Yaxayas 30
30
Tsis Txhob Ciasiab Rau Cov Neeg Iziv
1Tus TSWV hais tias, “Cov neeg Yudas yuav raug puastsuaj vim lawv ntxeevsiab rau Kuv. Lawv ua rawsli tej tswvyim uas tsis yog Kuv li, lawv mus nrog luag sib coglus tawmtsam Kuv tus dejsiab, lawv ua kev txhaum tsub kev txhaum ntxiv zujzus. 2Lawv mus cuag cov Iziv kom pab lawv, tiamsis lawv tsis sablaj rau Kuv li. Lawv xav kom cov Iziv tivthaiv lawv, yogli ntawd lawv thiaj tsosiab rau Falaus, uas yog cov Iziv tus vajntxwv. 3Tiamsis Falaus txoj kev tivthaiv ntawd yuav ua rau lawv raug kev txajmuag, thiab cov Iziv txoj kev tivthaiv yuav ua rau lawv puastsuaj. 4Txawm yog lawv twb muaj cov xeebcom nyob rau hauv cov Iziv lub nroog Xau-as thiab lub nroog Hanes lawm los 5cov Yudais yuav raug kev txajmuag, rauqhov haivneeg ntawd yeej ibtxwm pab tsis tau lawv lossis tsis muajnqis rau lawv, tsuas yog coj kev txajmuag thiab kev poob ntsejmuag los rau lawv xwb.”
6Ntawm no yog cov lus uas Vajtswv hais txog cov tsiaj uas nyob nram yav qabteb tej tiaj suabpuam: “Cov xeebcom taug kev mus hla hauv lub tebchaws uas muaj kev txhawj-ntshai, muaj tsov ntxhuav, muaj nab thiab muaj tej zaj uas txawj ya nyob. Lawv muab lawv tej khoom muajnqis rau lawv tej neesluav thiab ntxhuav thauj mus pub haivneeg uas pab tsis tau lawv. 7Cov Iziv txoj kev pab tsis muaj qabhau dabtsi li. Yogli ntawd, Kuv thiaj tis ib lub npe tshiab rau cov Iziv hu ua, ‘Tus zaj uas ua tsis tau dabtsi.’ ”
Cov Neeg Uas Tsis Mloog Vajtswv Lus
8Vajtswv hais rau kuv kom ciali muab lawv sau rau hauv ib phau ntawv khaws tseg tias lawv yog neeg zoo licas, kom yav tomntej thiajli muaj ntawv ua povthawj qhia txog lawv mus ibtxhis li. 9Vim lawv yog cov neeg uas ibtxwm ntxeevsiab rau Vajtswv, ibtxwm dag, thiab ibtxwm tsis mloog tus TSWV tej lus qhia. 10Lawv hais kom cov xibhwb cev Vajtswv lus nyob twjywm. Lawv hais tias, “Tsis txhob qhia qhov tseeb rau peb paub. Qhia tej uas peb xav hnov rau peb. Cia peb ua rawsli peb lub siab nyiam xwb. 11Ciali khiav mus thiab tsis txhob thaiv peb kev. Peb tsis xav hnov txog nej cov Yixalayees tus Vajtswv uas dawbhuv.”
12Tiamsis cov Yixalayees tus Vajtswv uas dawbhuv hais tias: “Vim nej saib tsis taus Kuv tej lus qhia, nej tsuas nyiam ua limhiam thiab dag-ntxias xwb. 13Nej yog neeg txhaum plaub. Nej zoo li ib lub phabntsa siab-siab uas tawgpleb thoobplaws lawm; tibpliag ntshis xwb nej yuav vau tawg tas. 14Nej yuav tawg ntsoog ntxaws ib yam li tej laujkaub av. Tej txhais uas tawg ntawd me heev, tsis muaj ib daig uas yuav zoo khaws los yawm ncaigtaws lossis twb hais tsis tau dej hauv lub qhovdej los li.”
15Cov Yixalayees tus TSWV dawbhuv, tus kav ibpuas tsavyam, hais rau sawvdaws tias, “Ciali tig rov los thiab so hauv Kuv, nej thiaj yuav dim. Nyob twjywm thiab tsosiab rau Kuv, nej thiaj yuav muajzog.” Tiamsis nej tsis kam ua li ntawd. 16Nej hais tias nej yuav caij nees khiav kom dim nej cov yeebncuab. Nej hais li ntawd los kuj yog lawm—nej ces kawg khiav lawm xwb! Nej xav tias nej cov nees khiav ceev heev, tiamsis cov uas raws nej qab tseem ceev tshaj nej lawm thiab! 17Thaum yeebncuab ib tug tubrog tuaj hem nej, txawm nej muaj 1,000 leej los nej yuav ciali khiav; thaum muaj tsib tug tubrog tuaj hem nej, nej yuav khiav tagnrho. Nej cov tubrog yuav khiav tag tsis tshuav ib tug li, tsuas tshuav tus ncej chij uas txhos rau saum ncov roob xwb. 18Txawm li ntawd los tus TSWV tseem ua siabntev tos yuav tabncuab nej. Nws yuav qhia Nws txoj kev hlub rau nej, rauqhov tus TSWV yog Vajtswv tus uas muaj kev ncajncees. Cov uas muaj kev kajsiab yog cov tsosiab rau tus TSWV.
Vajtswv Yuav Foom Koobhmoov Rau Nws Haivneeg
19Nej cov uas nyob hauv lub nroog Yeluxalees yuav tsis quaj ib zaug ntxiv li lawm. Tus TSWV yog tus uas muaj kev hlub, thaum nej quaj thov Nws pab, Nws yuav teb nej tej lus thov. 20Tus TSWV yuav muab lub ncuav uas yog kev txomnyem los rau nej noj thiab muab cov dej uas yog kev nyuajsiab los rau nej haus, tiamsis Nws yuav nyob qhov ntawd qhia nej, mas nej lub qhovmuag yuav pom Nws. 21Thaum nej taug kev mus sab xis lossis sab laug, nej yuav hnov Nws lub suab hais tom nej qab tuaj tias, “Txoj no thiajli yog txoj yog. Ciali taug txoj no.” 22Ces nej yuav muab nej tej mlom uas muab nyiaj nchuav thiab tej mlom uas muab kub vuam, coj mus povtseg yam li tej khoom phem qias, thiab qw hais tias, “Ciali tawm ntawm kuv mus!”
23Thaum twg uas nej cog qoobloo, tus TSWV yuav tso nag los ywg thiab ua kom tej qoobloo hlob mosnyoos, ua rau nej sau tau qoobloo ntau, thiab nej tej tsiajtxhu yuav tau lub tshav zaub uas dav heev los noj. 24Nej tej nyuj thiab tej neesluav uas laij nej tej teb, yuav tau noj tej zaub zoo heev. 25Hnub uas nej txeeb tau nej cov yeebncuab tej chaw fajxwm thiab tua lawv cov neeg tuag tag lawm, thaum ntawd tej kwjdeg saum tej hauv roob thiab tej povroob siab yuav muaj dej txhawv ntws ntshiabsi los. 26Lub hli yuav ci npaum nkaus li lub hnub, thiab lub hnub yuav ci tshaj li ibtxwm ci los lawm xya npaug ntxiv, ci npaum li muab xya hnub los ua ib zaug ci. Thaum ntawd tus TSWV yuav qhwv thiab kho Nws haivneeg tej qhovtxhab uas Nws tau tso los raug lawv.
Vajtswv Yuav Rautxim Rau Cov Axilias
27Saib maj, tus TSWV tuaj deb-deb tuaj. Nplaimtaws thiab pataws yog qhia txog Nws txoj kev chim. Tej lus uas Nws hais kub ib yam li nplaimtaws. 28Nws tus pa zoo li tus dej uas nphau nphwv los nyab txij nkaus cajdab. Nws muab ntau haivneeg los tshau thiab ua kom lawv raug kev puastsuaj; Nws muab khawb los sam xauv rau cov neeg ntawd lub pobtsaig thiab coj lawv mus lawm. 29Tiamsis nej cov uas yog Vajtswv haivneeg, nej yuav zoosiab thiab hunkauj li hmo uas nej ua kevcai noj rooj mov dawbhuv. Nej yuav zoosiab ib yam li cov neeg uas tshuab raj tshuab xyu mus rau saum tus TSWV lub Roob uas yog cov Yixalayees lub Pobzeb.
30Tus TSWV yuav ua rau sawvdaws hnov Nws lub suab uas muaj hwjchim thiab pom Nws txoj kev chim uas loj kawg nkaus. Yuav muaj nplaimtaws, huab dub, lawg pobzeb, thiab nagxob nagcua tsaus nti nrov ntxhe ntws los. 31Thaum cov Axilias hnov tus TSWV lub suab thiab raug Nws muab Nws rab qws ntaus lawv, lawv yuav ntshai heev. 32Txhua nplawm uas tus TSWV muab rab nplawm ntawm txoj kev rautxim los nplawm lawv, Nws cov neeg yuav rausiab ntso tshuab raj tshuab xyu nrog rau suab nkauj nogncas nrov ntsoogqees; Vajtswv yuav tua cov Axilias kom lawv puastsuaj tag. 33Yav tas los, muaj ib lub chaw uas twb npaj tseg yuav hlawv cov Axilias tus vajntxwv. Lub chaw ntawd tob thiab dav heev, thiab muab taws los teeb siab kawg li rau. Tus TSWV yuav tshuab nplaimtaws leejfaj mus kub cov taws kom cig.
Currently Selected:
Yaxayas 30: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
