Yaxayas 32
32
Tus Vajntxwv Uas Ncajncees
1Saib maj, yuav muaj ib tug vajntxwv kav ncajncees, thiab nws cov nomtswv los yuav tswjhwm nrog txoj kev ncajncees. 2Lawv txhua tus yuav zoo li lub tsev uas thaiv cua thiab lub chaw nkaum cuadaj cuadub. Lawv yuav zoo li tej dej uas ntws hauv tiaj suabpuam, thiab zoo li lub tsua loj heev uas ntxoov lub tiaj mojsab qhua.
3Thaum ntawd cov neeg uas qhovmuag pomkev yuav tsis qimuag lawm, thiab cov uas pobntseg hnov lus yuav ua tibzoo mloog. 4Cov neeg uas ua tsis tau lub siabntev yuav muaj kev totaub, thiab cov neeg uas nplaig txhav yuav hais tau lus meej. 5Yuav tsis muaj leejtwg hu tus neeg ruam ua neeg tsimtxiaj, thiab hwm tus neeg uas muaj lub siab limhiam. 6Tus neeg ruam yeej hais tej lus ruam thiab nws lub siab yeej ntaus tswvyim ua tej yam phem xwb. Tej nws ua thiab tej nws hais puavleej yog ua saib tsis taus tus TSWV. Nws tsis pub mov rau cov neeg tshaib plab noj thiab tsis pub dej rau cov neeg nqhis dej haus. 7Tus neeg limhiam yeej muaj lub siabphem thiab yeej ua tej yam phem xwb; nws nrhiav kev ua kom cov neeg pluag puastsuaj, txawm yog cov pluag tej lus thov raug cai los xij. 8Tiamsis tus neeg txaus hwm yeej ua qhov ncaj thiab ua qhov yog xwb.
Txiavtxim Thiab Txhimkho
9Nej cov pojniam uas ua neej nyob qhuas ntxhias, tsis txob tsis txhawj dabtsi, nej ciali mloog tej lus uas kuv hais. 10Nimno nej noj nyob tsaunpo, tiamsis lwm xyoo txog lub caij no nej yuav txomnyem, vim yuav tsis muaj txivhmab rau nej de lawm. 11Cov pojniam uas ua neej nyob qhuas ntxhias, tsis txob tsis txhawj dabtsi; tiamsis nimno nej ciali ntshai ua ibce tsheehnyo! Ciali hle nej tej tsoostsho uas zoo-zoo thiab muab ntaub tsaj los npua. 12Ciali ntaus nej hauvsiab ntawm txoj kev tusiab, vim nej tej teb uas zoo qoobloo thiab tej vaj txivhmab uas txitxiv ncw tau puastsuaj tag, 13nrojtsuag thiab hmab pos twb tuaj laum kuv haivneeg tej av lawm. Ciali quaj rau txhua lub tsev uas yav tas los sawvdaws nyob kajsiab lug, thiab rau tej nroog uas yav tas los sawvdaws nyob lomzem xauvnpo. 14Txawm yog tus vajntxwv lub loog los yuav muab tso povtseg thiab lub tuamceeb nroog los yuav ua suabpuam tas. Tej tsev thiab tej chaw fajxwm uas zov lub loog los yuav puastsuaj mus ibtxhis. Qhov ntawd yuav ua chaw zoosiab rau tej neesluav qus thiab ua tshav zaub rau yaj tau noj.
15Tiamsis tus TSWV yuav txib Nws tus Ntsujplig los rau peb dua ib zaug ntxiv. Lub tebchaws uas ua quavpoj yuav rov ua lub tebchaws uas av zoo, thiab tej teb yuav zoo qoob heev. 16Yuav muaj kev ncajncees nyob hauv tiaj suabpuam, thiab kev ua zoo nyob hauv tej teb uas ntsu qoob. 17Vim txhua tus yuav ua ncaj ua ncees, mas yuav muaj kev thajyeeb nyabxeeb mus ibtxhis. 18Kuv haivneeg yuav nyob tsosiab lug, lawv tej vajtse los yuav nyob kajsiab lug thiab tsis muaj kev ntxhovsiab dabtsi. 19Txawm yog lawg yuav los ntaus tej havzoov, thiab lub nroog yuav raug muab tsoo kom puastsuaj tag, 20los nej txhua tus ciali zoosiab, vim muaj dej txaus los ywg tej noobqoob uas nej tseb, thiab muaj tshav zaub nyob txhua qhov rau tej neesluav thiab tej nyuj noj.
Currently Selected:
Yaxayas 32: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
