Yaxayas 3
3
Teebmeem Hauv Lub Nroog Yeluxalees
1Zaumno tus TSWV uas yog Vajtswv tus muaj Hwjchim Loj Kawg Nkaus, yuav muab txhua yam thiab txhua tus neeg uas nyob hauv Yeluxalees thiab hauv Yudas uas tej neeg sawvdaws ciasiab ntsoov rau, tshem huv tibsi mus. Nws yuav muab lawv tej zaub-mov thiab lawv tej dej tshem mus, 2muab lawv cov neeg muaj peevxwm thiab cov tubrog, cov txiavtxim thiab cov povthawj hlob, cov neeg ua khawvkoob thiab cov thawjcoj, 3lawv tus thawj uas saib tsibcaug tus tubrog thiab cov thawjcoj uas muaj meejmom, cov tuavxam, thiab txhua tus neeg uas txawj khawvkoob, tshem huv tibsi mus. 4Tus TSWV yuav cia cov tub hluas uas tsis tau paubtab los ua nom ua tswv kav cov pejxeem. 5Cov pejxeem ib leeg yuav tsimtxom ib leeg. Cov hluas yuav thuam cov laus, thiab cov neeg tsis tsimtxiaj yuav thuam cov muaj koobmeej.
6Thaum ntawd ib tug txivneej yuav hais rau nws ib tug kwvtij tias, “Koj tseem tshuav lub tsho ntev hnav, yogli ntawd koj ciali los ua tus coj peb rau lub sijhawm uas kubntxhov no.”
7Tiamsis nws yuav teb tias, “Kuv tsis ua! Kuv pab tsis tau nej. Kuv los tsis muaj tsoostsho hnav thiab tsis muaj mov noj ib yam nkaus. Tsis txhob tsa kuv ua nej tus thawjcoj!”
8Yog lau, Yeluxalees tabtom dawm, thiab Yudas tabtom ntog! Txhua yam uas lawv hais thiab lawv ua puavleej yog tawmtsam Vajtswv; lawv tabmeeg tuammom Vajtswv li ntag. 9Lawv tej kev ua tsis ncaj yuav rov ua povthawj tawmtsam lawv. Lawv tabmeeg ua kev txhaum ib yam li cov neeg Xaudoos ua. Kev puastsuaj los raug lawv, vim lawv lob tej ntawd los rau lawv tuskheej.
10Cov neeg ncajncees yuav muaj kev zoosiab,#3:10: Nqe no sau hais tias Cov neeg ncajncees yuav muaj kev zoosiab; phau lus Henplais hais tias Hais rau cov neeg ncajncees. lawv yuav tau txais nqizog rau tej haujlwm uas lawv ua. 11Tiamsis cov neeg phem yuav raug kev puastsuaj; tej uas lawv tau ua rau lwmtus lawm, yuav rov los raug lawv.
12Cov hluas caijtsuj kuv haivneeg, thiab tej pojniam tswjhwm lawv.
Kuv haivneeg 'e, nej cov thawjcoj coj nej yuamkev lawm, thiaj ua rau nej tsis paub yuav mus rau txojkev twg.
Tus TSWV Txiavtxim Rau Nws Haivneeg
13Tus TSWV yeej npaj rawv hais Nws rooj plaub; Nws npaj txhij yuav txiavtxim rau Nws haivneeg.#3:13: Tej cov ntawv qub-qub thaum ub sau hais tias Nws haivneeg; phau lus Henplais hais tias tej neeg sawvdaws. 14Tus TSWV coj cov txwjlaug thiab cov thawjcoj hauv Nws haivneeg los txiavtxim. Nws hais li no: “Nej ua rau Kuv lub vaj txivhmab puastsuaj tag, thiab nej mus txeeb cov neeg pluag tej khoom los cia rau hauv nej tej tsev puvnkaus. 15Nej tsis muaj cai caijtsuj Kuv haivneeg thiab tsimtxom tej neeg pluag. Kuv, uas yog tus kav ibpuas tsavyam, tus TSWV muaj Hwjchim Loj Kawg Nkaus, yog tus hais li ntawd.”
Ceebtoom Rau Cov Pojniam Hauv Yeluxalees
16Tus TSWV hais tias, “Nej saib maj, cov pojniam uas nyob hauv Yeluxalees khavtheeb heev! Lawv mus kev tsa ntswg nuv rau saum ntuj. Lawv ua qhovmuag qabzib rau ub rau no. Lawv rhais ruam mus kev mosnyoos, ua rau tej tswb uas lawv coj ntawm lawv muagtaw nrov zomzaws. 17Tiamsis Kuv yuav rautxim rau lawv—Kuv yuav chais lawv tej plaubhau kom du lug thiab cia lawv nyob taubhau dodus.”
18Hnub ntawd tus TSWV yuav muab txhua yam uas cov pojniam hauv Yeluxalees khavtheeb txog ntawd rho mus—tej saw uas lawv coj ntawm muagtaw, saum taubhau, ntawm cajdab, 19thiab ntawm cajdab tes. Nws yuav muab lawv tej phuam uas pav taubhau, 20tej mom, tej haum tshuaj tswqab uas lawv coj rawv ntawm cajnpab thiab sia ntawm duav; 21tej nplhaib uas lawv coj ntawm ntivtes thiab tej kauj ntswg uas coj ntawm qhovntswg; 22lawv tej tiab ntev uas zoo heev, tej tsho loj, tsho ntev, thiab tej hnab nyiaj; 23lawv tej tsoos uas nyias-nyias, tej phuam ntaub mag, tej phuam pav cajdab, thiab tej phuam ntev uas lawv ntoo saum taubhau, sau huv tibsi mus.
24Twb tsimnyog lawv tswqab, tiamsis lawv tsw ntxhiab; tsimnyog lawv sia tej hlab uas zoo, tiamsis lawv yuav rhais tiab; tsimnyog lawv muaj plaubhau zoonkauj, tiamsis lawv do hau; tsimnyog lawv hnav tej tsoostsho uas zoo, tiamsis lawv hnav khaubhlab; lawv tej kev zoonkauj yuav hloov mus ua kev txajmuag!
25Cov txivneej hauv nroog uas khov heev, yuav tuag rau hniav ntaj hniav riam, lawv yuav tuag tas rau hauv tshavrog. 26Xi-oos tej roojloog yuav quaj qw tusiab heev, thiab lub nroog ntawd yuav zoo yam li tus pojniam uas liabqab nyob hauv av.
Currently Selected:
Yaxayas 3: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
