Yaxayas 28
28
Ceebtoom Rau Cov Nyob Sab Qaumteb
1Cov Efalayees yuav raug kev puastsuaj lau! Lawv lub koobmeej tabtom ploj zujzus zoo li tej kausmom pajntoos nyob saum lawv cov thawjcoj uas qaugcawv lub taubhau. Lawv cov taubhau uas khavtheeb ntawd mas tswqab heev, tiamsis lawv pw xyab leeg rau ntawm tej, vim qaugcawv. 2Saib maj, tus TSWV npaj tau ib tug uas muaj hwjchim thiab muajzog heev tuaj tawmtsam lawv; nws yuav tuaj yam li ib nthwv cuadaj cuadub nrog lawg, yam li ib nthwv nagxob nagcua, yam li dej nphau nphwv los nyab thoobplaws lub tebchaws. 3Cov Efalayees tej thawjcoj uas quavcawv txoj kev khavtheeb yuav raug muab tsuj ntiag rau hauv qab xibtaws. 4Thiab cov thawjcoj uas khavtheeb ntawd lub koobmeej tabtom yuav ploj mus yam li thawj phaum txiv ncuavpias uas xub siav, thiab leejtwg pom los ciali de noj.
5Muaj ib hnub tus TSWV uas muaj Hwjchim Loj Kawg Nkaus yuav zoo li lub mom pajntoos uas muaj meejmom kawg nkaus rau Nws haivneeg uas seem. 6Nws yuav pub lub siab uas muaj kev ncajncees rau tus neeg uas txiavtxim thiab txhawb cov uas zov ntawm cov roojloog kom muaj lub siab tawv tivthaiv tej yeebncuab.
Yaxayas Thiab Cov Yudais Cov Xibhwb Cev Vajtswv Lus Uas Qaugcawv
7Txawm yog cov povthawj hlob thiab cov xibhwb cev Vajtswv lus los puavleej qaugcawv thiab ntog pujpoog. Vim lawv haus cawv txivhmab thiab cawv ntxws ntau heev, lawv thiaj tsis meejpem. Cov xibhwb cev Vajtswv lus qaugcawv heev, lawv thiaj tsis totaub tej yogtoog uas Vajtswv qhia. Cov povthawj hlob los qaugcawv heev, lawv thiaj tsis paub tu tej plaubntug uas luag coj tuaj rau lawv hais. 8Lawv tej rooj uas lawv nyob puavleej lo ntuav tag huvsi, tsis muaj ib qho uas yuav huvsiab hlo li.
9Lawv yws kuv kawg li. Lawv hais tias, “Tus yawg ntawd xav tias nws qhia leejtwg? Leejtwg yuav xav mloog nws tej lus qhia? Tej ntawd tsuas yog zoo rau cov menyuam uas nyuamqhuav tso mis xwb! 10Nws qhia ib los rau ib los, ib kab rau ib kab, thiab ib zaj rau ib zaj rau peb.”
11Yog nej tsis mloog kuv lus, ces Vajtswv yuav txib lwm haivneeg uas haislus txawv heev tuaj qhia nej. #1Klt 14:21 12Nws caw kom nej sawvdaws los so thiab los nyob tsosiab plhuav, tiamsis nej tsis mloog Nws los. 13Twb yog vimli ntawd tus TSWV thiajli qhia nej ib los rau ib los, ib kab rau ib kab, thiab ib zaj rau ib zaj. Nej thiaj dawm txhua kaujruam uas nej rhais; nej yuav raug mob, raug ntes, thiab raug coj mus kaw.
Lub Pobzeb Rau Lub Nroog Xi-oos
14Nej cov thawjcoj khavtheeb uas kav cov pejxeem hauv lub nroog Yeluxalees, nej ciali mloog tus TSWV hais. 15Nej khav tias nej twb coglus nrog kev tuag thiab twb hais haum nrog tubtuag teb tag lawm. Nej tsosiab tias thaum kev puastsuaj los, yuav tsis ua licas rau nej, vim nej vamkhom tej lus dag ntawd ua lub chaw tivthaiv nej. 16Tub yog vimli ntawd tus TSWV uas kav ibpuas tsavyam thiaj hais tias, “Kuv muab ib lub pobzeb, uas twb muab sim lawm, yog ib lub pobzeb uas ruaj thiab tawv heev los ua lub plagtsev hauv lub nroog Xi-oos. Tus uas tsosiab rau nws, tus ntawd yuav tsis raug kev ntxhovsiab. #Nnkauj 118:22-23; Loos 9:33; 10:11; 1Pet 2:6 17Kuv yuav muab txoj kev ua ncaj ua txojhlua ntsuas qhov ntev, thiab muab txoj kev ncajncees ua lub thauj ntsuas qhov ntseg.”
Lawg yuav ntaus tej kev dag uas nej vamkhom, thiab dej yuav kuav nej tej chaw cawmsiav kom puastsuaj. 18Tej lus uas nej tau cog nrog kev tuag yuav raug muab rhuav mus, thiab tej lus uas nej tau pomzoo nrog tubtuag teb yuav muab tso povtseg. Thaum kev puastsuaj los, nej yuav raug piamsij. 19Kev puastsuaj yuav los raug nej ib zaug tas ib zaug thiab, thiab ib tagkis dhau rau ib tagkis. Nej yuav tau tiv nruabhnub hmontuj. Yog nej totaub txog zaj lus uas nej hnov no, tsimnyog nej yuavtsum txhawj-ntshai. 20Nej yuav zoo yam li tus neeg nyob hauv ib zaj pajlug uas hais tias nws pw rau lub txaj uas luv tsis txaus xyab, thiab vov daim pam uas nqaim npog tsis tag nws lub cev. 21Tus TSWV yuav sawv ib yam li Nws tau sawv saum lub Roob Pelaxees thiab hauv lub hav Nkinpe-oos, kom Nws tau ua tes haujlwm uas Nws npajsiab yuav ua, yog tes haujlwm uas txawv heev. Nws yuav ua kom Nws tes haujlwm tiav, yog tes haujlwm uas tsis muaj leejtwg paub. #2Xamu 5:20; 1Xwm 14:11; Yaus 10:10-12
22Tsis txhob saib tsis taus kuv tej lus ceebtoom! Yog nej tseem ua li ntawd, yuav hajyam ua rau nej khiav tsis dim. Kuv twb hnov tus TSWV uas muaj Hwjchim Loj Kawg Nkaus txoj kev txiavtxim siab uas yuav muab lub tebchaws ua kom puastsuaj lawm.
Vajtswv Lub Tswvyim
23Ciali tig pobntseg mloog tej uas kuv hais; ua tibzoo mloog tej lus uas kuv qhia nej. 24Cov neeg uas laij teb, lawv niajhnub laij tiamsis tsis cog li lov? Lawv niajhnub mus tu cov av ntawd tiamsis tsis cog dabtsi rau li lov? 25Thaum lawv tu tej av ntawd tiav lawm, lawv mus tseb noob zaubtxhwb thiab xyabtxob rau. Lawv cog nplej thiab cog pias#28:25: Phau lus Henplais muaj dua ib lolus ntxiv, tiamsis tsis paub lub ntsiab meej. ua tej kab, thiab muab lwmyam noob mus tseb rau ntawm tej ntug teb. 26Lawv yeej paub ua lawv tej haujlwm, rauqhov Vajtswv twb qhia rau lawv lawm. 27Lawv yeej tsis siv ib tug qws uas hnyav mus ntaus zaubtxhwb, lawv tsuas siv ib tug qws uas sib xwb; lossis lawv yeej tsis muab log tsheb dov mus luam xyabtxob, lawv tsuas siv ib tug pas mus ntaus xwb. 28Lawv tsis ua rau cov nplej ntsoog los ntawm qhov uas pheej muab cov nplej ntaus tas mus li. Txawm yog lawv cab lub tsheb uas nees luag mus luam nplej los yeej tsis ua rau nplej lov. 29Tagnrho tej tswvyim ntawd puavleej yog los ntawm tus TSWV uas muaj Hwjchim Loj Kawg Nkaus los. Tej homphiaj uas Vajtswv npaj ntawd zoo kawg nkaus, thiab yeej tiav mus rawsli tau npaj lawm.
Currently Selected:
Yaxayas 28: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
