Yaxayas 24
24
Tus TSWV Yuav Rautxim Rau Lub Ntiajteb
1Tus TSWV yuav muab lub ntiajteb ua kom puastsuaj thiab muab tso povtseg kom nyob qhuav qhawv cia. Nws yuav muab lub ntiajteb ntswj kom tej neeg tawg mus nyob uasab uasua. 2Yuav zoo ib yam li ntawd rau cov povthawj hlob thiab cov pejxeem, cov lospav thiab cov tubqhe, cov poj lospav thiab cov ntxhais qhev, cov muag thiab cov yuav, cov qiv thiab cov txais, cov muaj thiab cov pluag. 3Lub ntiajteb yuav nyob qhuav nquas thiab khoob lug cia. Tus TSWV tau hais tej lus no thiab yuav muaj rawsli tej lus ntawd.
4Ntiajteb qhuav nkig nkuav; lub ntiajteb tsaugmuag zujzus; lub ntiajteb thiab lub ntuj ciali lwj zujzus mus. 5Neeg tau ua rau lub ntiajteb tsis huv los ntawm qhov uas lawv hla Vajtswv tej kevcai thiab tsis ua rawsli Nws tej lus cogtseg uas nyob mus ibtxhis. 6Yogli ntawd lub ntiajteb thiaj raug Vajtswv lolus foom phem. Neeg thiaj yuavtsum tau them tus nqi rau tej kev txhaum uas lawv tau ua los. Vimli ntawd thiaj seem tsawg-tsawg leej lawm xwb.
7Tej txivhmab qhuav tag, thiab tej cawv txivhmab tsawg zujzus lawm. Txhua tus uas thaum ub muaj kev zoosiab nimno ntxhovsiab kawg, 8thiab lawv tej suab nkauj nogncas thiab suab nruas uas nrov lomzem xauvnpo puavleej ntsiag tag. 9Tsis muaj kev haus cawv nrog tej suab hunkauj lomzem li lawm; tej cawv ntxws iab heev rau cov neeg uas haus cawv. 10Hauv lub nroog txhua yam nyob khoob lug cia, thiab tej neeg sawvdaws muab lawv xauv rau hauv lawv tej tsev tas kom tsis txhob muaj neeg nkag tau mus rau hauv. 11Tej neeg tuaj quaj qw tom tej kev vim tsis muaj cawv haus. Kev zoosiab yuav ploj mus ibtxhis; txoj kev zoosiab ntawd tau raug muab tshem tawm hauv lub tebchaws mus lawm. 12Lub nroog los puastsuaj, thiab tej roojloog los raug muab tsoo tawg tas. 13No yog tej xwmtxheej uas yuav los raug txhua haivneeg nyob hauv lub qabntuj. Yuav zoo yam li lub caij sau qoobloo xaus, uas luag de tej txiv ntoo-roj saum txhua tsob ntoo thiab de tej nyuag tw txivhmab ua zaum kawg ntawm cov hmab.
14Cov neeg seem yuav tsa suab hunkauj zoosiab. Cov uas nyob sab hnubpoob yuav qhuas txog tus TSWV txoj kev zoo, 15thiab cov nyob sab hnubtuaj yuav qhuas tus TSWV tus tshwjchim. Tej tebchaws uas nyob raws ntug hiavtxwv yuav qhuas tus TSWV, uas yog cov Yixalayees tus Vajtswv. 16Peb yuav hnov neeg hunkauj deb-deb tim qabntug kawg tuaj qhuas Tus uas Ncajncees.
Tiamsis tsis muaj kev ciasiab rau kuv li! Kuv puastsuaj zujzus mus lawm xwb! Cov neeg ntxeevsiab yimhuab ntxeevsiab, thiab lawv tej kev dag yim huam loj zujzus. 17Nej sawvdaws ciali mloog kuv hais! Kev txhawj kev ntshai, tej lub qhov hlauv tob-tob, thiab ntxiab tabtom cuab tos nej. 18Txhua tus uas khiav txoj kev ntshai yuav mus poob rau lub qhov hlauv tob-tob, thiab txhua tus uas khiav kom dim lub qhov hlauv tob-tob ntawd, yuav mus mag rooj ntxiab. Roojntug yuav qhib, mas tuamtsam nag yuav laublug saum ntuj los, ua rau lub ntiajteb co uazog koog. 19Lub ntiajteb yuav tawgpleb, yuav ntsoog, thiab faib pes hlo. 20Lub ntiajteb ntog ib yam li tus neeg qaugcawv thiab yuav ua yoj ua yees yam li nagxob nagcua ntsawj lub tsev pheebsuab. Tej kev txhaum hnyav kawg tsuam lub ntiajteb, nws thiaj ntog thiab sawv tsis taus ib zaug ntxiv li lawm.
21Hnub ntawd tus TSWV yuav rautxim rau cov muaj hwjchim uas nyob saum nruabntug thiab cov vajntxwv hauv lub ntiajteb no. 22Vajtswv yuav sau lawv los kaw uake rau hauv lub qhov av; Nws yuav muab lawv kaw nkaus rau hauv tsev lojcuj mus txog hnub uas Nws txiavtxim rau lawv. 23Lub hli yuav tsaus thiab lub hnub yuav tsis ci lawm, rauqhov tus TSWV uas muaj Hwjchim Loj Kawg Nkaus yuav ua vajntxwv kav saum lub Roob Xi-oos thiab hauv lub nroog Yeluxalees, ua rau txhua tus thawjcoj yuav pom Nws tus tshwjchim.
Currently Selected:
Yaxayas 24: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
