Yaxayas 21
21
Ua Yogtoog Pom Lub Nroog Npanpiloos Poob
1No yog cov lus uas hais txog cov neeg Npanpiloos.
Zoo yam li cov khaubzeeg cua ntsawj hla tiaj suabpuam tuaj, kev puastsuaj yuav tawm hauv lub tebchaws uas txaus ntshai heev tuaj. 2Kuv tau ua ib zaj yogtoog pom tej xwmtxheej phem, ib zaj yogtoog txog kev ntxeevsiab thiab kev puastsuaj.
Cov Elas, ciali tawm mus uarog! Cov Medias, ciali tawm mus vij luag tej nroog! Vajtswv yuav ua kom tej suab quaj suab qw uas yog cov Npanpiloos tau ua ntawd ntsiag mus.
3Thaum kuv ua yogtoog pom zaj no, kuv ntshai heev thiab mob thoobplaws kuv ibce npaum nkaus li tus pojniam uas mob plab yug menyuam. 4Kuv lub taubhau kiv heev, thiab kuv ntshai ua ibce tsheehnyo. Kuv tos tsis taus kom tsausntuj, tiamsis yeej tsis muaj dabtsi zoo rau kuv li, tsuas yog kev txhawj kev ntshai xwb.
5Nyob rau hauv zaj yogtoog ntawd, muaj ib rooj mov uas twb npaj tiav lawm; luag twb muab cov ntaub tuab nthuav pua rau cov qhua zaum. Sawvdaws tabtom noj thiab haus. Tamsim ntawd txawm muaj lus xaaj tuaj hais tias, “Cov nomtswv, ciali npaj nej cov hlau thaiv cev!”
6Ces tus TSWV hais rau kuv tias, “Ciali tso ib tug fajxwm mus saib, thiab kom nws qhia tej uas nws pom rau nej. 7Yog tias nws pom cov txivneej caij nees, ib nkawg quas ib nkawg, thiab cov txivneej uas caij neesluav thiab caij ntxhuav tuaj, mas nws yuavtsum ua tibzoo saib kom meej-meej.”
8Tus fajxwm qw los hais tias, “Kuv tus tswv, kuv tau sawv saum qhov chaw fajxwm saib tashnub tashmo.”
9Zaumno, saib maj! Cov txivneej uas caij nees, ib nkawg quas ib nkawg tuaj lawm lau! Tus fajxwm hais tias, “Lub nroog Npanpiloos tub poob lawm! Tej mlom uas lawv pe poob rau hauv av thiab tawg tag lawm.” #Tshwm 14:8; 18:2
10Kuv haivneeg Yixalayees, nej raug ntaus ib yam li ntaus nplej, tiamsis zaumno kuv tau qhia rau nej paub txog tej xov zoo uas kuv hnov los ntawm tus TSWV, uas muaj Hwjchim Loj Kawg Nkaus, uas yog cov Yixalayees tus Vajtswv.
Cov Lus Uas Hais Txog Lub Nroog Edoos
11No yog cov lus uas hais txog lub nroog Edoos.
Muaj ib tug neeg hu tom Edoos tuaj rau kuv tias, “Tus fajxwm, tshuav ntev licas mam kajntug? Qhia rau kuv seb thaum twg mam kajntug?”
12Kuv teb tias, “Twb yuav kajntug, tiamsis twb yuav rov tsausntuj dua thiab. Yog koj xav rov nug dua, rov tuaj thiab nug los tau.”
Cov Lus Uas Hais Txog Cov Alanpias
13No yog cov lus uas hais txog cov Alanpias.
Cov neeg Dedas, nej taug kev tsheej pab los so rau ntawm cov Alanpias tej roob mojsab qhua, 14muab dej rau cov neeg uas tuaj nrhiav dej ntawm nej haus. Nej cov neeg uas nyob hauv tebchaws Temas, muab zaub-mov rau cov neeg tawg rog noj. 15Vim lawv tau khiav ntawm tej hniav ntaj uas yuav tua lawv, khiav ntawm tej hneevnti uas nta tos yuav tua lawv, thiab ntawm tej kev tsov kev rog uas hnyav heev.
16Tus TSWV hais rau kuv tias, “Tshuav ib xyoos txwm nkaus, mas cov Kedas lub meejmom uas loj yuav xaus mus. 17Cov Kedas tej tubrog uas txawj tua hneevnti thiab siab tawv, tsuas tshuav qeeleej seem lawm xwb. Kuv yog tus TSWV, uas yog cov Yixalayees tus Vajtswv, yog tus hais li ntawd.”
Currently Selected:
Yaxayas 21: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
