Yaxayas 25

Zaj Nkauj Qhuas Vajtswv

1Tus TSWV, Koj yog kuv tus Vajtswv;

kuv yuav hwm Koj thiab qhuas Koj lub npe.

Koj tau ua ntau yam zoo kawg nkaus,

tej uas Koj tau npaj tseg thaum ub los lawm

Koj yeej ua ncaj ua ncees thiab ua tiavlog.

2Koj tau ua rau ntau lub nroog ntsoog tas

thiab muab lawv tej chaw fajxwm ua kom puastsuaj huv tibsi.

Tej loog uas peb cov yeebncuab tau ua tseg

yuav ploj mus tag ibtxhis.

3Txhua haivneeg uas muajzog yuav qhuas Koj;

tej nroog uas tej haivneeg limhiam nyob yuav ntshai Koj.

4Cov neeg pluag thiab txomnyem khiav los cuag Koj,

vim Koj yog lub chaw cawmsiav rau lawv dim lawv tej kev nyuajsiab.

Koj ua tsev rau lawv nraim tej nagxob nagcua

thiab ua duab ntxoovntxoo rau lawv nraim tshav.

Cov yeebncuab limhiam ntsawj lawv yam nkaus li cuadaj cuadub ntsawj tus ntsayeej,

5thiab yam nkaus li tshav kub heev hauv lub tebchaws ntuj qhua teb nkig.

Tiamsis tus TSWV, Koj tau ua rau peb cov yeebncuab lub suab ntsiag tag lawm;

Koj ua rau cov neeg limhiam tej suab qw ntsiag tag

yam nkaus li tauv huab roos tshavntuj kub.

Vajtswv Npaj Ib Rooj Mov

6Nyob saum Roob Xi-oos no, tus TSWV uas muaj Hwjchim Loj Kawg Nkaus yuav npaj ib rooj mov rau txhua haivneeg hauv ntiajteb noj—yog ib rooj mov uas muaj tej zaub-mov thiab tej cawv uas qab tshajplaws. 7Nyob saum lub roob no, Nws yuav muab txhua haivneeg tej kev nyuajsiab uas zoo yam li tauv huab tshem povtseg. 8Tus TSWV uas kav ibpuas tsavyam yuav rhuav txoj kev tuag kom puastsuaj mus ibtxhis! Nws yuav so txhua tus lub kuamuag, thiab yuav muab tej lus txobthuam uas Nws haivneeg nyob hauv lub ntiajteb raug, rho huv tibsi mus. Tus TSWV yog tus hais li ntawd. #1Klt 15:54; Tshwm 7:17; 21:4

9Thaum muaj tej xwmtxheej no lawm, txhua tus neeg yuav hais tias, “Nws yog peb tus Vajtswv! Peb tsosiab plhuav rau Nws, mas Nws tau cawm peb dim. Nws yog tus TSWV! Peb tsosiab plhuav rau Nws, mas nimno peb zoosiab thiab xyivfab heev vim Nws tau cawm peb dim lawm.”

Vajtswv Yuav Rautxim Rau Cov Mau-am

10Tus TSWV yuav tsomkwm lub Roob Xi-oos no, tiamsis cov Mau-am yuav raug tsuj ib yam li tsuj tej quavnyab rau hauv lub qhov quavchiv. #Yaxaya 15:1—16:14; Yelemi 48:1-47; Exek 25:8-11; Amaus 2:1-3; Xefani 2:8-11 11Lawv yuav tsa tes hauv lub qhov chiv ntawd tuaj ib yam li lawv yuav ua luam dej, tiamsis Vajtswv yuav ua kom lawv txoj kev khavtheeb ntawd xaus, mas lawv tej npab yuav tog zujzus mus. 12Nws yuav muab cov Mau-am tej chaw fajxwm thiab lawv tej ntsayeej uas siab rhuav kom puastsuaj thiab tsoo kom tawg tas xyaw hmoov av.

Currently Selected:

Yaxayas 25: MWW2022

Highlight

Copy

Compare