Yaxayas 33
33
Thov Vajtswv Pab
1Peb cov yeebncuab yuav raug kev puastsuaj lau! Txawm yog tsis muaj leejtwg mus nyiag lawv tug thiab ntxeevsiab rau lawv los lawv tau mus nyiag luag tug thiab ntxeevsiab rau luag. Tiamsis lawv txoj kev mus ua tubsab thiab ntxeevsiab rau lwmtus ntawd yuav xaus. Thaum kawg lawv yuav yog cov uas raug luag tuaj nyiag thiab raug luag ntxeevsiab rau.
2Tus TSWV, thov Koj tabncuab peb. Peb ciasiab ntsoov rau Koj xwb. Thov tsomkwm peb ib hnub dhau ib hnub thiab cawm peb thaum peb raug kev ntxhovsiab. 3Thaum Koj sawv thiab cov yeebncuab hnov Koj lub suab nroo ntws, ces lawv ciali khiav ri sua lawm. 4Lawv tej khoom yuav raug luag huab thiab raug sau mus huvsi yam li tej kooj ya los noj qoobloo.
5Tus TSWV yog tus zoo kawg nkaus! Nws kav txhua tsavyam. Nws yuav ua rau lub nroog Yeluxalees muaj txoj kev ncajncees thiab kev coj ncaj 6thiab ua rau haivneeg nyob ruaj-khov. Nws yuav tsomkwm Nws haivneeg txhua lub sijhawm thiab pub lawv muaj tswvyim thiab kev txawjntse. Qhov uas lawv hwm tus TSWV yog kev vammeej thiab kev npluanuj rau lawv.
7Cov neeg siab tawv tabtom tsa suab hu thov kev pab. Cov xeebcom uas nrhiav kev sib haumxeeb, lawv quaj tusiab kawg li. 8Tej niamkev loj nphobxuav cia, tsis muaj leejtwg tau luag taug. Lawv rhuav tej lus cogtseg, thiab tsis ua rawsli tej lus uas tau hais tabmeeg tej timkhawv. Lawv ib leeg yuav tsis hwm ib leeg li lawm. 9Lub tebchaws quajntsuag thiab nyob qhuav nquas cia; tej ntoo pem Roob Lenpanoos ntsws thiab qhuav tag. Lub Hav Saloos uas zoo qoobloo ua suabpuam tag. Tej ntoo hauv tebchaws Npasas thiab saum Roob Khamees zeeg nplooj tag huv tibsi lawm.
Tus TSWV Ceebtoom Rau Nws Cov Yeebncuab
10Tus TSWV hais rau txhua haivneeg tias, “Nimno Kuv yuav sawv ua haujlwm, yuav nyob rau lub chaw siab, thiab yuav qhia tias Kuv muaj hwjchim npaum licas. 11Nej txoj kev npajsiab ces zoo li tej npluag nplej, tej uas nej ua ces zoo li tej quavnyab; nej cov pa yog cov hluavtaws uas yuav muab nej hlawv. 12Nej yuav zoo yam li tej pos uas raug muab txiav thiab pov rau hauv cub hluavtaws hlawv ua tshauv tas. 13Kom txhua tus uas nyob deb thiab nyob ze hnov tej uas Kuv tau ua tas los no, thiab paub txog Kuv lub hwjchim!”
14Cov neeg txhaum hauv Xi-oos ntshai tsheehnyo. Lawv hais tias, “Vajtswv txoj kev txiavtxim zoo li cubtawg uas kub mus ibtxhis. Peb puas yuav tiv dhau lub cubtawg ntawd?” 15Nej yeej yuav tiv dhau yog tias nej haislus tseeb thiab ua ncajncees. Nej tsis txhob siv nej lub hwjchim mus dag-ntxias cov pluag thiab tsis txhob yuav tej nyiaj uas luag nqa tuaj xiab nej. Tsis txhob koom nrog cov neeg tuav tswvyim tua neeg lossis ua lwmyam kev phem. 16Nej thiaj yuav tau zoo nyob kajsiab lug; nej yuav tau nyob ruaj-khov npaum nkaus li nyob hauv lub chaw fajxwm. Nej yuav tau mov noj thiab tau dej haus.
Lub Neej Kajsiab Yav Tomntej
17Nej yuav pom ib tug vajntxwv uas muaj hwjchim ci ntsa-iab kav lub tebchaws uas loj thiab dav heev. 18Nej txoj kev ntshai txog lwm haivneeg cov sau se thiab cov neeg soj tebchaws yav tas los ntawd yuav tsis muaj lawm. 19Nej yuav tsis pom lwm haivneeg uas haislus khavtheeb thiab hais tej lus txawv uas nej tsis paub ntxiv li lawm.
20Ciali tsa qhovmuag saib lub nroog Xi-oos, uas yog qhov chaw peb ua koobtsheej. Ciali tsa qhovmuag saib lub nroog Yeluxalees! Nws yog ib qhov chaw uas sawvdaws yuav nyob kajsiab lug! Nws yuav zoo li lub tsevntaub uas yeej tsis tau muaj leejtwg muab tshem li, tej tswg los tsis rho thiab tej hlua khi los yeej tsis tau tu li. 21Tus TSWV yuav ua rau peb pom Nws tus tshwjchim ci ntsa-iab. Peb yuav nyob raws tej ntug dej loj thiab dej me, cov yeebncuab yuav tsis tsav nkoj mus-los hauv tej dej ntawd.#33:21: Nqe 21no paub tsis meej tias lolus Henplais yog txhais licas tiag. 22Vim tus TSWV yog tus txiavtxim, Nws yog tus kav peb, thiab Nws yog peb tus vajntxwv; nws yuav cawm kom peb dim. 23Nej cov hlua twb xoob tag, thiaj khi tus ncej tsis ruaj, thiab daim ntaub thiaj tsis nthuav. Peb yuav txeeb tau yeebncuab tej khoom ntau heev coj los sibfaib; txawm yog tej neeg savceg los puavleej tau huv tibsi. 24Cov neeg uas nyob hauv peb lub tebchaws yuav tsis muaj leejtwg nroo hais tias, “Kuv muaj mob” rauqhov tus TSWV yuav zam lawv lub txim huv tibsi mus.
Currently Selected:
Yaxayas 33: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
