab pojniam, thiab nws nyob hauv tej tiaj suabpuam. yuav los nrhiav chaw so qhov ntawd. 15Plas yuav los ua zes, ntes qe, puas qe, thiab tu lawv tej menyuam. Dav lwjhau, ib tug dhau ib tug, yuav sibsau los nyob rau qhov ntawd.
16Tshawb hauv tus TSWV thooj ntawv thiab muab nyeem seb hais licas. Tej tsiaj ntawd tsis muaj ib tug ploj li, thiab tsis muaj ib tug uas yuav tsis muaj nkawm li. Vim tus TSWV tau xaaj kom muaj li ntawd, thiab Nws tus Ntsujplig yuav coj lawv los uake. 17Tus TSWV yog tus yuav muab lub tebchaws faib rau lawv kom nyias muaj nyias tug. Lawv yuav nyob hauv lub tebchaws ntawd ib tiam dhau ib tiam, thiab yuav yog lawv tug mus ibtxhis.
Currently Selected:
Yaxayas 34: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
