Yaxayas 31
31
Vajtswv Yuav Tsomkwm Lub Nroog Yeluxalees
1Cov neeg uas mus thov kom cov Iziv pab, yuav raug puastsuaj lau! Lawv ciasiab rau cov Iziv lub zog—tej nees, tej tsheb nees ntaus rog, thiab cov tubrog. Tiamsis lawv tsis ciasiab rau tus TSWV, uas yog cov Yixalayees tus Vajtswv Dawbhuv, thiab thov Nws pab lawv. 2Tus TSWV ntse heev, Nws muaj peevxwm tso tau kev puastsuaj los! Nws tsis thim Nws tej lus rovqab. Nws yuav tawmtsam cov neeg phem thiab cov uas pab cov neeg phem ntawd. 3Cov Iziv yog neeg xwb, tsis yog Vajtswv. Lawv tej nees yog tsiaj xwb, tsis yog ntsujplig. Thaum tus TSWV xyab tes tuaj, cov neeg uas tuaj pab yuav dawm, thiab cov uas tau txais kev pab yuav ntog; lawv sawvdaws yuav raug puastsuaj uake.
4Tus TSWV hais rau kuv tias, “Txawm yog cov tswv yug yaj qw thiab nthe npaumtwg los tus tsov ntxhuav uas tom tau tus yaj lawm yeej tsis ntshai thiab tsis khiav li; ib yam nkaus li ntawd ntag, yeej tsis muaj ib yam dabtsi txwv tau Kuv, uas yog tus TSWV, tus muaj Hwjchim Loj Kawg Nkaus, kom khiav tsis txhob tsomkwm lub Roob Xi-oos. 5Tus noog ya saum nws lub zes tsomkwm nws cov menyuam licas, ces Kuv, uas yog tus TSWV, tus muaj Hwjchim Loj Kawg Nkaus, yuav tsomkwm thiab tivthaiv Yeluxalees li ntawd ntag.”
6Vajtswv hais tias, “Haivneeg Yixalayees, nej tau ua txhaum rau Kuv thiab tawmtsam Kuv, tiamsis nej ciali rov los cuag Kuv! 7Hnub ntawd nej txhua tus yuav muab tej mlom nyiaj mlom kub uas nej txhais tes muaj txim tau nchuav ntawd, sau huv tibsi coj mus povtseg. 8Cov Axilias yuav raug puastsuaj, tiamsis tsis yog los ntawm neeg li hniav ntaj hniav riam. Vajtswv rab ntaj yuav tua lawv, lawv ntshai lawv thiaj khiav tawm, tiamsis lawv cov tub hluas yuav raug ntes mus ua luag qhev. 9Lawv tus huabtais ntshai heev thiab khiav tsheehnyo lawm; cov nomtswv los ntshai kawg nkaus li, lawv yuav ciali muab lawv tej chij uarog tso povtseg huv tibsi.” Tus TSWV uas Nws lub cubtawg nyob hauv Xi-oos, thiab Nws cov nplaimtaws cig lamlug hauv Yeluxalees, yog tus hais li ntawd.
Currently Selected:
Yaxayas 31: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
