Yaxayas 1

1Phau ntawv no yog teev txog tej yogtoog uas Vajtswv tau qhia rau Yaxayas, uas yog Amoj tus tub, txog cov Yudais thiab lub nroog Yeluxalees, thaum lub sijhawm uas Uxiyas, Yauthas, Ahaj, thiab Hexekiyas lawv ua vajntxwv kav cov Yudais. #2Vaj 15:1-7; 2Xwm 26:1-23; 2Vaj 15:23-28; 2Xwm 27:1-9; 2Vaj 16:1-20; 2Xwm 28:1-27; 2Vaj 18:1-20; 2Xwm 29:1—32:33

Vajtswv Cem Nws Haivneeg

2Tus TSWV hais tias, “Lub ntuj thiab lub ntiajteb, ciali mloog tej lus uas Kuv hais! Cov menyuam uas Kuv yug thiab tu hlob tau ntxeevsiab rau Kuv. 3Nyuj paub tias leejtwg yog nyuj tus tswv, thiab neesluav paub tias lub dab zaub uas tus tswv pub rau neesluav noj nyob qhovtwg. Tiamsis cov Yixalayees tsis paub lawv tus TSWV. Kuv haivneeg tsis totaub hlo li.”

4Haivneeg txhaum 'e, nej raug kev puastsuaj lau. Nej yog cov neeg uas ua phem kawg nkaus! Yog cov noob uas ua phem ua qias! Nej tau tso tus TSWV, uas yog cov Yixalayees tus Vajtswv tseg, thiab tig nrobqaum rau Nws. 5Vim licas nej pheej yuav ntxeevsiab tsis tseg li? Nej tseem xav raug txim ntxiv lov? Yixalayees, nej lub taubhau twb ua kiavtxhab thoobplaws, thiab nej lub siab lub ntsws twb mob ncus nco lawm xwb. 6Txij saum taubhau mus ti nkaus rau hauv kotaw, thoobplaws nej lub cev twb tsis muaj ib qho zoo li. Tsuas pom o, doog thiab ua qhovtxhab xwb; nej twb tsis qhwv tej qhovtxhab, tsis tu kom zoo, thiab muab tshuaj rau li.

7Nej lub tebchaws nyob qhuav qhawv tseg, nej tej nroog kubhnyiab tas du lug. Lwm haivneeg tuaj txeeb nej lub tebchaws kav tabmeeg nej, thiab muab txhua yam ua puastsuaj tag. 8Tshuav lub nroog Yeluxalees nkaus lawm xwb zoo li lub nroog uas luag vij lawm—zoo li lub tsev pheebsuab uas nyob hauv lub vaj txivhmab, lossis zoo li lub tsev uas nyob hauv daim teb dib. 9Yog tias tus TSWV uas muaj Hwjchim Loj Kawg Nkaus tsis pab ibtxhia neeg kom dim, ces Yeluxalees yeej kawg puastsuaj zoo yam nkaus li lub nroog Xaudoos thiab lub nroog Kaumaulas ntag. #Chiv 19:24; Loos 9:29

10Yeluxalees, nej cov thawjcoj thiab cov neeg ces zoo nkaus li cov uas nyob hauv lub nroog Xaudoos thiab nroog Kaumaulas ntag. Nej ciali mloog tus TSWV tej lus. Ciali tig pobntseg mloog peb tus Vajtswv tej lus qhia. 11Tus TSWV nug hais tias, “Nej xav tias Kuv ntshaw tej khoom uas nej coj tuaj fij ntau-ntau rau Kuv ntawd no lov? Tej yaj thiab tej roj tsiaj uas nej muab tuaj hlawv fij rau Kuv, txaus Kuv kawg li lawm. Kuv dhuav tej ntshav yaj, ntshav nyuj, thiab ntshav tshis ntawd kawg li. #Amaus 5:21-22 12Leejtwg kom nej nqa tej no tuaj rau Kuv thaum nej tuaj pehawm Kuv? Leejtwg kom nej tuaj ncig mus ncig los ntawm Kuv lub Tuamtsev? 13Tej khoom fij ntawd tsis muajnqis dabtsi rau Kuv! Kuv dhuav nej tej pa hmoov tshuaj tswqab uas nej hlawv ntawd kawg li. Kuv tiv tsis taus thaum nej ua Kevcai Hli Xiab, Xanpataus, thiab thaum nej tuaj txoos uake ua kevcai pehawm Kuv; tej ntawd tsis muaj qabhau rau Kuv vim nej tej kev txhaum. 14Kuv ntxub nej tej rooj noj rooj haus ua Kevcai Hli Xiab thiab tej koobtsheej uas nej niaj xyoo ua. Tej ntawd yog lub nra uas Kuv dhuav ris kawg li.

15“Thaum nej tsa tes thov Kuv, Kuv yuav tsis saib nej. Txawm yog nej yuav thov ntau npaum licas los Kuv yuav tsis mloog, rauqhov nej tej tes lo ntshav. 16Ntxuav kom nej huv. Tso tej kev phem kev qias uas Kuv pom nej ua no tseg. Tseg kiag tsis txhob ua kev phem kev qias 17thiab ciali xyaum ua qhov zoo. Nrhiav kev ncajncees. Pab tej neeg uas raug tsimtxom, ua ncaj rau cov menyuam ntsuag, thiab tivthaiv cov pojntsuam.”

18Tus TSWV hais tias, “Cia peb los hais zaj no kom tas mus. Txawm nej tej kev txhaum yuav liab cuag ntshav, los Kuv yuav ntxuav kom nej dawbpaug li daus.#1:18: ntshav, los… li daus; lossis ntshav; nej xav tias Kuv yuav ntxuav kom nej dawbpaug li daus no lov? Txawm nej tej kev txhaum yuav liab doog npaum licas, los Kuv yuav ua kom nej dawbpaug li plaub yaj.#1:18: Txawm nej… plaub yaj; lossis Nej tej kev txhaum yuav liab doog npaum licas; nej xav tias nej yuav dawbpaug yam li plaub yaj no lov? 19Yog nej mloog Kuv lus, nej yuav tau noj txhua yam zoo uas cog hauv lub tebchaws no. 20Tiamsis yog nej pheej tsis mloog Kuv lus, nej yuav raug kev ploj kev tuag. Kuv yog tus TSWV uas hais li ntawd.”

Lub Nroog Uas Ua Txhaum

21Lub nroog uas thaum ub muaj kev ncajncees, nimno dhau mus ua ib tug niamntiav! Thaum ub muaj cov neeg coj ncaj nyob puvnkaus hauv, tiamsis nimno tshuav cov neeg uas tua neeg nyob lawm xwb. 22Lub nroog Yeluxalees, thaum ub koj zoo li cov tseem nyiaj, tiamsis nimno koj twb tsis muajnqis li lawm. Thaum ub koj zoo li tej cawv txivhmab uas qab heev, tiamsis nimno koj zoo li cov cawv uas tov dej lawm xwb. 23Koj cov nomtswv tau ntxeevsiab, thiab nrog cov neeg tubsab ua phoojywg; lawv txaussiab rau tej nyiaj uas luag coj tuaj xiab thiab tej khoomplig. Lawv tsis pab txheem cov menyuam ntsuag hauv tsev tu plaub, thiab tsis mloog cov pojntsuam tej lus peev.

24Yogli ntawd, koj ciali mloog tus TSWV uas muaj Hwjchim Loj Kawg Nkaus uas yog cov Yixalayees tus Vajtswv tej lus uas hais tias, “Kuv yuav ua pauj rau nej uas yog Kuv cov yeebncuab, kom nej thiaj yuav tsis ua teebmeem rau Kuv ib zaug ntxiv lawm. 25Kuv yuav tawmtsam koj. Kuv yuav muab koj nchuav li luag nchuav hlau kom tej quav hlau tawm mus, thiab yuav muab tej uas tsis huv rho tawm ntawm koj mus kom tas. 26Kuv yuav pub kom koj rov muaj cov thawjcoj thiab cov tuavxam ib yam li thaum ub koj muaj. Tomqab ntawd luag yuav hu Yeluxalees tias yog lub nroog uas zoo thiab ncajncees.”

27Vim Vajtswv yog tus ncajncees, Nws yuav cawm lub nroog Yeluxalees thiab txhua tus uas tso tej kev txhaum tseg. 28Tiamsis cov neeg uas ua txhaum thiab ntxeevsiab rau Nws, Nws yuav muab tsoo kom puastsuaj; thiab Nws yuav muab txhua tus uas tso Nws tseg tua huv tibsi.

29Koj yuav raug txajmuag vim koj tau mus pehawm tej ntoo qhib, thiab koj yuav poob ntsejmuag vim lub vaj dawbhuv uas koj tau xaiv los ua chaw pehawm.#1:29: lub vaj dawbhuv uas koj tau xaiv los ua chaw pehawm: Neeg ntseeg tias muab lub vaj ntawd fij rau tej nyuag vajtswv qoobloo, yuav ua rau tus nyuag vajtswv ntawd foom koobhmoov rau lawv tej qoobloo. 30Koj yuav qhuav ntsws ntsee zoo li tus ntoo qhib uas twb tuag lawm, thiab zoo li lub vaj uas tsis muaj neeg yws dej. 31Lub nyuag tximtawg kub tau tej quavnyab licas, ces cov neeg muaj hwjchim yuav raug puastsuaj los ntawm lawv tej kev ua phem ua qias ib yam li ntawd, thiab yuav tsis muaj leejtwg tua tau cubtawg ntawd li.

Currently Selected:

Yaxayas 1: MWW2022

Highlight

Copy

Compare