Yaxayas 29
29
Yam Uas Lub Nroog Yeluxalees Ntsib
1Yeluxalees uas yog Vajtswv lub thaj, thiab lub nroog uas Daviv tsuam yeej yuav raug puastsuaj lau! Nej ua kevcai ua rooj noj rooj haus ib xyoos dhau ib xyoos, 2tiamsis Vajtswv yuav tso kev puastsuaj los raug lub nroog uas hu ua, “Vajtswv lub thaj.” Thaum ntawd yuav muaj kev quajntsuag, thiab tagnrho lub nroog yuav zoo li lub thaj uas muaj ntshav plooj nkaus saum. 3Vajtswv yuav tawmtsam lub nroog, ua chaw tsomfaj puagncig lub nroog, thiab tsoo lub nroog kom puastsuaj mus. 4Yeluxalees yuav zoo li ib tug dab uas haislus hauv lub qhov tob-tob tuaj; lub suab yuav hais yau-yau hauv av tuaj.
5Yeluxalees, koj cov yeebncuab uas coob ua npoj ntws tuaj tua koj yuav raug ntsawj ya ib yam li hmoov av, thiab lawv cov tubrog uas nrujtsiv yuav raug ntsawj ya ib yam li tej npluag nplej. Tibpliag ntshis xwb 6tus TSWV uas muaj Hwjchim Loj Kawg Nkaus yuav ua xob nroo, ua av qeeg, ua cuadaj cuadub, thiab ua tej nplaimtaws uas hlawv kom kub du lug, los cawm nej. 7Ces txhua haivneeg cov tubrog uas tuaj tua lub nroog, uas yog Vajtswv lub thaj, nrog rau lawv tej cuabyeej uarog txhua yam puavleej yuav ploj mus yam nkaus li npausuav thiab ua yogtoog thaum hmontuj. 8Txhua haivneeg uas tuaj tua lub nroog Yeluxalees yuav zoo yam li tus neeg tshaib plab uas ua npausuav noj mov, tiamsis thaum tsim los tseem tshaib plab li qub, lossis zoo li tus neeg nqhis dej uas nws ua npausuav haus dej, tiamsis thaum tsim los tseem nqhis dej thiab qa qhuav qhawv.
Tej Lus Ceebtoom Uas Tsis Xav Txog
9Ciali ua neeg feeb tsis meej thiab ua neeg ruam! Ciali ua neeg digmuag! Ciali vwm loj vwm leg, tiamsis tsis yog vwm cawv! Ciali ntog pujpoog, tiamsis tsis yog qaug kua txivhmab! 10Tus TSWV ua kom nej vwm dabntub thiab tsaugzog loojhlias. Twb tsimnyog cov xibhwb cev Vajtswv lus ua sawvdaws lub qhovmuag, tiamsis Vajtswv muab lawv tej qhovmuag npog lawm. #Loos 11:8 11Lub ntsiablus ntawm qhov ua yogtoog no yuav muab zais tsis pub nej paub, zoo yam li thooj ntawv uas muab kauv thiab nias homthawj rau lawm. Yog nej coj mus rau ib tug uas paub nyeem thiab thov kom nws nyeem rau nej mloog, los nws yuav teb tias nws nyeem tsis tau vim muaj homthawj nias rau lawm. 12Yog nej muab thooj ntawv ntawd rau tus uas tsis paub nyeem thiab thov nws nyeem rau nej mloog, nws yuav teb tias nws tsis paub nyeem.
13Tus TSWV hais tias, “Cov neeg no lub ncauj qhuas Kuv, tiamsis lawv tej lus qhuas ntawd tsis muaj qabhau li, thiab lawv lub siab nyob deb Kuv heev. Qhov uas lawv pehawm Kuv tsuas yog ua rawsli neeg tej kevcai uas lawv tau kawm los xwb. #Math 15:8-9; Malak 7:6-7 14Vimli ntawd, Kuv yuav rov ua ib yam txujci tas ib yam txujci tuaj kom lawv xav tsis thoob li. Cov neeg ntse lub tswvyim yuav ruam tas, thiab kev txawjntse ntawm cov neeg ntse yuav ploj tas.” #1Klt 1:19
Ciasiab Rau Yav Tomntej
15Lawv cov uas muab lawv tej homphiaj zais tsis pub tus TSWV paub yuav raug puastsuaj lau! Lawv ua tej yam nraim nkoos hauv qhov tsausntuj nti, thiab xav tias tsis muaj leejtwg pom lossis paub tias lawv ua dabtsi. 16Lawv muab txhua yam ntxeev tas! Yam twg tseemceeb dua, tus puab lub laujkaub av lossis cov av? Yam uas nej twb muab puab tau lawm, puas muaj cuabkav hais tau tias, “Koj twb tsis tau puab kuv”? Lossis yam ntawd puas hais tau tias, “Koj twb tsis paub dabtsi li”? #Yaxaya 45:9; Loos 9:20
17Tshuav tsis ntev lawm lau, lub havzoov Lenpanoos yuav dhau mus ua ib daig teb, thiab daig teb ntawd tej qoobloo yuav ncw npaum nkaus li ib lub havzoov?
18Thaum uas hnub ntawd los txog, cov neeg lagntseg yuav hnov tej lus uas luag nyeem hauv phau ntawv, thiab cov neeg digmuag uas ua neej tsausntuj nti lub qhovmuag yuav pomkev. 19Cov neeg pluag thiab cov neeg txo hwjchim yuav tau txais txoj kev kajsiab los ntawm tus TSWV uas yog cov Yixalayees tus Vajtswv uas dawbhuv. 20Cov uas tsimtxom luag lwmtus, thiab pheej thuam Vajtswv yuav ploj mus. Txhua tus neeg uas pheej nyiam ua txhaum yuav raug kev puastsuaj. 21Cov neeg uas haislus saib tsis taus lwmtus, cov uas txheem tsis pub rautxim rau tej neeg muaj txim, thiab cov neeg uas ua timkhawv cuav ntxo cov neeg ncajncees kom raug txiavtxim, Vajtswv yuav muab ua kom puastsuaj tag.
22Vimli ntawd tus TSWV, uas yog cov Yixalayees tus Vajtswv, uas cawm Anplahas dim tej kev ntxhovsiab, thiaj hais tias, “Kuv haivneeg, nej yuav tsis raug txajmuag thiab nej lub ntsejmuag yuav tsis ntshaus ntxiv lawm. 23Thaum nej pom tej tubki uas Kuv yuav pub rau nej, nej yuav lees paub tias Kuv yog cov Yixalayees tus Vajtswv uas dawbhuv. Nej yuavtsum hwm Kuv thiab paub ntshai Kuv. 24Cov neeg ruam yuav totaub, thiab cov uas yws tujtaws yuav txaussiab txais yuav txoj kev kawm.”
Currently Selected:
Yaxayas 29: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
