Yaxayas 26
26
Vajtswv Yuav Pub Rau Nws Haivneeg Muajyeej
1Hnub ntawd neeg yuav hu zaj nkauj no nyob hauv tebchaws Yudas:
Peb lub nroog ruaj-khov heev!
Vajtswv yog tus tivthaiv tus ntsayeej!
2Ciali qhib tej roojloog
thiab tso haivneeg uas ncajncees mus rau hauv,
haivneeg uas ncajncees rau Vajtswv.
3Tus TSWV, Koj muab txoj kev kajsiab uas puvntoob
rau cov neeg uas muab siab npuab Koj;
thiab tsosiab plhuav rau Koj.
4Tsosiab rau tus TSWV mus ibtxhis li;
vim tus TSWV yog lub Pobzeb uas nyob mus ibtxhis.
5Nws txo cov neeg khavtheeb;
Nws muab cov neeg uas muajzog lub nroog rhuav kom puastsuaj,
thiab muab tej ntsayeej tsoo kom vau tag mus xyaw hmoov av.
6Nimno cov neeg uas raug caijtsuj thiab cov neeg pluag
yuav muab lub nroog ntawd tsuj nthi rau hauv lawv qab xibtaws.
7Tus TSWV, Koj ua txojkev du rau cov neeg ncajncees taug;
txojkev uas lawv taug tiaj heev.
8Peb yeej coj rawv Koj txoj kevcai, thiab peb ciasiab rau Koj xwb;
Koj lub npe yog qhov uas peb lub siab ntshaw.
9Hmontuj kuv lub siab tosntsoov Koj;
nruabhnub kuv lub siab xyivfab hlo nrhiav Koj.
Thaum Koj txiavtxim rau neeg ntiajteb,
lawv yuav paub tias txoj kev ncajncees yog dabtsi.
10Txawm yog Koj ua zoo npaumtwg rau cov neeg siabphem,
los lawv yeej tsis paub ua ncaj ua ncees hlo li.
Txawm yog nyob hauv lub tebchaws uas muaj kev ncajncees
los lawv tseem pheej ua phem;
lawv yeej tsis lees paub Koj lub hwjchim uas loj kawg nkaus li.
11Koj cov yeebncuab yeej tsis paub tias Koj yuav rautxim rau lawv.
Tus TSWV, Koj ciali ua kom lawv raug kev txajmuag thiab raug txomnyem;
cia lawv raug txomnyem los ntawm qhov uas Koj rautxim rau lawv rawsli Koj tau npaj tseg lawm.
Qhia kom lawv paub tias Koj hlub Koj haivneeg npaum licas. #Henpl 10:27
12Tus TSWV, Koj pub kev nyabxeeb rau peb;
txhua yam uas peb ua tiav lawm,
twb yog Koj ua rau peb xwb.#26:12: txhua yam… xwb; lossis Koj pab peb rawsli tej uas peb tau ua.
13Tus TSWV uas yog peb tus Vajtswv, peb raug lwmtus tswv kav peb,
tiamsis peb lees paub Koj lub npe nkaus xwb.
14Nimno lawv twb tuag thiab tsis ciajsia ntxiv lawm;
lawv tej ntsujplig yuav tsis sawv,
vim Koj tau rautxim rau lawv thiab ua rau lawv puastsuaj tag.
Tsis muaj leejtwg yuav nco txog lawv ntxiv lawm.
15Tus TSWV, Koj tau ua rau peb haivneeg huamvam,
nthuav peb lub tebchaws kom dav ntxiv;
qhov no ua rau Koj tau txais koobmeej.
16Tus TSWV, Koj tau rautxim rau Koj haivneeg,
thiab lawv thov Koj thaum lawv raug kev nyuajsiab.#26:16: Nqe 16 no paub tsis meej tias lolus Henplais yog txhais licas tiag.
17Tus TSWV, Koj tau ua rau peb quaj ntsaj laws,
yam li tus pojniam uas quaj thaum nws mob plab yug menyuam.
18Peb mob thiab peb ntsaj,
tiamsis peb yug tsis tau dabtsi.
Peb coj tsis tau kev cawmdim los rau lub ntiajteb;
thiab peb muab tsis tau txojsia los rau neeg hauv lub ntiajteb.#26:18: Peb coj tsis tau… lub ntiajteb; paub tsis meej tias lolus Henplais yog txhais licas tiag.
19Peb cov neeg uas tuag lawm yuav rov muaj sia dua!
Lawv tej cev yuav sawv rovqab los muaj txojsia.
Cov neeg uas pw hauv tej qhovntxa
yuav sawv los thiab hunkauj zoosiab.
Thaum sawvntxov lub lwgdej yug lub ntiajteb licas,
ces tus TSWV yuav tsa cov neeg uas tuag tau ntev lawm sawv rov los li ntawd.
Txiavtxim Thiab Txhimkho Tshiab
20Kuv haivneeg, nej ciali rovqab mus rau hauv nej tej tsev, thiab kaw qhovrooj rau. Nkaum mentsis tos kom Vajtswv txoj kev chim dhau tso. 21Tus TSWV tabtom nqis saum Nws qhov chaw nyob los rautxim rau neeg ntiajteb, vim lawv tej kev txhaum. Lub ntiajteb yuav tsis zais cov neeg uas raug luag tua tuag lawm, luag yuav coj cov neeg ntawd lub cev los rau sawvdaws pom.
Currently Selected:
Yaxayas 26: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
