Yaxayas 2
2
Txojkev Thajyeeb Uas Nyob Mus Ibtxhis
(Mikhas 4:1-3)
1No yog tej lus uas Vajtswv qhia rau Yaxayas, uas yog Amoj tus tub, kom hais rau cov Yudais thiab lub nroog Yeluxalees:
2Muaj ib hnub tomntej no
lub roob uas ua lub Tuamtsev rau saud
yuav yog lub uas siab tshaj txhua lub roob,
nws tshwm siab dua txhua lub povroob huv tibsi.
Ntau haivneeg yuav nchuav nthwv tuaj rau ntawm lub roob ntawd,
3thiab lawv cov neeg yuav hais tias,
“Peb ciali nce mus rau saum tus TSWV lub roob,#2:3: tus TSWV lub roob: Lub Roob Xi-oos, uas yog lub roob nyob hauv Yeluxalees uas lawv tau ua lub Tuamtsev nyob rau saud.
mus rau saum cov Yixalayees tus Vajtswv lub Tuamtsev.
Nws yuav qhia peb txog tej uas Nws xav kom peb ua;
peb yuav taug tej kev uas Nws tau xaiv rau peb lawm.
Rauqhov tus TSWV tej lus qhia yog tawm hauv Yeluxalees tuaj;
Nws tuaj saum Xi-oos hais rau Nws haivneeg.”
4Nws yuav txiavtxim rau txhua haivneeg.
Lawv yuav muab lawv tej ntaj los ntaus ua khais,
thiab muab lawv tej hmuv ntaus ua liag.
Txhua haivneeg yuav tsis uarog ntxiv li lawm,
yuav tsis npaj sibtua ntxiv li lawm. #Yau 3:10; Mikha 4:3
5Yakhauj cajces, peb ciali taug txoj kev kaj uas tus TSWV pub rau peb.
Cov Neeg Khavtheeb Yuav Raug Puastsuaj
6Vajtswv, Koj tau muab Koj haivneeg uas yog Yakhauj cajces tso povtseg lawm, rauqhov lawv lub tebchaws puvnkaus txoj kev ua khawvkoob uas tuaj sab hnubtuaj tuaj thiab tuaj hauv Filixatees tuaj.#2:6: Nqe no sau hais tias tebchaws… Filixatees; paub tsis meej tias lolus Henplais yog txhais licas tiag txog qhov no. Lawv xyaum ua rawsli cov neeg txawv tebchaws ua. 7Lawv lub tebchaws muaj nyiaj muaj kub nplua-mias, thiab lawv tej nyiajtxiag yeej tsis paub tas ib zaug li. Lawv lub tebchaws los muaj nees nyob puvnkaus hauv, thiab lawv ua tsheb nees tsis paub tas li. 8Mlom nyob puvnkaus hauv lawv lub tebchaws, thiab lawv pe tej uas lawv txhais tes puab.
9Yogli ntawd, lawv yuav raug muab txo thiab poob ntsejmuag. Tus TSWV, tsis txhob zamtxim rau lawv!
10Lawv yuav mus nkaum hauv tej qhovtsua saum tej roob tsuas, lossis khawb qhov av nkaum kom dim tus TSWV txoj kev chim, nkaum Nws lub hwjchim thiab Nws tus tshwjchim uas ci ntsa-iab! 11Muaj ib hnub neeg txoj kev tsa hwjchim yuav xaus mus thiab neeg txoj kev khavtheeb yuav raug puastsuaj. Hnub ntawd tus TSWV tibleeg yog tus yuav raug tsa rau lub chaw siab. 12Hnub ntawd tus TSWV uas muaj Hwjchim Loj Kawg Nkaus yuav muab txhua tus uas tsa hwjchim, txhua tus uas khavtheeb thiab xav ua tus loj, txo hwjchim kom tas. #Tshwm 6:15; 2Tim 1:9 13Nws yuav ua kom cov ntoo ciab pem Roob Lenpanoos thiab tagnrho cov ntoo qhib hauv tebchaws Npasas puastsuaj tag huv tibsi. 14Nws yuav muab tej roob siab thiab tej hauv roob txo kom qis, 15yuav muab txhua lub chaw tsomfaj thiab tej ntsayeej uas txhim zeb khovkho rhuav. 16Nws yuav ua kom tej nkoj uas loj thiab zoonkauj tshajplaws kom tog rau hauv dej mus. 17-18Neeg txoj kev tsa hwjchim yuav xaus mus thiab neeg txoj kev khavtheeb yuav raug puastsuaj. Hnub ntawd tej mlom yuav ploj mus tas huv tibsi, tiamsis tus TSWV tibleeg yog tus yuav tau ntsejmuag.
19Tej neeg sawvdaws yuav mus nkaum hauv tej qhovtsua saum tej roob tsuas, lossis khawb qhov av nkaum kom dim tus TSWV txoj kev chim, nkaum Nws lub hwjchim thiab Nws tus tshwjchim uas ci ntsa-iab, thaum Nws nqis los co lub ntiajteb no. 20Thaum hnub ntawd los txog, lawv yuav muab tej mlom nyiaj mlom kub uas lawv nchuav, coj mus povtseg kom tag huv tibsi thiab tsotseg rau nastsuag thiab puav los ua zes rau. 21Thaum tus TSWV nqis los co lub ntiajteb, tej neeg sawvdaws yuav khiav mus nkaum hauv tej qhov av thiab qhovtsua saum tej roob tsuas, kom dim Nws txoj kev chim, thiab nkaum Nws lub hwjchim thiab Nws tus tshwjchim uas ci ntsa-iab.
22Tsis txhob tsosiab rau cov neeg uas txawj tuag. Lawv zoo tus dabtsi?
Currently Selected:
Yaxayas 2: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
