Yaxayas 22
22
Cov Lus Hais Txog Lub Nroog Yeluxalees
1No yog cov lus uas hais txog lub Hav Yogtoog.
Muaj xwmtxheej dabtsi? Vim licas cov neeg hauv lub nroog nce tagnrho mus rau saum rutsev, txheej tsev lastshav? 2Lub nroog tsuas puvnkaus tej suab luag ua nqaj ua nqug, thiab tej suab lomzem zoosiab xwb.
Nej cov neeg uas tuag rau npluav rog no, tsis yog tuag rau hniav ntaj hniav riam lossis tuag rau kev tsov kev rog. 3Nej cov thawjcoj tau khiav tawm thiab puavleej raug ntes, tiamsis tsis tau tua ib hnee li. Txawm yog lawv khiav deb lawm los, lawv tseem raug ntes coj los kaw. 4Yogli ntawd, kuv thiaj hais tias tsis txhob quavntsej kuv; cia kuv quaj lwjsiab ntsuav rau kuv haivneeg uas tau tuag lawm. Tsis tas nplig kuv lub siab li. 5No yog lub sijhawm nyuajsiab, sijhawm swb, thiab sijhawm ntxhovsiab uas tus TSWV uas muaj Hwjchim Loj Kawg Nkaus tau tso los rau peb hauv lub Hav Yogtoog. Tej ntsayeej uas thaiv peb lub nroog tau vau tawg tas thiab tej suab quaj thov pab tau nrov ntxhe mus thoobplaws pem tej ncov roob.
6Cov tubrog caij nees hauv tebchaws Elas tuaj, lawv khuam rawv hneevnti thiab xubvos. Cov tubrog uas tuaj hauv tebchaws Khaw tuaj, npaj rawv lawv tej hlau thaiv cev. 7Tsheb nees nyob puvnkaus rau hauv cov hav uas av zoo heev hauv tebchaws Yudas, thiab cov tubrog caij nees tuaj sawv tsheej pab ntawm lub nroog Yeluxalees tej roojloog. 8Tus TSWV tau muab tej cuabyeej tivthaiv cov Yudais tshem tag huvsi lawm.
Hnub uas muaj tej xwmtxheej no, nej yuav mus nqa tej cuabyeej ntawd hauv lub Tsev Havzoov los. 9-10Nej mus pom tus ntsayeej uas thaiv lub nroog Yeluxalees pob puas ntau qhov mas yuav tau kho. Nej mus sojntsuam txhua lub tsev hauv Yeluxalees thiab muab ibtxhia tsoo povtseg thiab siv cov pobzeb ntawd los txhim tej ntsayeej. Nej xav tau dej siv, 11ces nej txawm ua tau ib lub rhawv rau ntawm ob tus ntsayeej kis nruabnrab ntim cov dej uas ntws hauv lub qub pas dej los. Tiamsis nej tsis tig pobntseg mloog Vajtswv, tus uas tau npaj tej no thiab ua kom muaj tej no thaum ub los lawm.
12Thaum ntawd tus TSWV uas kav ibpuas tsavyam, tus uas muaj Hwjchim Loj Kawg Nkaus, tau hais kom nej quaj thiab nyiav, chais nej tej plaubhau thiab hnav ntaub tsaj. 13Tiamsis nej tseem luag thiab zoosiab, nej tua nyuj thiab tua yaj los noj, thiab muab cawv txivhmab los haus. Nej hais tias, “Tagkis xwb peb twb yuav tuag, ces peb ciali noj thiab haus kom txaus!” #1Klt 15:32
14Tus TSWV uas kav ibpuas tsavyam, tus uas muaj Hwjchim Loj Kawg Nkaus tau hais rau kuv tias, “Tej kev phem kev qias no yuav tsis muaj kev zamtxim rau lawv mus txog thaum lawv tuag tas. Kuv, uas yog tus TSWV kav ibpuas tsavyam, tus uas muaj Hwjchim Loj Kawg Nkaus, yog tus hais li ntawd.”
Cov Lus Ceebtoom Rau Senpenas
15Tus TSWV uas kav ibpuas tsavyam, tus uas muaj Hwjchim Loj Kawg Nkaus txib kom kuv mus cuag Senpenas, uas yog tus thawj saib vajntxwv lub tsev, thiab hais rau nws tias, 16“Koj xav tias koj yog leejtwg? Leejtwg tsocai rau koj tuaj txaug ib lub qhovntxa ua chaw so rau koj rau saum roob zeb uas siab no? 17Koj yog ib tug neeg uas tseemceeb kawg, tiamsis tus TSWV yuav muab koj nqa mus povtseg. 18Nws yuav muab koj nqa li lub pob thiab yuav muab koj pov mus rau ntawm lub tebchaws uas dav heev. Koj yuav tuag rau ntawd, tuag rau ib sab ntawm tej tsheb nees uarog uas koj ibtxwm txaussiab heev rau. Koj yuav ua rau koj tus tswv tsev neeg raug kev txajmuag. 19Tus TSWV yuav tshem koj tawm ntawm koj lub chaw ua haujlwm thiab yuav txo kom koj poob koj lub meejmom.”
20Tus TSWV hais rau Senpenas tias, “Hnub ntawd Kuv yuav hu Kuv tus tubtxib Eliakees uas yog Hilekiyas tus tub tuaj. 21Kuv yuav muab koj lub tsho ntev rau nws hnav, muab koj txoj hlab rau nws sia, thiab yuav muab tej meejmom uas koj muaj huv tibsi rau nws. Nws yuav zoo li ib leejtxiv rau cov neeg hauv Yeluxalees thiab Yudas. 22Kuv yuav muab tus yuamsij uas qhib Daviv lub tsev tso rau saum nws xubpwg; nws qhib, yuav tsis muaj leejtwg kaw; thiab nws kaw, yuav tsis muaj leejtwg qhib. #Tshwm 3:7 23Kuv yuav muab nws ntsia rau ntawm lub chaw uas ruaj-khov ib yam li tus tswg tsevntaub uas twb ntsia khov lawm, mas nws yuav yog lub zwmtxwv uas tau ntsejmuag rau tagnrho nws tsev neeg.
24“Tiamsis tagnrho nws cov kwvtij thiab nws tej tubki yuav ua ib lub nra hnyav heev rau nws. Lawv yuav khuam rau saum nws zoo yam nkaus li tej laujkaub thiab tej tais phiab uas khuam rau ntawm tej ncej! 25Hnub ntawd, tus ncej uas cog rau qhov chaw ruaj yuav rho tawm thiab yuav vau. Txhua tsavyam uas khuam rau saum nws yuav poob tag.” Tus TSWV yog tus hais li ntawd.
Currently Selected:
Yaxayas 22: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
